ការងារបៃតង ជំនាញបៃតង និងសេដ្ឋកិច្ចបៃតង ត្រូវបានគេលើកយកមកជជែកច្រើនជាងមុនក្នុងបរិបទបច្ចុប្បន្ន។ ការផ្លាស់ប្ដូរថាមពល ដែលតម្រូវការសម្រាប់ប្រទេសនានា ដើម្បីសម្រេចបាននូវគោលដៅ ការបញ្ចេញឧស្ម័នស្មើសូន្យ (Net-zero)។ យោងតាមទនិន្នន័យ LinkedIn ការប្រកាសជ្រើសរើសបុគ្គលិកក្នុងវិស័យការងារបៃតង កំពុងតែកើនឡើងជិត ២ដង ដែលមានល្បឿនលឿន នៃការផលិតធនធានមនុស្សចូលបម្រើការក្នុងវិស័យនេះ ២ដង។

ឧបសគ្គ ដែលត្រូវបានលើកមកជជែកច្រើនក្នុងដំណើរការសម្រេចឱ្យបាននូវការបញ្ចេញឧស្ម័នស្មើសូន្យ គឺកង្វះសក្តានុពល នៃអ្នកមានជំនាញជាក់លាក់ ដែលអាចធ្វើការក្នុងវិស័យការងារបៃតងបាន។ ការស្រាវជ្រាវរបស់ LinkedIn នៅក្នុងប្រទេសចំនួន ៤៨ ក្នុងរយៈពេល ៥ឆ្នាំចុងក្រោយនេះ បានរកឃើញថា ខណៈពេលដែលការជ្រើសរើសបុគ្គលិក ក្នុងវិស័យការងារបៃតងកើនឡើង ៨ភាគរយ ជារៀងរាល់ឆ្នាំ កម្លាំងពលកម្ម ៧នាក់ ក្នុងចំណោម ៨នាក់ គឺមិនមានជំនាញបៃតងនោះទេ។ ការស្ទង់មតិពីអ្នកដឹកនាំធុរកិច្ចពិភពលោក ចំនួន ១ពាន់នាក់ អំពីផលប៉ះពាល់សេដ្ឋកិច្ចនៃពេលថ្មីៗនេះ ពួកគេបានរាយការណ៍ថា ៦២ភាគរយ នៃអ្នកឆ្លើយសំណួរ ជឿថា កង្វះអ្នកជំនាញបៃតង អាចពន្យឺតការសម្រេចគោលដៅការបញ្ចេញឧស្ម័នស្មើសូន្យសាកល។

តើអ្វីជា “ការអប់រំបៃតង” ?

ការអប់រំបៃតង ដែលត្រូវបានគេស្គាល់ថា ជាការអប់រំអំពីបរិស្ថាន ឬការអប់រំប្រកបដោយនិរន្តរភាព គឺជាវិធីសាស្ត្រអប់រំ ដែលផ្ដោតលើការបង្រៀនអំពីបញ្ហាបរិស្ថាន គោលគំនិតអំពីអេកូឡូស៊ី និងការអនុវត្តក្នុងកិច្ចការផ្សេងៗ ដោយផ្តោតលើការអភិវឌ្ឍប្រកបដោយចីរភាព។

គោលដៅចម្បងនៃការអប់រំបៃតង គឺលើកកម្ពស់ការយល់ដឹងអំពីបញ្ហាបរិស្ថាន ដូចជា បម្រែបម្រួលអាកាសធាតុ ការបំពុលបរិយាកាស និងការថយចុះធនធានរបស់ផែនដី។ តាមរយៈការយល់ដឹងអំពីបញ្ហាទាំងនេះ មនុស្សអាចចូលរួមស្វែងរកដំណោះស្រាយ និងការពារផែនដី ដើម្បីការរស់នៅប្រកបដោយចីរភាព។

តើជំនាញបៃតងមានអ្វីខ្លះ?

ជំនាញបៃតង សំដៅលើ បុគ្គលដែលមានចំណេះដឹង សមត្ថភាព គុណតម្លៃ និងឥរិយាបថរស់នៅដើម្បីអភិវឌ្ឍ និងគាំទ្រសង្គមប្រកបដោយនិរន្តរភាព និងធនធាន។ ជំនាញនេះ ត្រូវការទាំងសមត្ថភាពផ្នែកបច្ចេកទេស និងជំនាញទន់។ ចំពោះជំនាញបច្ចេកទេស ក្នុងវិស័យបៃតង មានដូចជា បច្ចេកវិទ្យាថាមពលកកើតឡើងវិញ (សូឡា, ថាមពលខ្យល់, ថាមពលហៃដ្រូ-hydro, ថាមពល geothermal និងថាមពលជីវម៉ា-biomass power generation), ប្រសិទ្ធភាពថាមពល (ការរចនាអគារ, ការធ្វើសវនកម្មថាមពល និងការគ្រប់គ្រងថាមពល), កសិកម្មប្រកបដោយចីរភាព (កសិកម្មសរីរាង្គ, ការចិញ្ចឹមសត្វ និងផលិតកម្មអាហារប្រកបដោយនិរន្តរភាព), ការគ្រប់គ្រងសំរាម ដូចជា យុទ្ធសាស្ត្រកែច្នៃឡើងវិញ ការធ្វើជីកំប៉ុស និងការកាត់បន្ថយកាកសំណល់ ហើយជំនាញពិសេសមួយទៀតនោះគឺ វិទ្យាសាស្ត្របរិស្ថាន (ការសិក្សាអំពីបម្រែបម្រួលអាកាសធាតុ, អេកូឡូស៊ី និងការវាយតម្លៃផលប៉ះពាល់បរិស្ថាន)។

ជំនាញបៃតង ដែលមានតម្រូវការ

ក្រុមប្រឹក្សាអន្តររដ្ឋាភិបាលរបស់អង្គការសហប្រជាជាតិស្តីពីការប្រែប្រួលអាកាសធាតុ (IPCC) បាននិយាយម្តងហើយម្តងទៀតថា ត្រូវការសកម្មភាពពន្លឿនក្នុងទសវត្សរ៍នេះ ដើម្បីរក្សាការតាមដាន ការប្រែប្រួលអាកាសធាតុ។ ដូច្នេះ ត្រូវការអ្នកជំនាញ និងចំណេះដឹងជាច្រើន ដើម្បីការពារបរិស្ថាន អភិរក្សធនធាន និងការលុបបំបាត់ការបញ្ចេញកាបូន។

បើតាម LinkedIn បានបង្ហាញថា មានជំនាញបៃតងជាច្រើន ដែលកំពុងមានតម្រូវការ ក្នុងនោះមានដូចជា ជំនាញរៀបផែនការសកម្មភាពអាកាសធាតុ, ការអប់រំប្រកបដោយចីរភាព, ការបំភាយកាបូន (Carbon emission), គណនីកាបូន (Carbon accounting), និរន្តរភាពសាជីវកម្ម (Corporate sustainability), បច្ចេកវិទ្យាព័ត៌មានបៃតង (Green IT), ការរចនាប្រព័ន្ធសូឡា និងជំនាញជាច្រើនទៀត។

លទ្ធផលនៃការស្រាវជ្រាវរបស់ LinkedIn បានបង្ហាញថា ជំនាញ និងការងារបៃតងទាំងនេះ គឺមានភាពធន់ក្នុងដំណាក់កាលសេដ្ឋកិច្ចដែលមានភាពមិនប្រាកដប្រជា ខណៈទិន្នន័យដែលបានសិក្សាក្នុងប្រទេសចំនួន ៤៨ បង្ហាញថា ជំនាញបៃតង គឺមានអត្រាជ្រើសរើសបុគ្គលិកច្រើនជាងជំនាញឯទៀត៕