បន្ទាប់ពីឆ្លងកាត់វគ្គជម្រុះដោយសម្ភាសន៍ កាលពីថ្ងៃទី៣០ ខែធ្នូ ឆ្នាំ​២០២៣ កម្មវិធីជើងឯកថ្វីមាត់ រដូវកាលទី២ បានរកឃើញបេក្ខជនឆ្នើមចំនួន ២០នាក់ ដែលនឹងឆ្ពោះទៅកាន់វគ្គប្រកួតជម្រុះជុំទី១ នាពេលខាងមុខ។

នៅថ្ងៃទី៦ ខែមករា ឆ្នាំ២០២៤ បេក្ខជនឆ្នើម ដែលជាប់វគ្គជម្រុះដោយសម្ភាសន៍ទាំងអស់ នឹងត្រូវចូលរួមវគ្គបណ្ដុះបណ្ដាលលើជំនាញនិយាយជាសាធារណៈ ដើម្បីពង្រឹងសមត្ថភាព ឆ្ពោះទៅកាន់វគ្គប្រកួតជម្រុះជុំទី១ នៅថ្ងៃទី៤ ខែកុម្ភៈ ឆ្នាំ២០២៤។

លោក ស៊ុយ លីនប៉ាវ ប្រធានគម្រោងតោះ! ជជែក (Let’s Talk) មានប្រសាសន៍ថា កម្មវិធី «ជើងឯកថ្វីមាត់» គឺជាកម្មវិធីប្រកួតនិយាយជាសាធារណៈ ក្រោមគំនិតផ្ដួចផ្ដើមរបស់សហភាពសហព័ន្ធយុវជនកម្ពុជា រាជធានីភ្នំពេញ ក្នុងគោលបំណង ផ្ដល់ឱកាសឱ្យយុវជនបានបង្ហាញទេពកោសល្យ និងពង្រឹងសមត្ថភាព លើជំនាញនិយាយជាសាធារណៈ ជាពិសេស បណ្ដុះផ្នត់គំនិតសុទិដ្ឋិនិយមចំពោះសង្គមជាតិ។

សម្រាប់រដូវកាលទី២នេះ កម្មវិធី «ជើងឯកថ្វីមាត់» បានផ្តល់ឱកាស​យ៉ាងទូលំទូលាយសម្រាប់យុវជនក្នុងការដាក់ពាក្យចូលរួមប្រកួត ដោយ​កំណត់អាយុពី ១៥ឆ្នាំ រហូត​ដល់​២៥ឆ្នាំ ខណៈនៅរដូវកាលទី១ កំណត់ពី១៨ឆ្នាំ ដល់​២៥ឆ្នាំ។ បើតាមលោក លីនប៉ាវ ក្រោយពីប្រកាសឱ្យ​ដាក់ពាក្យ​ក្នុង​ការ​ចូលរួមប្រកួត មានបេក្ខជនមកពីគ្រប់មជ្ឈដ្ឋានបានដាក់ពាក្យ ចាប់ពីសិស្សថ្នាក់វិទ្យាល័យ រហូត​ដល់បុគ្គលិកក្រុមហ៊ុន​ ហើយ​ជាលទ្ធផលក្រុមការងារបានរកឃើញបេក្ខជនចំនួន ៤៥នាក់បានជាប់ក្នុងវគ្គជម្រុះដោយសំណេរ និងបន្ទាប់មកទៀត ក្រោយធ្វើការ​សម្ភាសន៍ បានរកឃើញ​បេក្ខជនឆ្នើម​ចំនួន២០នាក់ ដែលនឹងត្រូវទទួលការបណ្តុះបណ្តាល មុនទៅ​កាន់វគ្គជម្រុះជុំទី១ ដែលគ្រោងធ្វើឡើងនៅដើមខែកុម្ភៈ ខាងមុខ។

យ៉ាងណាក៏ដោយ នៅថ្ងៃទី៦ ខែមករា ឆ្នាំ២០២៣​ខាងមុខនេះ បេក្ខជនទាំង២០នាក់ ដែលជាប់ក្នុងវគ្គសម្ភាសន៍ នឹង​ត្រូវ​ធ្វើការបណ្តុះបណ្តាលពីអ្នកជំនាញ អំពី ការសិក្សាស្រាវជ្រាវ ការរៀបចំខ្លឹមសារ ពិសេស សិល្បៈនៃការនិយាយជាសាធារណៈ ប្រកបដោយភាពទាក់ទាញជាដើម។

គួរបញ្ជាក់ផងដែរថា កម្មវិធី ជើងឯកថ្វីមាត់ មានការប្រកួតជម្រុះ ៣ដំណាក់កាល ក្នុងនោះនៅថ្ងៃទី 4 ខែកុម្ភៈ ឆ្នាំ2024 ជា វគ្គប្រកួតជម្រុះជុំទី១, ថ្ងៃទី 3 ខែមីនា ឆ្នាំ2024 ជា វគ្គពាក់កណ្តាលផ្តាច់ព្រ័ត្រ និងថ្ងៃទី 31 ខែមីនា ឆ្នាំ2024 គឺជា វគ្គផ្តាច់ព្រ័ត្រ៕