ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – កម្ពុជាសម្រេចបង្កើនខ្ទង់ចំណាយ ៧លានដុល្លារអាមេរិកបន្ថែមទៀតសម្រាប់គាំទ្រដល់ការស្នាក់នៅ និងអាហារហូបចុករបស់គណៈប្រតិភូកីឡានានាដែលមកចូលរួមព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ។ ការគាំទ្រដល់ប្រតិភូកីឡាបរទេសនាពេលនេះ ជាបុព្វហេតុកម្រមួយមិនធ្លាប់មានទាល់តែសោះក្នុងប្រវត្តិស៊ីហ្គេមនាពេលកន្លងមក ។
នេះបើតាមប្រសាសន៍សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅក្នុងឱកាសអញ្ជើញជាអធិបតីបុណ្យបញ្ចុះខណ្ឌសីមាព្រះវិហារពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ នាព្រឹកថ្ងៃចន្ទនេះ ។
សម្តេចតេជោនាយករដ្ឋមន្ត្រី បានមានប្រសាន៍ថា នេះជាប្រវត្តិសាស្ត្រនៃការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ដែលកម្ពុជាធ្វើម្ចាស់ផ្ទះមិនតម្រូវឱ្យប្រតិភូកីឡាអាស៊ីអាគ្នេយ៍ទាំងអស់បង់ថ្លៃហូបចុក និងការស្នាក់នៅឡើយ ។ កន្លងទៅម្នាក់ៗបង់ថ្លៃហូបចុក និងការស្នាក់នៅមានតម្លៃ ៥០ដុល្លារអាមេរិកក្នុងមួយថ្ងៃៗឱ្យម្ចាស់ផ្ទះរៀបចំការប្រកួត ។ កម្ពុជាមិនយកថ្លៃសម្រាប់ប្រតិភូកីឡាបរទេសនេះ ដើម្បីផ្តល់ភាពកក់ក្តៅបន្ថែមដល់ប្រតិភូកីឡាស៊ីហ្គេម និងអាស៊ានប៉ារ៉ាហ្គេម ។
សម្តេចតេជោ ហ៊ុន សែន មានប្រសាសន៍បញ្ជាក់ថា ៖
“យើងចំណាយ ៧លានដុល្លារបន្ថែមទៀត ដើម្បីចិញ្ចឹមកីឡាករ កីឡាការិនីបរទេស មិត្តភក្តិបរទេសដែលមកប្រកួតនៅកម្ពុជា ! តាមធម្មតាគេយកយើង ៥០ដុល្លារម្នាក់ក្នុងមួយថ្ងៃបង់ឱ្យម្ចាស់ផ្ទះ ពេលដែលកីឡាកររបស់យើងទៅប្រកួត តែយើងអត់ឱ្យបង់ថ្លៃទេ គឺទទួលបន្ទុកចិញ្ចឹមគេ…”។
សូមជម្រាបថា ការប្រកួតកីឡាស៊ីហ្គេមដែលកម្ពុជាធ្វើជាម្ចាស់ផ្ទះ នឹងចាប់ផ្តើមចាប់ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេម (ASEAN Para Games) ចាប់ផ្តើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ខាងមុខ ។ តាមការបញ្ជាក់របស់ប្រមុខរាជរដ្ឋាភិបាលកម្ពុជា ព្រឹត្តិការប្រកួតកីឡាស៊ីហ្គេម និងអាស៊ានប៉ារ៉ាហ្គេម នឹងបើកឱ្យសាធារណជនជាតិ និងអន្តរជាតិទស្សនាដោយសេរី និងមិនបង់ប្រាក់ឡើយ ៕
