រដ្ឋបាលលោក ដូ ណាល់ត្រាំ បានដកហូតទិដ្ឋាការរបស់និស្សិតរាប់រយនាក់ស្ទើរតែទូទាំងសហរដ្ឋអាមេរិក ដែលសកម្មភាពនេះ ជាផ្នែកមួយនៃការ​បង្រ្កាប​ជន​អន្តោប្រវេសន៍​ទ្រង់ទ្រាយធំ។

និស្សិតអន្តរជាតិជាង ១ពាន់នាក់ និងនិស្សិតបញ្ចប់ការសិក្សាថ្មីៗនៅសាកលវិទ្យាល័យជាង ១៣០ នៅសហរដ្ឋអាមេរិក ត្រូវបានដកហូតទិដ្ឋាការ ឬដកហូតសិទ្ធិជាសិស្ស ឬសិទ្ធិផ្លាស់ប្ដូរការសិក្សា នៅក្នុងប្រព័ន្ធព័ត៌មាននិស្សិតក្នុងឆ្នាំនេះ, នេះបើយោងតាមអ្នកនាំពាក្យ និងសេចក្ដីថ្លែងការណ៍របស់សាកលវិទ្យាល័យ។

មហាវិទ្យាល័យ និងសាកលវិទ្យាល័យក្នុងរដ្ឋចំនួន ៤០ បានបញ្ជាក់ពីការបញ្ចប់ទិដ្ឋាការ និងបញ្ចប់សុពលភាពជានិស្សិតរបស់សិស្សពួកគេ ទៅកាន់សារព័ត៌មាន CNN ។

អ្នកនាំពាក្យសាកលវិទ្យាល័យ Middle Tennessee State លោក Jimmy Hart បានបញ្ជាក់ថា នៅសាកលវិទ្យាល័យរបស់លោក មាន​និស្សិត ៦នាក់មកពីបណ្ដាប្រទេសក្នុងតំបន់អាស៊ី អឺរ៉ុប និង​មជ្ឈិមបូព៌ា ត្រូវបានដកហូតទិដ្ឋាការ។ លោក​បន្តថា សាកលវិទ្យាល័យ មិនទាន់ដឹងពីមូលហេតុជាក់លាក់ទាក់ទងនឹងការផ្លាស់ប្ដូរស្ថានភាពទិដ្ឋាការនេះទេ គ្រាន់តែដឹងថា និស្សិតទាំងនោះ ត្រូវបានផ្លាស់ប្ដូរនៅក្នុងមូលដ្ឋានទិន្នន័យសហព័ន្ធ ដែលត្រួតពិនិត្យ និងគ្រប់គ្រងពួកគេ។

សេចក្ដីថ្លែងការណ៍របស់សាកលវិទ្យាល័យជាច្រើនបានបញ្ជាក់ថា រដ្ឋាភិបាលមិនបានផ្ដល់ហេតុផលសម្រាប់ការចាត់វិធានការនេះឡើយ។ ក្នុងករណីភាគច្រើន សាកលវិទ្យាល័យបានរកឃើញថា និស្សិតត្រូវបានដកហូតទិដ្ឋាការ តាមរយៈការពិនិត្យ​មើល​ក្នុងប្រព័ន្ធគ្រប់គ្រងឈ្មោះរបស់ពួកគេ។ មានតែសាកលវិទ្យាល័យមួយចំនួនប៉ុណ្ណោះ ដែលបញ្ជាក់ថា ពួកគេដឹងពីមូលហេតុដែលទិដ្ឋាការរបស់សិស្ស​ពួកគេ​ត្រូវ​បាន​បិទ។

មូលហេតុ ដែលសាកលវិទ្យាល័យ ជាច្រើននៅសហរដ្ឋអាមេរិកបានបញ្ជាក់នោះ គឺ​ទាក់ទងនឹង ការចោទ​ប្រកាន់​ពីការប្រព្រឹត្តបទឧក្រិដ្ឋ ការគាំទ្រអង្គភាពភារវកម្ម និងការរំលោភលើលក្ខខណ្ឌនៃកម្មវិធីទិដ្ឋាការ។

យ៉ាងណាក៏ដោយ មកទល់នឹងពេលនេះ មិនទាន់មានការបញ្ជាក់ជាក់លាក់ទេថា និស្សិតទាំងអស់ដែលទិដ្ឋាការត្រូវបានបញ្ចប់នោះ នឹងចាកចេញពីសហរដ្ឋអាមេរិកជាបន្ទាន់ ឬអាចស្នាក់នៅ ដើម្បីបន្តការសិក្សារបស់គេបាន។

មន្ត្រីសហព័ន្ធមិនបានបញ្ជាក់ពីមូលហេតុ ដែលទិដ្ឋាការរបស់និស្សិតជាច្រើនត្រូវបានដកហូតឡើយ ប៉ុន្តែរដ្ឋលេខាធិការសហព័ន្ធ លោក Marco Rubio បាននិយាយម្តងហើយម្តងទៀត​ថា អាកប្បកិរិយាមួយចំនួន រួមទាំងការចូលរួមក្នុងការតវ៉ាផ្សេងៗ នឹងមិនត្រូវបានអត់ឱនឡើយ៕