ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចេកវិទ្យាតែងតែដើរតួរជាកាតាលីករដ៏សំខាន់សម្រាប់ការផ្លាស់ប្ដូរ។ ខណៈពេលដែលបញ្ញាសិប្បនិម្មិត (AI) តែងតែទទួលបានការចាប់អារម្មណ៍ពីមនុស្សគ្រប់មជ្ឈដ្ឋាន បច្ចេកវិទ្យា XR (Exended reality), VR (Virtual Reality) និង AR (Augmented Reality) គឺកំពុងតែបន្តផ្លាស់ប្ដូរពិភពលោករបស់យើងកាន់តែខ្លាំងឡើង។
ក្នុងអំឡុងពេលជំងឺរាតត្បាតកូវីដ-១៩ បច្ចេកវិទ្យា XR បានបង្កើតឱ្យមានការថែទាំសុខភាពតាមរយៈទូរស័ព្ទ តាមរយៈការបើកដំណើរការ ការភ្ជាប់ទំនាក់ទំនងគ្នាពីចម្ងាយយ៉ាងទូលំទូលាយ។ ឧបករណ៍ទាំងនេះធានាបាននូវការថែទាំជាបន្តបន្ទាប់ កាត់បន្ថយការប៉ះផ្ទាល់របស់បុគ្គលិកសុខាភិបាលទៅនឹងមេរោគ និងពង្រឹងការចូលរួមរបស់អ្នកជំងឺ ដែលនាំឱ្យមនុស្សអាចបង្កើតរបៀបថែទាំសុខភាព លើសពីរបៀបថែទាំបែបប្រពៃណី។
ប្រធានបទនិយាយអំពីបញ្ញាសិប្បនិម្មិត (AI) ជារឿយៗ គេបានចាត់ទុកថាជាមូលដ្ឋានគ្រឹះនៃបដិវត្តន៍ឧស្សាហកម្មទី៤ តែរឿងមួយទៀតកំពុងលាតត្រដាងឡើង គឺបច្ចេកវិទ្យា XR កំពុងផ្លាស់ប្ដូររបៀប និងការរៀបចំសង្គមរបស់មនុស្សយ៉ាងស្ងៀមស្ងាត់។
បង្កើតរូបភាពពិតក្នុងពិភពនិម្មិត (Simulating reality) សម្រាប់ការសម្រេចចិត្តកាន់តែប្រសើរ
ឧទាហរណ៍ដ៏គួរឱ្យទាក់ទាញមួយ នៃឥទ្ធិពលរបស់បច្ចេកវិទ្យា XR គឺការប្រើប្រាស់របស់អង្គការសហប្រជាជាតិ ក្នុងការបង្កើតរូបភាពពិតនៃជំរុំជនភៀសខ្លួនក្នុងពិភពនិម្មិត។ ការបង្កើតរូបភាពនិម្មិតដ៏អស្ចារ្យទាំងនេះ អនុញ្ញាតឱ្យអ្នកបង្កើតគោលនយោបាយអាចសិក្សាអំពីលក្ខខណ្ឌនៃការរស់នៅក្នុងជំរុំដោយផ្ទាល់ និងជំរុញឱ្យមានការយល់ដឹងកាន់តែស៊ីជម្រៅអំពីបញ្ហាប្រឈម ដែលជនភៀសខ្លួនជួបប្រទះ។ ការយល់ដឹងកាន់តែប្រសើរនេះ នាំឱ្យមានការសម្រេចចិត្តកាន់តែត្រឹមត្រូវ ហើយលទ្ធផលនៃគោលនយោបាយកាន់តែប្រសើរឡើង។
លើសពីវិស័យមនុស្សធម៌ អាជីវកម្មទូទាំងពិភពលោកកំពុងបង្កើតពិភពនិម្មិត ដែលធ្វើត្រាប់តាម ហើយតាមវិធីខ្លះ រូបភាពនោះលើសពីការពិតជាក់ស្ដែងរបស់យើងទៅទៀត។ ការអភិវឌ្ឍទាំងនេះកំពុងបង្កើតកន្លែង ដែលមនុស្សអាចធ្វើការសិក្សា និងដោះស្រាយបញ្ហារួមគ្នា មិនថាពួកគេនៅទីណាក៏ដោយ។ សក្តានុពលនៃបច្ចេកវិទ្យា XR គឺលើសពីការបង្កើតទីតាំងនិម្មិតទាំងនេះ ប៉ុន្តែវាអាចលាតសន្ធឹងទៅគ្រប់ផ្នែកទាំងអស់នៃជីវិតមនុស្ស។
តួនាទីរបស់ XR ក្នុងការដោះស្រាយបញ្ហាសកល
បច្ចុប្បន្នបច្ចេកវិទ្យា XR ត្រូវបានដាក់ប្រើប្រាស់ក្នុងរូបភាពទូលំទូលាយយ៉ាងឆាប់រហ័សនៅគ្រប់ឧស្សាហកម្ម និងផ្លាស់ប្ដូរប្រព័ន្ធប្រតិបត្តិការដែលមានលក្ខណៈស្មុគស្មាញ ដូចជា ការផលិត និងសង្វាក់ផ្គត់ផ្គង់។ កម្មវិធីរបស់ The Village’s Advanced Manufacturing and Supply Chain Hub គឺជាឧទាហរណ៍មួយ ដែល XR ត្រូវបានប្រើ ដើម្បីសម្រួល និងមើលឃើញពីដំណើរការផលិតកម្មដ៏ស្មុគស្មាញ បង្កើនកិច្ចសហប្រតិបត្តិការ និងការបង្កើតថ្មី។
មជ្ឈមណ្ឌលនេះបានបង្ហាញពីករណីប្រើប្រាស់ដោយជោគជ័យ នៃការបង្កើនកម្លាំងការងារ និងការអនុវត្តប្រកបដោយនិរន្តរភាព ខណៈពេលដែលផ្ដល់នូវកន្លែងនិម្មិត ដែលអ្នកជំនាញឧស្សាហកម្មអាចធ្វើអន្តរកម្ម រៀបចំផែនការ និងសិក្សាអំពីសេណារីយ៉ូខ្សែសង្វាក់ផ្គត់ផ្គង់សម្រាប់អនាគត៕
