ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាថ្មីមួយបានរកឃើញថា ក្មេងជំទង់ដែលចំណាយពេលលើសពី ៣ម៉ោងក្នុងមួយថ្ងៃនៅលើប្រព័ន្ធបណ្ដាញសង្គម គឺបង្កើនហានិភ័យខ្ពស់ចំពោះបញ្ហាសុខភាពផ្លូវចិត្ត។
ក្រុមអ្នកស្រាវជ្រាវរកឃើញថា ក្មេងជំទង់ដែលចំណាយពេលច្រើនម៉ោង ដើម្បីតាមដានរឿងរ៉ាវផ្សេងៗនៅលើបណ្ដាញសង្គម ដូចជា ហ្វេសប៊ុក អ៊ីនស្ដាក្រាម ឬបណ្ដាញ អិច (X) បានរាយការណ៍ថា ពួកគេមានអារម្មណ៍ ថប់បារម្ភ បាក់ទឹកចិត្ត និងឯកា។ លើសពីនេះ ពួកគេមានទំនោរ ក្លាយជាមនុស្សកោងកាច ងាយសម្លុត ឬធ្វើបាបអ្នកដទៃ ឬបង្ហាញអាកប្បកិរិយាប្រឆាំងសង្គម។
ការសិក្សា ដែលបានចេញផ្សាយនៅក្នុង JAMA Psychiatry ដោយក្រុមការងារបានសិក្សាលើក្មេងជំទង់ជនជាតិអាម៉េរិកប្រហែល ៦៦០០នាក់ មានអាយុចន្លោះពី ១២ ទៅ ១៥ឆ្នាំ។ សំណួរចម្បង ដែលអ្នកជំនាញបានសួរទៅកាន់ក្មេងជំទង់ទាំងនោះគឺ តើពួកគេមានគណនីប្រព័ន្ធផ្សព្វផ្សាយសង្គមឬទេ? ហើយប្រសិនបើមាន តើពួកគេចំណាយពេលជាមួយបណ្ដាញសង្គម ក្នុងមួយថ្ងៃប៉ុន្មានម៉ោង? ជាលទ្ធផល ចម្លើយដែលទទួលបានគឺខុសៗគ្នា មានអ្នកខ្លះ ៣០នាទី អ្នកខ្លះច្រើនជាង ៣០នាទី អ្នកខ្លះ បីម៉ោង រហូតដល់ ច្រើនជាង ៥ម៉ោង។
បន្ទាប់មក អ្នកជំនាញបានវាយតម្លៃ ស្ថានភាពផ្លូវចិត្ត របស់ក្មេងជំទង់ទាំងនោះ ដោយប្រើឧបករណ៍ត្រួតពិនិត្យ ដែលមានឈ្មោះថា GAIN-SS ជាលទ្ធផលបង្ហាញថា អ្នកដែលប្រើប្រាស់បណ្ដាញសង្គម លើពី ៣ម៉ោងក្នុងមួយថ្ងៃ មានបញ្ហាផ្លូវចិត្ត ដូចជា ការថប់បារម្ភ បាក់ទឹកចិត្ត ឬឯកា ខ្ពស់ បើធៀបទៅនឹងក្មេងជំទង់ ដែលមិនប្រើប្រព័ន្ធផ្សព្វផ្សាយសង្គម។
ក្រុមអ្នកស្រាវជ្រាវ បានសរសេរនៅក្នុងរបាយការណ៍ថា សម្រាប់ការស្រាវជ្រាវនាពេលអនាគត គួរតែកំណត់អំពីដែនកំណត់ និងពេលវេលាជាក់លាក់ នៃការប្រើប្រាស់បណ្ដាញសង្គមប្រចាំថ្ងៃ ការបង្កើនចំណេះដឹងអំពីការប្រើប្រាស់ប្រព័ន្ធផ្សព្វផ្សាយឱ្យបានត្រឹមត្រូវ និងការរៀបចំឡើងវិញនូវប្រព័ន្ធផ្សព្វផ្សាយសង្គម ដែលអាចកាត់បន្ថយបន្ទុកនៃបញ្ហាផ្លូវចិត្តរបស់អ្នកប្រើប្រាស់។
នេះ មិនមែនជាករណីសិក្សាលើកទីមួយទេ អំពីឥទ្ធិពលនៃការប្រើបណ្ដាញសង្គម មកលើបញ្ហាផ្លូវចិត្តអ្នកប្រើប្រាស់។ មានការសិក្សាជាច្រើនទៀត ដែលបានរកឃើញលទ្ធផល ស្រដៀង ឬដូចគ្នានេះដែរ ជាក់ស្ដែង ការសិក្សាដែលធ្វើឡើងដោយ សាកលវិទ្យាល័យ Montreal ក្នុងប្រទេសកាណាដា បានរកឃើញថា នៅពេលដែលក្មេងជំទង់ ចំណាយពេលនៅជាមួយអេក្រង់ច្រើន ពួកគេនឹងមានទំនោរធ្លាក់ទឹកចិត្តកាន់តែខ្លាំង។
ខណៈការសិក្សាមួយទៀត ដែលធ្វើឡើងដោយក្រុមអ្នកវិទ្យាសាស្ត្រអង់គ្លេស លើក្មេងស្រីជំទង់ ១៣០០០ នាក់ ដែលប្រើប្រាស់បណ្ដាញសង្គម យ៉ាងហោចណាស់ ៣ដងក្នុងមួយថ្ងៃ បានរកឃើញថា ពួកគេប្រឈមនឹងបញ្ហាថប់បារម្ភខ្ពស់ ព្រោះពួកគេ គេងមិនគ្រប់ ធ្វើសកម្មភាពរាងកាយមិនគ្រប់គ្រាន់ ព្រមទាំងប្រឈមនឹងការគំរាមកំហែង តាមប្រព័ន្ធអ៊ីធឺណិត៕
