ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
៤៥% នៃសិស្សវិទ្យាល័យនៅសហរដ្ឋអាមេរិក ត្រូវគេរកឃើញថាខ្សោយជំនាញគណិតវិទ្យាកម្រិតមូលដ្ឋាន ខណៈជាង ៣០% ខ្សោយជំនាញអានកម្រិតមូលដ្ឋាន ដែលនេះជាអត្រាទាបបំផុតក្នុងរយៈពេលជាង ៣ទសវត្សរ៍, នេះបើយោងតាមលទ្ធផលតេស្ត ដែលចេញផ្សាយដោយក្រសួងអប់រំសហរដ្ឋអាមេរិក។
របាយការណ៍បាននិយាយថា នៅក្នុងការសិក្សាមុខវិជ្ជាគណិតវិទ្យា ៦០% នៃសិស្សអាចកំណត់ចំនួនប្រជាជន ដោយប្រើដង់ស៊ីតេប្រជាជន និងតំបន់ ប៉ុន្តែតិចជាងពាក់កណ្ដាលអាចបំប្លែងស្ថានភាពជីវិតពិត ទៅជាកន្សោមពិជគណិត។ ការវាយតម្លៃគណិតវិទ្យារបស់ NAEP វាស់វែងចំណេះដឹង ដោយផ្អែកលើមាតិកាចំនួន ៤ ដែលក្នុងនោះរួមមាន ការគណនាលេខ, ការវាស់វែង និងធរណីមាត្រ, ការវិភាគទិន្នន័យ ស្ថិតិ និងប្រូបាប៊ីលីតេ និងពិជគណិត ក៏ដូចជា សមត្ថភាពរបស់សិស្សក្នុងការដោះស្រាយបញ្ហានៅក្នុងបរិបទគណិតវិទ្យា និងពិភពជាក់ស្ដែង។
នៅក្នុងការអាន សិស្ស ២ភាគ៣ អាចកំណត់អត្តសញ្ញាណគោលបំណងនៃអត្ថបទបញ្ចុះបញ្ចូលមួយ (persuasive essay) ប៉ុន្តែមានតែម្នាក់ក្នុងចំណោម ៥នាក់ប៉ុណ្ណោះ ដែលអាចទាញសេចក្ដីសន្និដ្ឋានពីអត្ថបទ ដោយប្រើទិន្នន័យ ដែលមានស្រាប់។ ការវាយតម្លៃការអាន NAEP ដោយប្រើអត្ថបទអក្សរសាស្ត្រ និងព័ត៌មាន ដើម្បីវាស់ស្ទង់ការយល់ដឹង ជាពិសេសសមត្ថភាពរបស់សិស្ស ក្នុងការកំណត់ទីតាំង និងរំលឹកព័ត៌មាន បញ្ចូល និងបកស្រាយ អ្វីដែលពួកគេអាន និងរិះគន់ ហើយវាយតម្លៃ។
៣២% នៃសិស្សថ្នាក់ទី១២ បានអនុវត្តនៅក្រោមកម្រិតមូលដ្ឋាន NAEP ក្នុងឆ្នាំ២០២៤ ពីរ ពិន្ទុខ្ពស់ជាងឆ្នាំ២០១៩ និង ១២ពិន្ទុខ្ពស់ជាងឆ្នាំ១៩៩២។ សិស្សនៅកម្រិតមូលដ្ឋានទំនងជាអាចកំណត់ទីតាំង និងកំណត់ព័ត៌មានលម្អិត ដែលពាក់ព័ន្ធ ដើម្បីគាំទ្រការយល់ដឹងអំពីព្យញ្ជនៈ។
រដ្ឋមន្ត្រីក្រសួងអប់រំអាមេរិក លោកស្រី Linda McMahon បាននិយាយថា លទ្ធផល NAEP បានបញ្ជាក់ពី «និន្នាការដែលបំផ្លិចផ្លាញ» ។ នៅក្នុងសេចក្ដីថ្លែងការណ៍របស់ក្រសួង លោកស្រីលើកឡើងថា នៅក្នុងដំណាក់កាលដ៏សំខាន់មួយ នៅពេលដែលសិស្សជិតបញ្ចប់ការសិក្សា និងចូលបម្រើការងារ ធ្វើជាយោធា ឬបន្តការសិក្សានៅថ្នាក់ឧត្តមសិក្សា សិស្សវិទ្យាល័យអាមេរិកជិតពាក់កណ្ដាល កំពុងធ្វើតេស្តនៅកម្រិតមូលដ្ឋានគណិតវិទ្យា និងការអាន។
ទោះបីជាត្រូវចំណាយប្រាក់រាប់ពាន់លានដុល្លារជារៀងរាល់ឆ្នាំលើកម្មវិធី K-12 ក៏ដោយ គម្លាតនៃសមិទ្ធិផល កំពុងតែរីកធំ ហើយសិស្សវិទ្យាល័យកាន់តែច្រើនកំពុងអនុវត្តការអានកម្រិតមូលដ្ឋាន និងកម្រិតមធ្យម។
លោកស្រីសង្កត់ធ្ងន់ថា ប្រសិនបើអាមេរិកនឹងនៅតែបន្តប្រកួតប្រជែងក្នុងកម្រិតសកល សិស្សត្រូវតែអាចអានបានស្ទាត់ជំនាញ គិតប្រកបដោយការត្រិះរិះពិចារណា និងបញ្ចប់ការសិក្សា ដែលមានសមត្ថភាព ដើម្បីដោះស្រាយបញ្ហាស្មុគស្មាញ៕
