ការរីកចម្រើនផ្នែកបច្ចេកវិទ្យា ការផ្លាស់ប្ដូររបត់សេដ្ឋកិច្ច និងភាពតានតឹងភូមិសាស្ត្រនយោបាយ កំពុងផ្លាស់ប្ដូរការងារ និងឧស្សាហកម្មជាច្រើន។ ខណៈ ៨៣ភាគរយ នៃបុគ្គលិកគ្រោងនឹងបន្តធ្វើការជាមួយនិយោជករបស់ខ្លួន ការស្រាវជ្រាវដែលមានឈ្មោះថា កម្លាំងពលកម្មសកលនៃអនាគត របស់ The Adecco Group បានបង្ហាញថា មនុស្សជាច្រើន មានអារម្មណ៍ថា មិនមានការគាំទ្រ ដល់ការអភិវឌ្ឍជំនាញរបស់ពួកគេ។ បញ្ហានេះ អាចនាំឱ្យមានការថយចុះជំនឿលើការប្ដេជ្ញាចិត្តរបស់និយោជកចំពោះការអភិវឌ្ឍជំនាញរបស់និយោជិត។

ដើម្បីភាពរីកចម្រើនក្នុងយុគសម័យឆ្លាតវៃ ដែល AI និងមនុស្សជំរុញការច្នៃប្រឌិតរួមគ្នា និយោជក ត្រូវដើរតួនាទីយ៉ាងសកម្ម ក្នុងការរៀបចំក្រុមការងាររបស់ខ្លួន។ ការវិនិយោគលើការអភិវឌ្ឍជំនាញ និងអាជីព មិនត្រឹមតែជួយឱ្យបុគ្គលិក អាចឆ្លើយតបទៅនឹងបញ្ហាប្រឈមបច្ចុប្បន្ន និងអនាគតប៉ុណ្ណោះទេ ប៉ុន្តែថែមទាំងពង្រឹងទំនុកចិត្ត និងកិច្ចសហការផងដែរ។

AI គឺជាកម្លាំងដែលជំរុញឱ្យមានការផ្លាស់ប្ដូររបៀបធ្វើការ, ដោយស្ទើរតែ ៤០ភាគរយ នៃការងារទូទាំងពិភពលោក បានទទួលឥទ្ធិពលពីការរីកចម្រើន នៃបញ្ញាសិប្បនិម្មិត (AI) នេះ។ ខណៈដែល AI ភាគច្រើនពង្រឹងប្រសិទ្ធភាពបំពេញការងារ ជាជាងជំនួសតួនាទីមនុស្ស, បច្ចេកវិទ្យានេះ ក៏បានបង្កើតភាពស្មុគស្មាញមួយចំនួនផងដែរ។ ការស្រាវជ្រាវរកឃើញថា បុគ្គលិកមានអារម្មណ៍ថា មិនបានត្រៀមខ្លួនសម្រាប់ការទទួលយកបច្ចេកវិទ្យានេះទេ ដោយមានតែ ២៥ភាគរយប៉ុណ្ណោះ ដែលទទួលបានការបណ្ដុះបណ្ដាលជាក់លាក់អំពីការប្រើប្រាស់ AI ដែលធ្វើឱ្យបុគ្គលិក ៤០ភាគរយ ព្រួយបារម្ភអំពីសុវត្ថិភាពការងាររយៈពេលវែងរបស់ខ្លួន។

វេទិកាសេដ្ឋកិច្ចពិភពលោកបញ្ជាក់ថា ការដោះស្រាយបញ្ហាគម្លាតចំណេះដឹងនេះ គឺមានសារៈសំខាន់ណាស់។ តាមរយៈការផ្ដល់ការបណ្ដុះបណ្ដាល ផ្ដោតលើ AI និយោជក អាចបង្កើតទំនុកចិត្ត និងបំពាក់កម្លាំងពលកម្មរបស់ពួកគេ ដើម្បីស្វែងរកការផ្លាស់ប្ដូរ ដោយទំនុកចិត្ត។

កិច្ចសហការបង្កើតកម្លាំងពលកម្ម ដែលត្រៀមរួចជាស្រេចសម្រាប់អនាគត

ទោះបីជាមានតម្រូវការបន្ទាន់សម្រាប់ជំនាញថ្មីក៏ដោយ ការស្រាវជ្រាវបានរកឃើញថា គំនិតផ្ដួចផ្ដើមបង្កើនជំនាញ ដែលដឹកនាំដោយនិយោជក បាននៅទ្រឹងជាលើកដំបូងក្នុងរយៈពេល៣ឆ្នាំ។ ស្ទើរតែពាក់កណ្ដាលនៃកម្មករ (៤៨%) ជឿថា នេះជាទំនួលខុសត្រូវរបស់និយោជក ក្នុងការរៀបចំពួកគេសម្រាប់ការងារនាពេលអនាគត ខណៈដែលមានតែ ២០% ប៉ុណ្ណោះ ដែលយល់ថា វាជាទំនួលខុសត្រូវរបស់ពួកគេខ្លួនឯង។ ការគ្មានការគាំទ្រច្បាស់លាស់ សម្រាប់ការអភិវឌ្ឍជំនាញ កម្មករនិយោជិត ប្រឈមនឹងការបាត់បង់ទំនុកចិត្ត លើការរំពឹងទុករយៈពេលវែងរបស់ពួកគេ។

ដំណោះស្រាយស្ថិតនៅក្នុងការសហការ, និយោជក ត្រូវតែធ្វើជាដៃគូយ៉ាងសកម្មជាមួយកម្លាំងពលកម្មរបស់ខ្លួន ក្នុងការកសាងសមត្ថភាព ដោយក្រៅពីការផ្ដល់ជូនវគ្គបណ្ដុះបណ្ដាល និយោជកត្រូវបង្កើតបរិយាកាស ផ្ដល់អាទិភាព និងជំរុញការអភិវឌ្ឍសមត្ថភាពបុគ្គលិក។ យុទ្ធសាស្ត្រ ដែលមានរចនាសម្ព័ន្ធដូចជា ការវាយតម្លៃជំនាញទៀងទាត់ ផែនការអាជីពផ្ទាល់ខ្លួន ការបង្កើតវគ្គបណ្ដុះបណ្ដាលជាបន្តបន្ទាប់ ដើម្បីជួយបុគ្គលិកសម្របនឹងការផ្លាស់ប្ដូរ និងមានចំណេះដឹងបច្ចេកវិទ្យា ដែលមានតម្រូវការសម្រាប់អនាគត។

ការស្រាវជ្រាវរបស់វេទិកាសេដ្ឋកិច្ចពិភពលោក បានបង្ហាញថា មានតែ ១១ភាគរយ នៃបុគ្គលិកប៉ុណ្ណោះ ដែលបានត្រៀមខ្លួនសម្រាប់បម្រែបម្រួលការងារនាពេលអនាគត។ សមត្ថភាពពូកែក្នុងបរិយាកាសមិនច្បាស់លាស់ ជាឱកាសដែលពង្រឹងសមត្ថភាពឱ្យកាន់តែខ្លាំងឡើង។ បុគ្គលិកឆ្នើមទាំងនេះ តែងតែមានផែនការអភិវឌ្ឍសមត្ថភាព ឱ្យស្របនឹងរបត់នៃការផ្លាស់ប្ដូររបស់សង្គម ចូលរួមវគ្គបណ្ដុះបណ្ដាលភាពជាអ្នកដឹកនាំ និងវិនិយោគជាប្រចាំ លើការអភិវឌ្ឍជំនាញ។

ដើម្បីពង្រីកវិសាលភាព បុគ្គលិកដែលមានសមត្ថភាពខ្ពស់ឱ្យបានច្រើន ស្ថាប័ន ត្រូវប្ដេជ្ញាចិត្ត អភិវឌ្ឍសមត្ថភាពបុគ្គលិកគ្រប់កម្រិត រៀបចំអ្នកដឹកនាំបន្តវេនដើម្បីស្វែងរកការផ្លាស់ប្ដូរ។ នៅពេលដែលក្រុមហ៊ុនវិនិយោគលើការបណ្ដុះបណ្ដាល មានន័យថា ស្ថាប័នកំពុងបង្ហាញពីការប្ដេជ្ញាចិត្តក្នុងការគាំទ្រអនាគតបុគ្គលិករបស់ខ្លួន ជំរុញឱ្យមានវប្បធម៌ នៃការជឿទុកចិត្ត និងសមត្ថភាពខ្ពស់ក្នុងការបំពេញការងារ។

វិនិយោគលើមនុស្ស មិនមែនគ្រាន់តែបច្ចេកវិទ្យា

និយោជក ដែលវិនិយោគលើបុគ្គលិករបស់ខ្លួន នឹងទទួល​ឱកាសខ្ពស់សម្រាប់ភាពជោគជ័យ។ ការស្រាវជ្រាវបង្ហាញថា អ្នកធ្វើការចង់ទទួលបានការណែនាំ ហើយនេះគឺជាឱកាសមាសសម្រាប់អាជីវកម្ម ក្នុងការដឹកនាំបុគ្គលិករបស់ខ្លួន។

ការកសាងកិច្ចសហប្រតិបត្តិការ និងកម្លាំងការងារ ដែលត្រៀមខ្លួនរួចជាស្រេចសម្រាប់អនាគត ដែលធានាបាននូវសុវត្ថិភាពសម្រាប់ស្ថាប័ន ការវិនិយោគនេះអាចបង្កើតវប្បធម៌នៅកន្លែងធ្វើការ ដែលបុគ្គលិកមានអារម្មណ៍ថា ទទួលបានការគាំទ្រ ឱ្យតម្លៃ និងការដុសខាត់សមត្ថភាពពួកគេសម្រាប់អនាគត៕