ចំនួននិស្សិតអន្តរជាតិ ដែលទៅបន្តការសិក្សានៅអាមេរិក តាមរយៈទិដ្ឋាការសិស្សបានបន្តធ្លាក់ចុះក្នុងខែកក្កដា ដែលធ្វើឱ្យមានការធ្លាក់ចុះទិន្នន័យក្នុងរយៈពេល ៤ខែជាប់ៗគ្នា និងបន្តថយចុះពីមួយឆ្នាំទៅឆ្នាំ។

បណ្ដាប្រទេសនៅអាស៊ី ជាពិសេសឥណ្ឌា និងចិន ថយចុះជាខ្លាំងបំផុត ដោយសារគោលនយោបាយរឹតបន្តឹងជនអន្តោប្រវេសន៍ និងការពន្យារពេលដំណើរការ ស្ថិតក្រោមរដ្ឋបាលលោកប្រធានាធិបតីត្រាំ។

យោងតាមរដ្ឋបាលពាណិជ្ជកម្មអន្តរជាតិ ដែលជាទីភ្នាក់ងារនៅក្នុងក្រសួងពាណិជ្ជកម្មសហរដ្ឋអាមេរិក បានបង្ហាញថា ទិដ្ឋាការនិស្សិតអន្តរជាតិបានធ្លាក់ចុះ ២៨% ចាប់តាំងពីឆ្នាំមុន ក្រោម ៧០០០ទិដ្ឋាការ ដែលនេះជាការធា្លក់ចុះប្រចាំខែ ដ៏ច្រើនបំផុត បន្តមកដល់ពេលនេះ។ ក្នុងនោះ ការមកដល់របស់និស្សិតឥណ្ឌាបានធ្លាក់ចុះ ៤៦% ខណៈនិស្សិតចិនបានធ្លាក់ចុះ ២៦%។

សារព័ត៌មាន Bloomberg បានរាយការណ៍ថា ក្នុងទិន្នន័យរួម ប្រទេសទាំង ២មានច្រើនជាងពាក់កណ្ដាល នៃការចុះឈ្មោះនិស្សិតនៅក្នុងសហរដ្ឋអាមេរិក ដែលនេះជាប្រភពចំណូលដ៏សំខាន់ សម្រាប់សាកលវិទ្យាល័យជាច្រើន។

កាលពីឆ្នាំមុន ឥណ្ឌា និងចិន មានចំនួនរហូតដល់ទៅ ៥៤% នៃចំនួននិស្សិតអន្តរជាតិទាំងអស់ ខណៈដែលនីហ្សេរីយ៉ា និងជប៉ុន ជាប់ចំណាត់ថ្នាក់ទី៧ និងទី១៣ រៀងគ្នា។ ស្ថាប័នអប់រំរបស់សហរដ្ឋអាមេរិក ត្រូវបានព្យាករណ៍ថានឹងធ្លាក់ចុះចំនួននិស្សិតអន្តរជាតិ ដែលចុះឈ្មោះចូលរៀនចំនួន ៣០% នៅរដូវស្លឹកឈើជ្រុះខាងមុខនេះ ដែលធ្វើឱ្យវិស័យអប់រំកម្រិតឧត្តមសិក្សាមានប្រាក់ចំណូលប្រហែល ២,៦ ពាន់លានដុល្លារអាមេរិក។

ការធ្លាក់ចុះនេះ​ កើតចេញពីការផ្លាស់ប្ដូរគោលនយោបាយជាបន្តបន្ទាប់ រួមទាំងការត្រួតពិនិត្យទិដ្ឋាការ កម្រិតខ្ពស់ បញ្ជីឈ្មោះអ្នកមកចូលរួមជាច្រើនមិនទាន់បានសម្ភាសន៍ និងការត្រួតពិនិត្យជីវប្រវត្តិ នៃប្រព័ន្ធផ្សព្វផ្សាយសង្គម ដែលត្រូវបានដាក់ឱ្យដំណើរការ ក្នុងអំឡុងពេលដាក់ពាក្យសុំចូលរៀន។

លោកស្រី Zuzana Cepla Wootson អនុប្រធានគោលនយោបាយសហព័ន្ធ នៅសម្ព័ន្ធប្រធានាធិបតី ស្ដីពីការអប់រំឧត្តមសិក្សា និងអន្តោប្រវេសន៍ បានប្រាប់កាសែត The Economic Times ថា ការបង្កើនវិធានការត្រួតពិនិត្យ និងភាពមិនច្បាស់លាស់ជុំវិញការចេញទិដ្ឋាការកំពុងបង្កើនការព្រួយបារម្ភយ៉ាងខ្លាំង ជាពិសេស សម្រាប់និស្សិតចិន និងឥណ្ឌា។

ការចុះឈ្មោះនិស្សិតអន្តរជាតិនៅសហរដ្ឋអាមេរិកបានឈានដល់កំណត់ត្រា ១,១លាននាក់ ក្នុងឆ្នាំសិក្សា ២០២៣-២០២៤ ដោយប្រទេសឥណ្ឌា មានតួលេខនិស្សិតឈានមុខគេ ដោយមានចំនួន ៣៣២,០០០នាក់ និងប្រទេសចិនមានចំនួនប្រហែល ២៧៧,០០០នាក់ ,នេះបើយោងតាម Open Doors។

ប៉ុន្តែចាប់ពីខែមីនា ឆ្នាំ២០២៤ ដល់ខែមីនា ឆ្នាំ២០២៥ ការចុះឈ្មោះជារួមបានធ្លាក់ចុះ ១១%, នេះបើផ្អែកលើទិន្នន័យ ពីប្រព័ន្ធព័ត៌មានសិស្ស និងការផ្លាស់ប្តូរអ្នកទស្សនា (SEVIS) ដែលគ្រប់គ្រងដោយក្រសួងសន្តិសុខមាតុភូមិរបស់សហរដ្ឋអាមេរិក៕