ភ្នំពេញ – ក្នុងចំណោមប្រទេសចំនួន១៩៣ នៃសមាជិកអង្គការសហប្រជាជាតិ កម្ពុជាស្ថិតក្នុងចំណាត់ថ្នាក់លេខ១២៧ ពោលគឺមានសន្ទស្សន៍កើនឡើង ៣១លេខ ដែលជាចំណាត់ថ្នាក់នៃការអភិវឌ្ឍរដ្ឋាភិបាលឌីជីថលក្នុងពិភពលោក គិតចាប់ពីឆ្នាំ២០១៦ ដល់ឆ្នាំ២០២២ ។ នេះបើតាមការលើកឡើងរបស់លោក ជូវ៉ាង ជូ តំណាងនាយកដ្ឋានកិច្ចការសេដ្ឋកិច្ចនិងសង្គមរបស់អង្គការសហប្រជាជាតិ (UNDESA) នាពិធីបើកសិក្ខាសាលាស្តីពីការកសាងសមត្ថភាពនិងប្រមូលធាតុចូល សម្រាប់រៀបចំក្របខណ្ឌអភិបាលកិច្ចទិន្នន័យជាតិ កាលពីថ្ងៃទី១៦ ខែឧសភាកន្លងទៅ ។

តាមការលើកឡើងរបស់អ្នកជំនាញបានឱ្យដឹងថា ចំណាត់ថ្នាក់សន្ទស្សន៍កើនឡើង ៣១លេខនេះ បានបង្ហាញពីភាពប្រសើរឡើងនៃការអភិវឌ្ឍរដ្ឋាភិបាលឌីជីថលនៅកម្ពុជា និងកំពុងបោះជំហ៊ានទៅមុខយ៉ាងលឿនរហ័ស ។ ទន្ទឹមគ្នានេះដែរ លោក ជូវ៉ាង ជូ តំណាងនាយកដ្ឋានកិច្ចការសេដ្ឋកិច្ច និងសង្គមរបស់អង្គការសហប្រជាជាតិ បានបង្ហាញថា ទិន្នន័យគឺជាស្នូលនៃការអភិវឌ្ឍរដ្ឋាភិបាលឌីជីថល និងជាធនធានដ៏សំខាន់របស់រដ្ឋាភិបាល ហើយការគ្រប់គ្រងប្រកបដោយប្រសិទ្ធភាព គឺមានសារៈសំខាន់សម្រាប់ការសេចក្តីសម្រេចចិត្ត ព្រមទាំងការរៀបចំគោលនយោបាយរបស់រដ្ឋាភិបាល ។

ស្របនឹងការលើកឡើងនេះ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានគណៈកម្មាធិការរដ្ឋាភិបាលឌីជីថល បានលើកឡើងពីសញ្ញាណវិជ្ជមាននៃបច្ចេកវិទ្យាឌីជីថល និងបរិវត្តកម្មឌីជីថលក្នុងការកសាងសេដ្ឋកិច្ចនិងសង្គមកម្ពុជា ។ ឯកឧត្តមរដ្ឋមន្ត្រី មានប្រសាសន៍ថា វិស័យឌីជីថលជាប្រភពនៃកំណើនថ្មី កំពុងជួយជំរុញសេដ្ឋកិច្ច និងចូលរួមលើកកម្ពស់ការប្រកួតប្រជែងកម្ពុជានៅក្នុងតំបន់និងពិភពលោក ដើម្បីប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ ។ 

សូមជម្រាបថា រាជរដ្ឋាភិបាលកម្ពុជា បានដាក់ចេញក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា២០២១-២០៣៥ ជាមួយចក្ខុវិស័យកសាងសេដ្ឋកិច្ច និងសង្គមឌីជីថលរស់រវើក តាមរយៈការរៀបចំមូលដ្ឋានគ្រឹះជំរុញការទទួលយក និងបរិវត្តកម្មឌីជីថលនៅក្នុងគ្រប់តួអង្គសង្គម ទាំងរដ្ឋ ទាំងពលរដ្ឋ និងទាំងធុរជន ដើម្បីជំរុញសម្ទុះកំណើនសេដ្ឋកិច្ចថ្មី និងលើកកម្ពស់សុខុមាលភាពសង្គមតាមគន្លងប្រក្រតីថ្មី ។

ផ្អែកតាមស្ថិតិនៃការអភិវឌ្ឍរដ្ឋាភិបាលឌីជីថលក្នុងពិភពលោក បើប្រៀបធៀបប្រទេសនៅអាស៊ាន មានម៉ាឡេស៊ីនៅចំណាត់ថ្នាក់លេខ៥៣, ប្រទេសថៃចំណាត់ថ្នាក់លេខ ៥៥, ឥណ្ឌូនេស៊ីចំណាត់ថ្នាក់លេខ ៧៧, វៀតណាមចំណាត់ថ្នាក់លេខ ៨៦, ហ្វីលីពីនចំណាត់ថ្នាក់លេខ ៨៩, កម្ពុជាចំណាត់ថ្នាក់លេខ ១២៧, មីយ៉ាន់ម៉ាចំណាត់ថ្នាក់លេខ ១៣៤, ទីម័រចំណាត់ថ្នាក់លេខ ១៤៧, និងឡាវចំណាត់ថ្នាក់លេខ ១៥៩ ។

ស្របគ្នានឹងក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាខាងលើ រាជរដ្ឋាភិបាលបានដាក់ចេញគោលនយោបាយរដ្ឋាភិបាលឌីជីថលកម្ពុជា២០២២-២០៣៥ ជាមួយនឹងយុទ្ធសាស្រ្ត ព្រមទាំងសកម្មភាពអាទិភាព ដើម្បីជំរុញបរិវត្តកម្មឌីជីថលក្នុងការផ្តល់សេវាសាធារណៈ ដោយកំណត់អាទិភាពក្នុងការរៀបចំគោលនយោបាយក្លោដអាទិភាព គោលនយោបាយទិន្នន័យបើកចំហ ច្បាប់ស្តីពីរដ្ឋាភិបាលឌីជីថល និងច្បាប់ស្តីពីកិច្ចការពារទិន្នន័យបុគ្គលជាដើម ។

គួរបញ្ជាក់បន្ថែមដែរថា សិក្ខាសាលាស្តីពី “ការកសាងសមត្ថភាពនិងប្រមូលធាតុចូល សម្រាប់រៀបចំក្របខណ្ឌអភិបាលកិច្ចទិន្នន័យជាតិ” សហការរៀបចំដោយក្រសួងប្រៃសណីយ៍និងទូរគមនាគមន៍ ជាមួយនាយកដ្ឋានកិច្ចការសេដ្ឋកិច្ចនិងសង្គមរបស់អង្គការសហប្រជាជាតិ (UNDESA) និងសម្របសម្រួលដោយអគ្គលេខាធិការដ្ឋាននៃគណៈកម្មាធិការរដ្ឋាភិបាលឌីជីថល ព្រមទាំងមានការចូលរួមពីពីតំណាងស្ថាប័នពាក់ព័ន្ធ និងមន្ត្រីជំនាញទទួលបន្ទុកការងារបរិវត្តកម្មឌីជីថល មកពីក្រសួង ស្ថាប័ន វិស័យឯកជន គ្រឹះស្ថានអប់រំ និអង្គការក្រៅរដ្ឋាភិបាលផងដែរ ៕