ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តមបណ្ឌិត អ៊ុម រម្យណី រដ្ឋលេខាធិការ នៃក្រសួងអប់រំ យុវជន និងកីឡា បានលើកឡើងថា ការពង្រឹងគុណភាពនាយក និងគ្រូបង្រៀន ជាការជំរុញការផលិតបានធនធានមនុស្សដែលមានគុណភាព ឆ្លើយតបតម្រូវការទីផ្សារការងារកម្ពុជា។
ឯកឧត្តមបណ្ឌិត អ៊ុម រម្យណី មានប្រសាសន៍ថា ដើម្បីឱ្យការអប់រំមានគុណភាព អ្នកដឹកនាំគ្រឹះស្ថានសិក្សា នាយកសាលា ជាអ្នកកាច់ចង្កូតសាលា ត្រូវមានផែនការច្បាស់លាស់ អភិវឌ្ឍហេដ្ឋារចនាសម្ព័ន្ធសាលា និងដឹកនាំបុគ្គលិកអប់រំឱ្យមានសមត្ថភាពពូកែ។ ឯកឧត្តមបណ្ឌិតបន្តថា ការពង្រឹងសមត្ថភាពគ្រូបង្រៀន កែលម្អវិធីសាស្រ្តបង្រៀនថ្មី មានប្រសិទ្ធភាពដោយធាធាថា សិស្សទទួលបានចំណេះដឹង ព្រោះគ្រូបង្រៀន ដើរតួនាទីសំខាន់ក្នុងការដឹកនាំសិស្សទៅសម្រេចគោលដៅអនាគត។ រីឯសិស្សានុស្ស ជាមូលដ្ឋានក្នុងការលើកកម្ពស់ការអប់រំដែលរាជរដ្ឋាភិបាលកំពុងយកចិត្តទុកដាក់ ដើម្បីទទួលបានការអប់រំពេញលេញក្នុងសតវត្សទី២១។
រដ្ឋលេខាធិការក្រសួងអប់រំ យុវជន និងកីឡា បញ្ជាក់បន្ថែមថា គ្រឹះស្ថានសិក្សារដ្ឋ និងគ្រឹះស្ថានឯកជន ជាអ្នកផលិតធនធានមនុស្សកម្ពុជាទាំងមូល ដោយចាំបាច់ត្រូវសហការធ្វើការងារជាមួយគ្នា ដើម្បីសម្រេចចក្ខុវិស័យរាជរដ្ឋាភិបាលកម្ពុជា ចង់បានធនធានមនុស្សដែលមានសមត្ថភាព គុណភាព ហើយអាចផ្សារភ្ជាប់ជាមួយទីផ្សារកម្ពុជា។
សម្រាប់លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា ដើម្បីឱ្យការពង្រឹងគុណភាពអប់រំឱ្យមានប្រសិទ្ធភាព និងពេញលេញបាន គឺទាមទារឱ្យមានការពង្រឹងគុណភាពនាយកសាលា។ លោក គីម ដារ៉ា បន្តថា ប្រសិនបើនាយក ជាមនុស្សផ្ដោតលើលទ្ធផលរួមជាធំ គាត់នឹងមានសមត្ថភាពក្នុងការពង្រឹងគុណភាពគ្រូ ធ្វើយ៉ាងណាឱ្យគ្រូគិតពីប្រយោជន៍រួម ពោលគឺគិតពីគុណភាពសិស្ស។ ជាក់ស្ដែង សាលាវត្តបូព៌ជាសាលាមាននាយកពូកែ ដែលអាចធ្វើឱ្យគ្រូបង្រៀនពូកែ សាលាមានវិន័យ ក្លាយជាសាលារៀនគំរូ។ ដូច្នេះ ដើម្បីទទួលបានគ្រូមានគុណភាព គឺផ្ដើមពេញពីការរើសនាយកដែលពូកែជាមុនសិន ប្រសិនបើនាយកធ្វើត្រូវ នាំឱ្យគ្រូធ្វើត្រូវ នោះនឹងនាំឱ្យសិស្សពូកែផងដែរ។
សម្រាប់លោក គីម ដារ៉ា គិតថា ដើម្បីជំរុញគុណភាពអប់រំគឺត្រូវចូលរួមពីវិស័យឯកជន ព្រោះសាលាឯកជនបង្រៀនសិស្សខ្មែរដូចគ្នា មានន័យថា អ្នកដែលមានធនធានអាចបញ្ជូនកូនទៅរៀនសាលាឯកជនដែលមានគុណភាព ចំណែកអ្នកមិនសូវមានធនធានអាចបញ្ជូនកូនទៅរៀននៅសាលារដ្ឋដែលមានគុណភាព។ ដូច្នេះ រាជរដ្ឋាភិបាលអាចសហាការជាមួយវិស័យឯកជនធ្វើយ៉ាងណាលើកទឹកចិត្តឱ្យការអប់រំក្នុងសាលាឯកជនអាចបន្តទៅមុខមានគ្រប់ទីកន្លែង។
គួរជម្រាបជូនថា ក្រសួងអប់រំបាននិងកំពុងបន្តយកចិត្តទុកដាក់អនុវត្តតបតាមអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនៅក្នុងកិច្ចប្រជុំដំបូងគណៈរដ្ឋមន្ត្រី សម្រាប់នីតិកាលទី៧ នាថ្ងៃទី២៤ ខែសីហា ឆ្នាំ២០២៣ ក្នុងគោលដៅដើម្បីលើកកម្ពស់គុណភាពអប់រំនៅសាលារដ្ឋចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈការពង្រឹងកិច្ចការសំខាន់ៗ រួមមាន ៖ ទី១). ការពង្រឹងអភិបាលកិច្ចសាលារៀន, ទី២). ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាម តម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, ទី៣). ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន, ទី៤). ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យស្លោកភាពជាដៃគូ រដ្ឋ និងសហគមន៍ដើម្បីការអប់រំ៕
