កូរ៉េខាងត្បូង – ម្ចាស់មេដាយមាសស៊ីហ្គេមលើកទី៣២ ផ្នែកកីឡាប៊ីយ៉ាការ៉ុម កីឡាការិនី ស្រួង ភាវី បានប្រកួតឈ្នះពាន PBA-LPBA Championship ២០២៣ កំពុងធ្វើឱ្យមហាជននៅប្រទេសកូរ៉េខាងត្បូង និងនៅកម្ពុជាសាទរយ៉ាងខ្លាំងចំពោះជ័យជម្នះនេះ ។ ភ្លាមៗបន្ទាប់ពីប្រកួតឈ្នះកីឡាការិនីកូរ៉េខាងត្បូង Hyun-ji YONG នៅវគ្គផ្ដាច់ព្រ័ត្រ អ្នកស្រី ស្រួង ភាវី បានបង្ហោះសារលើបណ្តាញសង្គមថា ជ័យជម្នះមួយនេះជានិមិត្តរូបដ៏អស្ចារ្យសម្រាប់ប្រជាជនកម្ពុជា ។

កីឡាការិនី ស្រួង ភាវី បានសរសេរសារបង្ហាញពីភាពរីករាយរបស់ខ្លួនថា  ៖

“ភារីទទួលជ័យជម្នះ និងនាំយកមោទនភាពជូនប្រជាជនកម្ពុជាលើទឹកដីកូរ៉េម្ដងទៀតហើយ ! បើយើងខ្លាំង ធ្វើឱ្យកម្ពុជាខ្លាំង, បើយើងខ្លាំងប្រជាជនយើងក៏ខ្លាំង , បើយើងជាមនុស្សអស្ចារ្យ យើងក៏ធ្វើឱ្យកម្ពុជាអស្ចារ្យ, យើងនឹងជានិមិត្តរូបដ៏អស្ចារ្យសម្រាប់ប្រជាជនកម្ពុជា”

ទន្ទឹមគ្នានេះ កីឡាការិនី ស្រួង ភាវី ក៏បានបង្ហាញពីការយល់ឃើញរបស់ខ្លួនដែរថា ប្រជាជនកូរ៉េខាងត្បូងបានចូលរួមលើកទឹកចិត្ត គោរព ស្រឡាញ់ និងគាំទ្រយ៉ាងខ្លាំងចំពោះការលេងកីឡារបស់អ្នកស្រី ។ តាមរយៈជ័យជម្នះលើកនេះ អ្នកស្រីបានលើកទង់ជាតិកម្ពុជានៅលើទឹកដីកូរ៉េខាងត្បូង ។ ជាមួយគ្នានេះ អ្នកស្រី ភាវី ក៏បានថ្លែងអំណរគុណដល់ប្រជាជនកូរ៉េ ព្រមទាំងលើកទឹកចិត្តឱ្យយុវជនកម្ពុជាត្រូវនាំគ្នាជ្រោងទង់ជាតិកម្ពុជាឡើង ដើម្បីបញ្ជាក់ថា កម្ពុជាយើងអស្ចារ្យ ! កុំនាំគ្នា ជ្រោងដបស្រា ព្រោះបញ្ជាក់ថា កម្ពុជាយើងអន់ថយ ។

សូមជម្រាបថា បច្ចុប្បន្នកីឡាការិនី ស្រួង ភាវី មានអាយុ ៣៤ឆ្នាំ ជាស្ត្រីឆ្នើមកម្ពុជាដែលលេងកីឡាប៊ីយ៉ាការ៉ុមយ៉ាងស្ទាត់ជំនាញ ជាប់ចំណាត់ថ្នាក់លេខ១ នៅប្រទេសកូរ៉េខាងត្បូង និងជាកីឡាការិនីជាប់ចំណាត់ថ្នាក់លេខ២ របស់ពិភពលោក ។ កីឡាការិនី ស្រួង ភាវី មានទឹកដីកំណើតនៅខេត្តត្បូងឃ្មុំ និងបានទៅរស់នៅប្រទេសកូរ៉េខាងត្បូងជាមួយនឹងស្វាមីជនជាតិកូរ៉េ ។ កីឡាការិនី ស្រួង ភាវី បានហាត់លេងកីឡាប៊ីយ៉ាការ៉ុមចាប់តាំងពីឆ្នាំ២០១៤ ព្រមទាំងបានសាងកេរ្តិ៍ឈ្មោះល្បាញល្បីលើប្រភេទកីឡានេះចេញពីទឹកដីកូរ៉េខាងត្បូងទៅកាន់ពិភពលោក ៕