ភ្នំពេញ — នៅថ្ងៃទី២២ ឧសភា ឆ្នាំ ២០២៥ អង្គការលំនៅឋានមនុស្សជាតិកម្ពុជាបានប្រារព្ធពិធីបិទបញ្ចប់ព្រឹត្តិការណ៍អ្នកស្ម័គ្រចិត្តដ៏ធំបំផុតប្រចាំឆ្នាំរបស់ខ្លួនដែលមានការចូលរួមពីអ្នកស្ម័គ្រចិត្តអន្តរជាតិពីប្រទេសអូស្ត្រាលីចំនួន១៥០នាក់ និងបានប្រគល់ផ្ទះថ្មីចំនួន១៣ខ្នង ជូនគ្រួសារកម្ពុជានៅខណ្ឌព្រែកព្នៅ រាជធានីភ្នំពេញ។ កម្មវិធីនេះ អាចប្រារព្ធឡើងបានយ៉ាងល្អ ដោយសារតែមានការគាំទ្រពី អង្គការលំនៅឋានមនុស្សជាតិអូស្ត្រាលី អង្គការលំនៅឋានមនុស្សជាតិប្រចាំអាស៊ីប៉ាស៊ីហ្វិក និងអជ្ញាធរមូលដ្ឋានកម្ពុជា។

លោក ផល វ៉ាន់ឌី នាយកប្រចាំប្រទេស នៃអង្គការលំនៅឋានមនុស្សជាតិកម្ពុជា មានប្រសាសន៍ថា អង្គការលំនៅឋានកម្ពុជាពិតជាមានមោទនភាពក្នុងការទទួលសា្វគមន៍អ្នកស្ម័គ្រចិត្តអន្តរជាតិជាង១៥០នាក់ដែលបានធ្វើដំណើរឆ្លងទ្វីបមកសង់ផ្ទះជូនពលរដ្ឋកម្ពុជា។ ក្រុមអ្នកស្ម័គ្រចិត្តបានធ្វើការងារសង់ផ្ទះផ្ទាល់ជាមួយនឹងម្ចាស់ផ្ទះរយៈពេល៤ថ្ងៃពេញ គឺចាប់ពីថ្ងៃទី១៩ ដល់ថ្ងៃទី២២ ឧសភា ២០២៥។ “ថ្ងៃនេះយើងបានប្រារព្ធពិធីប្រគល់ផ្ទះចំនួន១៣ខ្នងគ្រួសារដែលមានតម្រូវការ ហើយផ្ទះទាំងអស់នេះគឺជាក្តីសង្ឃឹម តំណាងឱ្យសុវត្ថិភាព សេចក្តីថ្លៃថ្នូរ និងការចាប់ផ្តើមថ្មីសម្រាប់គ្រួសារទាំង១៣។ យើងក៏ឆ្លៀតឱកាសនេះ ថ្លែងអំណរគុណយ៉ាងជ្រាលជ្រៅចំពោះក្រុមហ៊ុន Grant Thornton អូស្ត្រាលី និងអ្នកស្ម័គ្រចិត្តគ្រប់រូបដែលបានធ្វើដំណើរពីចម្ងាយ ដើម្បីបង្កើតឱ្យមានការផ្លាស់ប្តូរនៅក្នុងសហគមន៍របស់យើង”។

ឯកឧត្តម ប្រាក់ អង្គារ៉ា អគ្គនាយកនៃអគ្គនាយកដ្ឋានលំនៅឋានក្រសួងរៀបចំដែនដី នគរូបនីយកម្មនិងសំណង់បានមានប្រសាសន៍ថា ក្រសួងរៀបចំដែនដី និងអង្គការលំនៅឋានមនុស្សជាតិគឺជាដៃគូសហការគ្នាក្នុងការងារលំនៅឋានជាច្រើនឆ្នាំមកហើយ ដោយមកទល់នឹងពេលនេះ ពួកយើងនៅតែមានការងារធ្វើជាមួយគ្នាយ៉ាងជិតស្និទ្ធដើម្បីអភិវឌ្ឍវិស័យលំនៅឋានក្នុងប្រទេសកម្ពុជា។ ហើយថ្ងៃនេះខ្ញុំពិតជារំភើប និងត្រេកអរនៅពេលឃើញអ្នកស្ម័គ្រចិត្តអូស្ត្រាលីបានមកសង់ផ្ទះជូនពលរដ្ឋខែ្មរ ដែលនេះគឺជាសកម្មភាពដែលមានអត្ថន័យណាស់សម្រាប់គ្រួសារកម្ពុជាព្រោះតាមសាសានារបស់ខ្មែរ ការផ្តល់ជូនផ្ទះគឺជាការធ្វើបុណ្យមួយដ៏ធំធេងណាស់សម្រាប់អ្នក។ ខ្ញុំក៏សូមថ្លែងអំណរគុណយ៉ាងជ្រាលជ្រៅសម្រាប់អ្នកស្ម័គ្រចិត្តអូស្ត្រាលីទាំងអស់។

ម្ចាស់ផ្ទះម្នាក់ក្នុងចំណោមម្ចាស់ផ្ទះថ្មីទាំង១៣ គឺអ្នកស្រី ឡឹម ចាន់ថន បានសម្តែងការដឹងគុណយ៉ាងជ្រាលជ្រៅដល់អង្គការលំនៅឋាន និងដៃគូពាក់ព័ន្ធដែលបានសង់ផ្ទះថ្មីជូនគ្រួសារគាត់។ ជាស្ត្រីមេម៉ាយ មានកូន៥នាក់ក្នុងបន្ទុក ចាន់ថន និយាយបន្ថែមថា គាត់ស្ទើរតែរកពាក្យដើម្បីបង្ហាញពីអារម្មណ៍សប្បាយរីករាយពេលនេះមិនបានទេ ព្រោះ ផ្ទះនេះមានន័យជ្រាលជ្រៅណាស់សម្រាប់គាត់ ជាពិសេសផ្ទះនេះនឹងផ្តល់ឱ្យកូនៗរបស់គាត់នូវកន្លែងរស់នៅប្រកបដោយសុវត្ថិភាព ធន់នឹងទឹកភ្លៀងនៅរដូវវស្សា។ អ្នកស្រីក៏បានរៀបរាប់ពីបទពិសោធន៍ដែលមានអត្ថន័យ នៃការធ្វើការងារជាមួយអ្នកស្ម័គ្រចិត្តសាងសង់ផ្ទះថ្មីរបស់គាត់ ដែលការងារនេះបានបង្កើតទំនាក់ទំនង និងអនុស្សាវរីយ៍ល្អៗ រវាងគាត់និងអ្នកស្ម័គ្រចិត្ត ហើយគាត់អាចមានឱកាសអរគុណចំពោះពួកគេដែលបាន ចូលរួមលើកស្ទួយជីវភាពរបស់គាត់។

រយៈពេលជិតមួយសប្តាហ៍ អ្នកស្ម័គ្រចិត្ដបានធ្វើការយ៉ាងជិតស្និទ្ធជាមួយក្រុមគ្រួសារ ដោយបានចូលរួមតាមរយៈអាហារសាមគ្គី ការផ្លាស់ប្តូរវប្បធម៌ និងការលេងល្បែងប្រជាប្រិយ។ លោក Greg Keith នាយកប្រតិបត្តិនៃក្រុមហ៊ុន Grant Thornton អូស្ត្រាលី មានប្រសាសន៍ថា “ក្រុមហ៊ុន Grant Thornton បានចាប់ដៃគូជាមួយអង្គការលំនៅឋានមនុស្សជាតិ អស់រយៈពេល ១០ ឆ្នាំមកហើយ។ នេះគឺជាគម្រោងទីបីរបស់យើង ហើយជាលើកទីពីររបស់យើង ដែលបានមកសាងសង់នៅក្នុងប្រទេសកម្ពុជា” ។ “គុណតម្លៃនៃក្រុមហ៊ុន Grant Thornton របស់យើងត្រូវបានតំណាងដោយអក្សរកាត់ថា CARE—កិច្ចសហការ ភាពត្រឹមត្រូវ ទំនួលខុសត្រូវ និងឧត្តមភាព។ ហើយការងាររបស់អង្គការលំនៅឋានមនុស្សជាតិ បង្កប់នូវគុណតម្លៃដូចគ្នា មានការគាំពារស្ត្រី ជនងាយរងគ្រោះ និងជួយអ្នកដែលត្រូវការជំនួយ។»

គួររំលឹកផងដែរថា ការប្រគល់ផ្ទះចំនួន១៣ខ្នង ជូនដល់គ្រួសារគោលដៅ គឺជាផ្នែកមួយនៃគម្រោងរបស់ អង្គការលំនៅឋានមនុស្សជាតិកម្ពុជា។ ជាក់ស្តែង ក្នុងឆ្នាំសារពើពន្ធ២០២៥ អង្គការលំនៅឋានកម្ពុជា បានសាងសង់ និងជួសជុលផ្ទះជាង១៥០ខ្នង នៅខេត្តសៀមរាប បាត់ដំបង និងរាជធានីភ្នំពេញ ដែលគម្រោងទាំងនេះបានធ្វើឱ្យជីវភាពរស់នៅរបស់ប្រជាជនកម្ពុជាមានភាពប្រសើរឡើង។ បន្ថែមពីលើការងារអភិវឌ្ឍន៍លំនៅឋាន អង្គការក៏បានគាំទ្រសហគមន៍តាមរយៈ កម្មវីធីអភិវឌ្ឍ WASH (ទឹក និងអនាម័យ) និងកម្មវិធីបង្កើនភាពធន់សហគមន៍ទៅនឹងការប្រែប្រួលអាកាសធាតុ និង ការសហការយ៉ាងជិតស្និទ្ធជាមួយរាជរដ្ឋាភិបាល និងអង្គការដៃគូ ដើម្បីលើកកម្ពស់លំនៅឋានដែលមានតម្លៃសមរម្យ និងការគាំពារមតិសម្រាប់សិទ្ធិកាន់កាប់ដីធ្លីផងដែរ។

ជារៀងរាល់ឆ្នាំ អង្គការលំនៅឋានកម្ពុជា ទទួលស្វាគមន៍អ្នកស្ម័គ្រចិត្តប្រមាណ ១០០០នាក់ ទាំងជាតិ និងអន្តរជាតិ ដើម្បីធ្វើការរួមគ្នាសាងសង់ផ្ទះដោយផ្តល់ក្តីសង្ឃឹមជូនពលរដ្ឋកម្ពុជា។ ហើយកម្មវីធីថ្ងៃនេះគឺជាសក្ខីភាពនៃភាពជាដៃគូដ៏សំខាន់ក្នុងការចូលរួមរបស់ក្រុមហ៊ុនឯកជនក្នុងការផ្លាស់ប្តូរជាវិជ្ជមានយូរអង្វែង។

សម្រាប់ព័ត៌មានបន្ថែម ឬរៀបចំការសម្ភាសន៍ សូមទាក់ទងលោក អ៊ុំ វណ្ណៈ oum_vannak@habitatcambodia.org
សូមចូលទៅកាន់គេហទំព័ររបស់យើង៖
https://habitatcambodia.org/en/