ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប គឺជាពេលវេលាដែលសិស្សានុសិស្សថ្នាក់ទី១២បានទន្ទឹងរងចាំជាង១០ឆ្នាំ និងត្រូវចំណាយពេលប្រឡងដើម្បីទទួលបានលទ្ធផលនៃការសិក្សាថ្នាក់វិទ្យាល័យ និងឈានទៅរកថ្នាក់មហាវិទ្យាល័យ។ ដូចនេះសិស្សានុសិស្សជាពិសេសបេក្ខជនត្រៀមប្រឡងថ្នាក់ទី១២ត្រូវខិតខំបញ្ចេញឱ្យអស់ពីសមត្ថភាព។

លោក អ៊ុយ មករា ជានិស្សិតកំពុងសិក្សានៅប្រទេសរុស្សីបានលើកទឹកចិត្តដល់សិស្សានុសសិស្សដែលត្រៀមប្រឡងបាក់ឌុបនៅថ្ងៃខាងមុខថា បើសិនជាប្អូនមិនទាន់បានត្រៀមខ្លួនរួចរាល់ក្នុងការប្រឡង សូមប្អូនៗយកចិត្តទុកដាក់ការប្រឡង បន្តមើលមេរៀន និងដោះស្រាយលំហាត់បើទោះបីជានៅសល់តិចថ្ងៃក្ដី។ ជាមួយគ្នានេះបេក្ខជនប្រឡងសូមកុំភ្លេចថែរក្សាសុខភាព និងញ៉ាំអាហារដែលមានជំនួយសុខភាពផងដែរ។

នៅសល់ពេលប៉ុន្មានថ្ងៃទៀតក៏ពិតមែន ប៉ុន្តែសូមបន្តរំលឹកមេរៀនឱ្យបានច្រើនតាមដែលអាចធ្វើបាន ហើយធ្វើបានប៉ុណ្ណាយកប៉ុណ្នឹងទៅ សូមកុំដាក់សម្ពាធខ្លួនឯងពេកព្រោះអ្នកបានធ្វើអស់ពីសមត្ថភាពហើយ

លោក អ៊ុយ មករា

និស្សិតអាហារូបករណ៍កំពុងសិក្សានៅក្រៅប្រទេសរូបនេះបន្ថែមថា សម្រាប់អ្នកដែលបានត្រៀមខ្លួនរួចរាល់វិញ ក៏មិនអាចសម្រាលដៃចោលនូវមេរៀនដែលខ្លួនចេះហើយដែរ តែត្រូវត្រៀមខ្លួន និងប្រុងប្រយ័ត្នគ្រប់ពេលវេលាព្រោះអ្នកអាចនឹងធ្វេសប្រហែសបង្កើតជាកំហុសនៅកន្លែងណាមួយ។

លោក អ៊ុយ មករា បន្តថា នៅក្នុងពេលប្រឡងសូមកុំមានអារម្មណ៍ភ័យព្រួយខ្លាំងពេក ត្រូវប្រមូលអារ្មណ៍ដើម្បីធ្វើកិច្ចការប្រឡងរបស់អ្នកឱ្យបានល្អ និងត្រូវគិតថា មានមនុស្សជាច្រើនកំពុងប្រឡងដូចអ្នកហើយគេអាចធ្វើបាន អ្នកក៏អាចធ្វើបានដូចគ្នា ត្រូវមានជំនឿចិត្តលើខ្លួន និងជំនឿចិត្តលើការខិតខំសិក្សារបស់ខ្លួនឯងកន្លងមក។

ក្នុងកំឡុងពេលរងចាំលទ្ធផលប្រលង បេក្ខជនអាចរំពឹងលទ្ធផលដែលខ្លួនចង់បានទៅតាមសមត្ថភាពរបស់ខ្លួនឯង ប៉ុន្តែសូមកុំរំពឹងខ្លាំងលើសពីសមត្ថភាពព្រោះបើសិនជាមិនបានដូចការរំពឹងទុកអាចធ្វើឱ្យអ្នកមានការខកចិត្តកាន់តែខ្លាំង និងធ្វើឱ្យអ្នកខាតពេលវេលាផងដែរ

លោក អ៊ុយ មករា

ជាមួយគ្នានេះ លោក មករា ក៏សូមឱ្យ​ប្អូនៗខិតខំប្រឹងប្រឺងធ្វើឱ្យបានល្អ និងជូនពរឱ្យមានសំណាងល្អក្នុងការប្រឡងនាថ្ងៃខាងមុន៕