ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាថ្មីមួយបានបង្ហាញពីទំនាក់ទំនងរវាងអត្រាមរណៈ និងការអប់រំ ដោយប្រៀបធៀបការមិនបន្តការសិក្សា ទៅនឹងការជក់បារី ឬទទួលទានស្រា។ លទ្ធផលសិក្សារកឃើញថា ការបន្តការអប់រំ ឬសិក្សាជារៀងរាល់ឆ្នាំ អាចកាត់បន្ថយហានិភ័យនៃការស្លាប់ និងបង្កើនអាយុសង្ឃឹមរស់បានជិត ២ភាគរយ។
ទន្ទឹមនឹងនេះ ការមិនបន្តទទួលការអប់រំ នឹងមានឥទ្ធិពលអវិជ្ជមានដល់សុខភាព ប្រៀបដូចជា ការទទួលទានគ្រឿងស្រវឹងច្រើនលើសកំណត់ ឬជក់បារី ១០ដើមក្នុងមួយឆ្នាំ រយៈពេល ១០ឆ្នាំដែរ។ នេះបើយោងតាមការវិភាគមេតា (Meta-analysis) ដែលមានគោលបំណងកំណត់ពីកម្រិតទំនាក់ទំនងរវាងការអប់រំ និងអត្រានៃការស្លាប់ ធ្វើឡើងដោយ The Lancet Public Health ដោយធ្វើការពិនិត្យលើករណីសិក្សាចំនួន ៦០៣ មកពីជុំវិញពិភពលោក។
លោកវេជ្ជបណ្ឌិត Terje Andreas Eikemo សហអ្នកនិពន្ធ និងជាប្រធានសាកលវិទ្យាល័យវិទ្យាសាស្ត្រន័រវេស លើកឡើងថា ការអប់រំមានសារៈសំខាន់ ព្រោះមានលក្ខណៈពិសេសជាច្រើន មិនត្រឹមតែមានអត្ថប្រយោជន៍សម្រាប់សុខភាពប៉ុណ្ណោះទេ ការដែលអាចកំណត់បរិមាណនៃអត្ថប្រយោជន៍នេះ គឺជាចំណែកសំខាន់នៃការអភិវឌ្ឍសង្គម។
លទ្ធផលនៃការសិក្សាក៏បានបង្ហាញដែរថា អ្នកដែលបានសិក្សាត្រឹមថ្នាក់បឋមសិក្សា អាចកាត់បន្ថយហានិភ័យប្រឈមនឹងការស្លាប់ជាមធ្យម ១៣ភាគរយ ខណៈដែលអ្នកបានបញ្ចប់ថ្នាក់មធ្យមសិក្សាកម្រិតវិទ្យាល័យ អាចកាត់បន្ថយហានិភ័យនេះ ២៥ភាគរយ បើធៀបទៅនឹងអ្នកមិនបានសិក្សា។ លើសពីនេះ មនុស្សដែលទទួលបានការអប់រំរយៈពេល ១៨ឆ្នាំ នឹងថយចុះហានិភ័យប្រឈមនឹងការស្លាប់ ៣៤ភាគរយ។
លោកស្រី Claire Henson សហអ្នកនិពន្ធ និងជាអ្នកស្រាវជ្រាវនៅសាកលវិទ្យាល័យ Washington Institute For Health Metrics លើកឡើងថា ការបិទគម្លាតការអប់រំ មានន័យថា ជាការបិទគម្លាតមរណភាព និងលុបបំបាត់ភាពក្រីក្រ ហើយទាមទារឱ្យមានការប្ដេជ្ញាចិត្តជាអន្តរជាតិ។ ដូច្នេះ ការលើកកម្ពស់ និងការផ្ដល់ឱកាសឱ្យមនុស្សទទួលបានការអប់រំ ពិតជាមានសារៈសំខាន់ ដើម្បីកាត់បន្ថយវិសមភាពអត្រាមរណៈ និងជីវភាពក្នុងសង្គម៕
