ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបជាមួយក្រុមនិស្សិតជ័យលាភីអាហារូបករណ៍ MOFCOM ដែលនឹងទៅបន្តការសិក្សាថ្នាក់ក្រោយឧត្តមនៅសាធារណរដ្ឋប្រជាមានិតចិន ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានប្រាប់ទៅដល់និស្សិតទាំង២៤រូប ត្រូវចាប់យកជំនាញឱ្យបានច្បាស់លាស់ និងផ្តោតការយកចិត្តទុកដាក់លើការសិក្សារៀនសូត្រ ពិសេសការស្រាវជ្រាវ ដើម្បីទទួលបានជោគជ័យក្នុងការសិក្សាដោយមានចំណេះ និងជំនាញ ក្លាយជាធនធានមនុស្សដ៏មានតម្លៃក្នុងគោលដៅចូលរួមអភិវឌ្ឍសង្គមជាតិនៅពេលត្រឡប់មកមាតុភូមិវិញ។
ក្នុងជំនួបផ្តល់អនុសាសន៍មុនចេញដំណើរ ដែលធ្វើឡើងកាលពីសៀលថ្ងៃទី១១ ខែសីហា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ចូលរួមអបអរសាទរ និងកោតសរសើរចំពោះនិស្សិតជ័យលាភីទាំងអស់ ដែលទទួលបានអាហារូបករណ៍ទៅបន្តការសិក្សាថ្នាក់បរិញ្ញាបត្រជាន់ខ្ពស់ និងបណ្ឌិត នៅសាធារណរដ្ឋប្រជាមានិតចិន ដែលសុទ្ធសឹងតែជាសាកលវិទ្យាល័យល្បីៗ និងមានកិត្យានុភាពខ្ពស់។ ក្នុងន័យនេះ ឯកឧត្តមស្នើដល់និស្សិតជ័យលាភីទាំងអស់ត្រៀមលក្ខណៈឱ្យបានល្អប្រសើរ ដោយត្រូវចាប់យកជំនាញឱ្យបានច្បាស់លាស់ និងផ្តោតការយកចិត្តទុកដាក់លើការសិក្សារៀនសូត្រ ជាពិសេសលើការសិក្សាស្រាវជ្រាវ ក៏ដូចជាពង្រឹងភាសាបរទេសរបស់ខ្លួន ធ្វើការផ្សារភ្ជាប់ចំណេះដឹងទ្រឹស្តីជាមួយនឹងការអនុវត្តជាក់ស្ដែងឱ្យបានច្រើន។
ជាមួយគ្នាឯកឧត្តមរដ្ឋមន្រ្តី ក៏ផ្តាំផ្ញើដល់និស្សិតទាំងអស់យកចិត្តទុកដាក់លើសុខភាពផ្ទាល់ខ្លួន ដោយសុខភាពល្អគឺជាកត្តាចម្បងមួយក្នុងការសិក្សាឱ្យទទួលបានភាពជោគជ័យ ព្រមទាំងលើកទឹកចិត្តឱ្យនិស្សិត ត្រូវចេះសម្របខ្លួនទៅនឹងបរិស្ថានថ្មី ទាំងអាកាសធាតុ ម្ហូបអាហារ និងរបៀបរស់នៅរបស់ប្រជាជនចិន ជាពិសេសត្រូវឆ្លៀតពេលសិក្សាស្វែងយល់ពីវប្បធម៌ និងប្រពៃណីរបស់សាធារណរដ្ឋប្រជាមានិតចិន ក៏ដូចជាចូលរួមផ្សព្វផ្សាយនូវវប្បធម៌ដ៏ផូរផង់របស់ប្រទេសកម្ពុជា ដើម្បីបង្កើនចំណេះដឹងទូទៅ និងពង្រឹងទំនាក់ទំនងរវាងប្រជាជាតិទាំងពីរឱ្យកាន់តែរឹងមាំថែមមួយកម្រិតទៀត។
កម្មវិធីអាហារូបករណ៍ MOFCOM គឺជាកម្មវិធីអាហារូបករណ៍ថ្នាក់ជាតិកម្រិតខ្ពស់ និងជាផ្នែកមួយនៃជំនួយអភិវឌ្ឍន៍របស់រដ្ឋាភិបាលចិន ដែលបានផ្តល់ឱកាសដល់យុវជនកម្ពុជាដែលជាមន្ត្រីរាជការ និងបុគ្គលិកក្នុងវិស័យឯកជនបានទៅបន្តការសិក្សា ដើម្បីបង្កើននិងពង្រឹងចំណេះដឹង ជំនាញវិជ្ជាជីវៈ និងសមត្ថភាពការងារនៅក្នុងស្ថាប័នឱ្យកាន់តែមានប្រសិទ្ធភាពសម្រាប់ជាប្រយោជន៍ដល់ការអភិវឌ្ឍសង្គមនិងសេដ្ឋកិច្ចកម្ពុជានាពេលអនាគត។ ដោយឡែកជំនាញដែលនិស្សិតជ័យលាភីអាហារូបករណ៍ MOFCOM នឹងទៅបន្តការសិក្សារួមមាន គោលនយោបាយសាធារណៈ, សារព័ត៌មាន និងទំនាក់ទំនង, ឧតុនិយម, ការគ្រប់គ្រងបរិស្ថាន និងការអភិវឌ្ឍប្រកបដោយចីរភាព, រដ្ឋបាល, ការដឹកជញ្ជូន, សេដ្ឋកិច្ច និងគោលនយោបាយព្រៃឈើ និងជំនាញជាច្រើនទៀត៕
