យោងតាមរបាយការណ៍សន្ទស្សន៍ការងារពីចម្ងាយឆ្នាំ២០២៣ (Global Remote Work Index 2023) បានចាត់ចំណាត់ថ្នាក់ប្រទេសចំនួន ១០៨ ដែលកំពុងពេញនិយមលើការបំពេញការងារពីចម្ងាយ។ ការចាត់ចំណាត់ថ្នាក់នេះ គឺផ្ដោតលើចំណុចសំខាន់ៗចំនួនបួនដូចជា សុវត្ថិភាពអ៊ីនធឺណិត សេដ្ឋកិច្ច ហេដ្ឋារចនាសម្ព័ន្ធ និងសុវត្ថិភាពសង្គម ដែលសុវត្ថិភាពនោះរួមបញ្ចូលទាំង សុវត្ថិភាពពីឧក្រិដ្ឋកម្ម និងការទទួលបានសិទ្ធិពេញលេញរបស់ប្រជាជន (access to human right)។

របាយការណ៍នេះ បោះពុម្ពផ្សាយដោយ អង្គការសន្តិសុខ NordLayer ដោយផ្អែកលើទិន្នន័យ ដែលអាចទុកចិត្តបាន និងមានការទទួលស្គាល់ដូចជា អង្គការសហប្រជាជាតិ និងវេទិកាសេដ្ឋកិច្ចពិភពលោក (WE Forum)។

អឺរ៉ុបនាំមុខគេក្នុងការបំពេញការងារពីចម្ងាយ

ប្រទេសនៅអឺរ៉ុបខាងជើងទទួលបានចំណាត់ថ្នាក់នាំមុខគេនៅលើតារាង Global Remote Work Index 2023 នៅក្នុងនោះមានប្រទេសចំនួន ១០ ដូចជា ដាណឺម៉ាក ហូឡង់ អាល្លឺម៉ង់ អេស្ប៉ាញ ស៊ុយអែត ព័រទុយហ្គាល់ អេស្ដូនី លីទុយអានី អៀរឡង់ និងស្លូវ៉ាគី។

ទន្ទឹមនឹងនេះ របាយការណ៍បានបង្ហាញថា ប្រទេសនៅទ្វីបអឺរ៉ុបមានភាគរយនៃបុគ្គលិកធ្វើការពីចម្ងាយរហូតដល់ ៥០ភាគរយ នៃបុគ្គលិកដែលធ្វើការពីចម្ងាយជុំវិញពិភពលោក។

ប្រទេសកំពូលទាំង ៣ នៅក្នុងតារាង Global Remote Work Index 2023

ចំណុចខ្លាំងរបស់ដាណឺម៉ាក ដែលធ្វើឱ្យប្រទេសនេះមានភាពឈានមុខគេលើការបំពេញការងារពីចម្ងាយ គឺរួមបញ្ចូលនូវគុណភាពអ៊ីនធឺណិត បរិយាប័ន្នសង្គម (Social inclusiveness) និងការថែទាំសុខភាព។ ចំណែកនៅក្នុងប្រទេសហូឡង់ ស្ថិរភាពសេដ្ឋកិច្ច គឺជាលក្ខខណ្ឌអំណោយផលមួយផ្សេងទៀត សម្រាប់ការបំពេញការងារពីចម្ងាយ។ នៅក្នុងរបាយការណ៍បានបន្ថែមថា មូលហេតុដែលធ្វើឱ្យហូឡង់ក្លាយជាប្រទេសដែលមានស្ថេរភាពសេដ្ឋកិច្ច គឺដោយសារតែប្រទេសនេះ ជាគោលដៅទេសចរណ៍របស់មនុស្សមកពីជុំវិញពិភពលោក ខណៈក្នុងប្រទេសនេះក៏មានការប្រើប្រាស់ភាសាអង់គ្លេសយ៉ាងទូលំទូលាយ។

ចំណែកនៅក្នុង​ប្រទេសអាល្លឺម៉ង់ តុល្យភាពដ៏ល្អរវាងតម្លៃនៃការរស់នៅ និងគុណភាពជីវិត រួមជាមួយនឹងសេវាកម្មអ៊ីនធឺណិត ដែលមានតម្លៃសមរម្យបំផុតក្នុងពិភពលោក បានធ្វើឱ្យប្រទេសនេះក្លាយជាប្រទេសអំណោយផលសម្រាប់ការបំពេញការងារពីចម្ងាយ។

ប្រទេសអំណោយផលសម្រាប់បំពេញការងារពីចម្ងាយ តាមលក្ខណៈវិនិច្ឆ័យ

ស្លូវ៉ាគីនាំមុខគេក្នុងចំណោមប្រទេសដែលជាប់ចំណាត់ថ្នាក់ល្អបំផុតសម្រាប់បំពេញការងារពីចម្ងាយ លើផ្នែកសុវត្ថិភាពអ៊ីនធឺណិត។ នេះគឺជាលក្ខណៈវិនិច្ឆ័យ ដែលរួមបញ្ចូលទាំងសមត្ថភាពក្នុងការឆ្លើយតបទៅនឹងការគំរាមកំហែងតាមប្រព័ន្ធឌីជីថល និងកម្រិតច្បាប់ស្ដីពីសុវត្ថិភាពអ៊ីនធឺណិត។

ចក្រភពអង់គ្លេសទទួលបានចំណាត់ថ្នាក់ល្អជាងគេ សម្រាប់សុវត្ថិភាពសេដ្ឋកិច្ចនៅក្នុង Global Remote Work Index 2023 ។ ការវាយតម្លៃនេះ គឺរួមបញ្ចូលនូវតម្លៃនៃការរស់នៅ ការទទួលបានការថែទាំសុខភាព ភាពងាយស្រួលក្នុងការទំនាក់ទំនង និងឱកាសលំហែកាយប្រកបដោយគុណភាព។

ចំណែកប្រទេសសិង្ហបុរី គឺជាប្រទេសដែលល្អបំផុតសម្រាប់ហេដ្ឋារចនាសម្ព័ន្ធឌីជីថល និងរូបវន្ត ដូចជា សេវាអ៊ីធឺណិតដែលមានស្ថេរភាព ល្បឿនលឿន និងទូលំទូលាយ។

ខណៈប្រទេសស្វីស ទទួលបានចំណាត់ថ្នាក់ល្អបំផុតសម្រាប់សុវត្ថិភាពសង្គម ដោយប្រទេសនេះបានគិតគូរអំពីសុវត្ថិភាពរាងកាយ និងការការពារបុគ្គលដែលធ្វើការពីចម្ងាយ។

តើការបំពេញការងារពីចម្ងាយស្ថិតនៅក្នុងអនាគតដ៏វែងឆ្ងាយមែនទេ?

ការបំពេញការងារពីចម្ងាយ គឺជាប្រធានបទ ដែលត្រូវបានលើកឡើងដដែលៗនៅក្នុងរបាយការណ៍អនាគតនៃទីផ្សារការងាររបស់វេទិកាសេដ្ឋកិច្ចពិភពលោកឆ្នាំ ២០២៣ ដែលត្រូវស្វែងយល់ពីការវិវត្តន៍នៃការងារ និងជំនាញក្នុងរយៈពេល ប្រាំឆ្នាំខាងមុខ។ របាយការណ៍នេះ គឺផ្អែកលើមតិកែលម្អពីក្រុមហ៊ុនជាង ៨០០ ដែលជួលកម្មករជាង ១១ លាននាក់ និងមានទស្សនវិស័យផ្សេងៗគ្នាលើអនាគតនៃការងារពីចម្ងាយ។ ទន្ទឹមនឹងនេះ ប្រហែលមួយភាគប្រាំនៃអ្នកឆ្លើយសំណួរគិតថា គោលនយោបាយរបស់រដ្ឋាភិបាលក្នុងការលើកទឹកចិត្តឱ្យធ្វើការពីចម្ងាយនៅក្នុងប្រទេស និងឆ្លងព្រំដែនប្រទេសអាចបង្កើនភាពអាចនឹងបង្កើនចំនួនមនុស្សបំពេញការងារពីចម្ងាយនៅក្នុងប៉ុន្មានឆ្នាំដ៏ខ្លីខាងមុខនេះ៕