នៅពេលដែលគិតដល់សាកលវិទ្យាល័យកំពូលៗលំដាប់ពិភពលោក សិស្សនិស្សិត និងបញ្ញាវន្ត តែងតែនឹកដល់ សាកលវិទ្យាល័យដែលមានវ័យចំណាស់ និងមានកេរ្តិ៍ឈ្មោះល្បីល្បាញច្រើនសតវត្សរ៍ដូចជា Oxford, Cambridge, Harvard និង Princeton ជាដើម។ ប៉ុន្តែបច្ចុប្បន្ន មានគ្រឹះស្ថានឧត្តមសិក្សាថ្មីៗជាច្រើនទៀត ដែលកំពុងតែកសាងកេរ្តិ៍ឈ្មោះ និងគុណភាពអប់រំរបស់ខ្លួននៅលើឆាកអន្តរជាតិ។

ស្ថាប័ន Times Higher Education បានបង្ហាញពីសាកលវិទ្យាល័យចំនួន ៥ មានអាយុតិចជាង ៥០ឆ្នាំ ដែលល្អបំផុតលើពិភពលោក បន្ទាប់ពីបានវាយតម្លៃទៅលើ វិធីសាស្ត្របង្រៀន ការស្រាវជ្រាវ ទស្សនវិស័យអន្តរជាតិ និងសកម្មភាពការងាររបស់សាលាជាមួយឧស្សាហកម្ម។

១. Nanyang Technological University, ប្រទេសសិង្ហបុរី ៖Nanyang Technological University ជាសាកលវិទ្យាល័យមួយក្នុងចំណោមសាកលវិទ្យាល័យនៅអាស៊ី ដែលមានចំណាត់ថ្នាក់ខ្ពស់បំផុតនៅក្នុងចំណាត់ថ្នាក់សាកលវិទ្យាល័យពិភពលោក។ សាកលវិទ្យាល័យនេះត្រូវបានបង្កើតឡើងក្នុងឆ្នាំ១៩៩១ មានស្នាក់ការកណ្ដាលក្នុងតំបន់ Jurong និងមានសាខាមួយទៀតនៅតំបន់ Novena ដែលជាតំបន់វេជ្ជសាស្ត្ររបស់សិង្ហបុរី។

សាកលវិទ្យាល័យមាននិស្សិតចំនួន ២៥,០០០ នាក់មកពីជាង ១០០ប្រទេស ។ NTU ក៏មានទំនាក់ទំនងល្អជាមួយស្ថាប័នអប់រំជាច្រើននៅទូទាំងពិភពលោក រួមទាំងមហាវិទ្យាល័យ Imperial College London សាកលវិទ្យាល័យ Stanford និងសាកលវិទ្យាល័យ Peking ជាដើម។

២. The Hong Kong University of Science and Technology, ទីក្រុងហុងកុង ៖ HKUST ត្រូវបានគេស្គាល់ថា ជាសាកលវិទ្យាល័យលំដាប់កំពូលមួយរបស់ហុងកុង ដែលស្ថិតក្នុងចំណោមសាកលវិទ្យាកំពូលទាំង១០០របស់ពិភពលោក ។ HKUST ផ្ដោតជាចម្បងក្នុងការផ្ដល់ការអប់រំ ដែលមានគុណភាពខ្ពស់ដល់និស្សិតក្នុងផ្នែកវិទ្យសាស្ត្រ និងបច្ចេកវិទ្យា។

សាកលវិទ្យាល័យនេះ ត្រូវបានបង្កើតឡើងនៅឆ្នាំ ១៩៩១ ហើយឆ្នាំ ២០២២ សាកលវិទ្យាល័យបានបង្កើតគម្រោងមួយ ដែលមានឈ្មោះថា  HKUST 2.០ ដែលផ្ដោតលើការអភិវឌ្ឍសម្រាប់អនាគត។ ផែនការនេះរួមបញ្ចូល ការបើកសាខាថ្មីនៅទីក្រុងក្វាងចូវ និងវិធីសាស្ត្រដែលធ្វើយ៉ាងណាឱ្យសាខាសាកលវិទ្យាល័យទាំងពីរអាចធ្វើការរួមគ្នាដើម្បីកែលម្អការបង្រៀន និងការរៀនឱ្យកាន់តែប្រសើរឡើង។

៣. Paris Sciences et Lettres – PSL Research University Paris, ប្រទេសបារាំង ៖ PSL បានធ្លាក់ពីចំណាត់ថ្នាក់លេខ១ មកលេខ៣ ក្នុងឆ្នាំ ២០២៣។ សាកលវិទ្យាល័យនេះបង្កើតឡើងនៅឆ្នាំ២០១០ ក្នុងគោលបំណងក្លាយជាសាកលវិទ្យាល័យស្រាវជ្រាវឈានមុខគេមួយរបស់ពិភពលោក។ ដើមឡើយ សាលាត្រូវបានបង្កើតឡើងដោយមានស្ថាប័នស្រាវជ្រាវចំនួន ៥ ប៉ុន្តែបច្ចុប្បន្នបានបញ្ចូលស្ថាប័នសិក្សា និងស្រាវជ្រាវដែលមានរហូតដល់ ២៥។

PSL មានទីតាំងស្ថិតក្នុងតំបន់ Latin Quarter នៃទីក្រុងប៉ារីស។ សាកលវិទ្យាល័យនេះមានគោលបំណងជំរុញលទ្ធផលស្រាវជ្រាវក្នុងប្រទេសបារាំងឱ្យកាន់តែផុសផុល និងបានបង្កើតភាពជាដៃគូយុទ្ធសាស្ត្រជាមួយសាកលវិទ្យាល័យ New York, សាកលវិទ្យាល័យ Cambridge, សាកលវិទ្យាល័យ Tsinghua, វិទ្យាស្ថាន Technion Israel Institute of Technology និងគ្រឹះស្ថានអប់រំល្បីៗជាច្រើនទៀត។

៤. Hong Kong Polytechnic University, ទីក្រុងហុងកុង ៖ HKPU ត្រូវបានបង្កើតឡើងក្នុងឆ្នាំ១៩៣៧ ហើយត្រូវបានផ្តល់ឋានៈជាសាកលវិទ្យាល័យផ្លូវការនៅក្នុងឆ្នាំ ១៩៩៤។ សាកលវិទ្យាល័យនេះត្រូវបានបង្កើតឡើងដោយមានមហាវិទ្យាល័យចំនួនប្រាំបីដូចជា ៖ មហាវិទ្យាល័យមនុស្សសាស្ត្រ, វិទ្យាសាស្ត្រអនុវត្ត និងវាយនភណ្ឌ, អាជីវកម្ម, សំណង់ និងបរិស្ថាន, ការរចនា, វិស្វកម្ម, សុខភាព និងវិទ្យាសាស្ត្រសង្គម, ការគ្រប់គ្រងសណ្ឋាគារ និងទេសចរណ៍។ សាកលវិទ្យាល័យបានចាប់ដៃគូជាមួយស្ថាប័នជាង ២៤០ ជុំវិញពិភពលោក ដើម្បីជួយសម្រួលដល់កម្មវិធីផ្លាស់ប្តូរការសិក្សារបស់និស្សិត។

៥. Erasmus University Rotterdam, ប្រទេសហូឡង់ ៖ EUR គឺជាសាកលវិទ្យាល័យស្រាវជ្រាវសាធារណៈនៃទីក្រុង Rotterdam ប្រទេសហូឡង់។ នៅក្នុងសាកលវិទ្យាល័យនេះ មានវិទ្យាស្ថានចំនួនពីរ មហាវិទ្យាល័យមួយ និងសាលាចំនួនប្រាំពីរ ដែលផ្ដោតលើជំនាញជាច្រើនដូចជា៖ សេដ្ឋកិច្ច, ច្បាប់, វិទ្យាសាស្ត្រសង្គម និងអាកប្បកិរិយា, ប្រវត្តិសាស្រ្ត, វប្បធម៌ និងទំនាក់ទំនង, គោលនយោបាយ និងការគ្រប់គ្រងសុខភាព, ទស្សនវិជ្ជា និងការគ្រប់គ្រង។

សាកលវិទ្យាល័យនេះត្រូវបានបំបែកនៅទូទាំងប្រាំកន្លែងផ្សេងគ្នា រួមមាន Campus Woudestein, Erasmus MC, មហាវិទ្យាល័យ Erasmus University, មជ្ឈមណ្ឌល Erasmus សម្រាប់សហគ្រិនភាព និងវិទ្យាស្ថានអន្តរជាតិនៃការសិក្សាសង្គម៕