ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងការងារ និងបណ្តុះបណ្តាលវិជ្ជាជីវៈ កាលពីពេលថ្មីៗនេះ បានប្រកាសទៅដល់សហគ្រាសផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប ព្រមទាំងសហគ្រាសផ្នែកផ្សេងៗទៀត ពីការប្រឡងប្រណាំងដើម្បីទទួលបានពានរង្វាន់ ” សហគ្រាសមួយជាសហគមន៍សុខសាន្តមួយ ” ។
ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា យុទ្ធនាការប្រឡងប្រណាំង “សហគ្រាសមួយជាសហគមន៍សុខសាន្តមួយ” ត្រូវបង្កើតឡើងដើម្បីលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈ សំដៅបង្កើតនូវវប្បធម៌អនុលោមភាពតាមច្បាប់ ពង្រឹងប្រសិទ្ធភាពនៃយន្តការដោះស្រាយវិវាទការងារក្រៅប្រព័ន្ធតុលាការ ពង្រឹងការអនុវត្តរបបសន្តិសុខសង្គម និងបង្កើតផលិតភាពការងារ។
សម្រាប់លក្ខខណ្ឌវិនិច្ឆ័យក្នុងការទទួលបានពានរង្វាន់ “សហគ្រាសមួយជាសហគមន៍សុខសាន្តមួយ” គឺគេនឹងត្រូវមើលទៅលើការអនុវត្តចំនួន ៨ចំណុច រួមមាន៖ ទី១. មានលក្ខខណ្ឌការងារល្អ សំដៅដល់សហគ្រាស ដែលទទួលបានវិញ្ញាបនបត្របញ្ជាក់អនុលោមភាព លក្ខខណ្ឌការងារពីក្រសួងការងារ និងបណ្តុះបណ្តាលវិជ្ជាជីវៈ ។ ទី២.មិនមានការប្រើប្រាស់ទម្រង់ធ្ងន់ធ្ងរបំផុត នៃពលកម្មកុមារ ។ ទី៣.មានទំនាក់ទំនងវិជ្ជាជីវៈល្អ សំដៅដល់សហគ្រាស ដែលមានយន្តការដោះស្រាយវិវាទការងារនៅ ថ្នាក់សហគ្រាស និងមានយន្តការកិច្ចសន្ទនាសង្គម ។
ទី៤. មានសុវត្ថិភាពនិងសុខភាពការងារ សំដៅដល់សហគ្រាស ដែលមិនមានគ្រោះថ្នាក់ការងារ និង មានស្នាដៃក្នុងការងារប្រយុទ្ធនឹងជំងឺអេដស៍និងគ្រឿងញៀននៅកន្លែងការងារ។ ទី៥. មានអនុលោមភាពរបបសន្តិសុខសង្គម សំដៅដល់សហគ្រាស ដែលអនុវត្តល្អនូវកាតព្វកិច្ចស្រប តាមច្បាប់ស្តីពីរបបសន្តិសុខសង្គម។ ទី៦. មានគោលការណ៍ជំរុញការប្រើប្រាស់កម្មករនិយោជិតមានពិការភាព សំដៅដល់សហគ្រាស ដែល ប្រើប្រាស់កម្មករនិយោជិតមានពិការភាពលើសពី ៣ ភាគរយ នៃចំនួនកម្មករនិយោជិតសរុប។ ទី៧.មានកម្មវិធីលើកកម្ពស់ផលិតភាពការងារ សំដៅដល់សហគ្រាស ដែលអនុវត្តកម្មវិធីបណ្តុះបណ្តាល ជំនាញនិងលើកកម្ពស់សមត្ថភាពរបស់កម្មករនិយោជិត និងទី៨. មានកម្មវិធីទទួលខុសត្រូវសង្គម សំដៅដល់សហគ្រាស ដែលចូលរួមគាំទ្រក្នុងដំណើរការទារកដ្ឋាន និងមត្តេយ្យសហគមន៍ មានកម្មវិធីការងារបៃតង និងលើកទឹកចិត្តមិនប្រើប្រាស់ថង់ប្លាស្ទិក ព្រមទាំង ចូលរួមការងារសង្គមផ្សេងៗ។
សហគ្រាសដែលទទួលបានជ័យលាភីក្នុងការប្រឡងប្រណាំង “សហគ្រាសមួយជាសហគមន៍សុខសាន្តមួយ” នឹងត្រូវទទួលបានការលើកទឹកចិត្តដូចជា ៖ ពានរង្វាន់ ដែលមាន៣កម្រិត, វិញ្ញាបនបត្រ និងការលើកលែងការចុះអធិការកិច្ចសាមញ្ញក្នុងរយៈពេលចាប់ពី១ឆ្នាំ ដល់៣ឆ្នាំ ស្របតាមកម្រិត នៃពានរង្វាន់ ដែលទទួលបាន៕
