បើនិយាយ​អំពី​ការ​សិក្សា​អាហារូបករណ៍​នៅ​សាកលវិទ្យាល័យ Oxford នៃ​ចក្រភព​អង់គ្លេស សម្រាប់​សិស្ស-និស្សិត​អន្តរជាតិ គេនឹង​នឹក​ឃើញមុន​គេដល់កម្មវិធី​អាហារូបករណ៍ Rhodes (Rhodes Scholarship) ដែល​ជា​អាហារូបករណ៍​មាន​អាយុចំណាស់​ជាងគេ​លើ​ពិភពលោក ពោល​គឺ​តាំង​ពីឆ្នាំ១៩០៣។

តើ​អាហារូបករណ៍ Rhodes ជាអ្វី?

យោងតាម​គេហទំព័រ Rhodes Trust បាន​បង្ហាញ​ថា Rhodes ជា​អាហារូបករណ៍​ដែល​ផ្ដល់ជូន​ការសិក្សា​សម្រាប់​ថ្នាក់ក្រោយ​ឧត្ដមសិក្សា ដែល​មានរយៈពេល​សិក្សា​ចាប់ពី ២​ ទៅ ៣ឆ្នាំ ហើយ​តែងតែ​ផ្ដល់ឱកាសសិក្សា​ច្រើន​ជាង១០០នាក់​ក្នុង​មួយឆ្នាំ និង​គាំទ្រ​លើការ​សិក្សា និង​ស្នាក់នៅ​កំឡុង​ពេល​សិក្សា​ជាច្រើន​ដូចជា តម្លៃ​សិក្សា កន្លែង​ស្នាក់​នៅ ប្រាក់​ឧបត្ដម្ភ​ប្រចាំខែ និង​អត្ថប្រយោជន៍​ជាច្រើន​ទៀត។

តាម​គេហទំព័រ​ដដែល​បាន​លើក​ឡើង​ថា លក្ខណៈ​វិនិច្ឆ័យ​នៃ​ការ​ជ្រើសរើស​សិស្ស-និស្សិត របស់​អាហារូបករណ៍ Rhodes គឺ​តម្រូវ​ទៅតាម​លក្ខខណ្ឌ​របស់បុគ្គល ដែល​ទាក់ទង​ទៅតាម​ជំនាញ​ផ្សេងៗគ្នា​ដែល​និស្សិតចង់​ស្នើទៅ​សិក្សា។ អាហារូបករណ៍ Rhodes ផ្ដល់ជូន​មូលនិធិ​នេះទៅ​កាន់សិស្ស-និស្សិត​ទូទាំង​ពិភពលោក​ឱ្យទទួល​បាន​ឱកាស​សិក្សា​ជំនាញ​ផ្សេងៗ នៅ​ក្រោម​មហាវិទ្យាល័យ​ចំនួន​៣៩ នៃ​សាកលវិទ្យាល័យ Oxford។ ក្រៅ​ពី​សិស្ស និស្សិត អាហារូបករណ៍​ក៏ផ្ដល់​ឱ្យ មន្ត្រីរាជការ​ក្នុង​ជួរ​រដ្ឋាភិបាល អ្នក​នៅក្នុង​ផ្នែកអប់រំ អ្នក​សិល្បៈ អ្នក​បម្រើ​ការងារ​នៅអង្គការ​ក្រៅ​រដ្ឋាភិបាល អ្នកជំនួញ​ពាណិជ្ជកម្ម អ្នកស្រាវជ្រាវ អ្នកសារព័ត៌មាន អ្នក​នៅក្នុង​វិស័យ​វេជ្ជសាស្ត្រ និង​វិស័យ​ផ្សេងៗ​ជាច្រើនទៀត។

បើ​តាម​គេហទំព័រ Arizona State University ក៏បាន​បង្ហាញពី​លក្ខខណ្ឌ​នៃការ​ស្នើពាក្យ​អាហារូបករណ៍ Rhodes ដោយ​បេក្ខជន​ត្រូវ​មាន​អាយុ​ចន្លោះពី​១៨ឆ្នាំ ដល់​២៤ឆ្នាំ (គិតត្រឹមថ្ងៃទី១ ខែតុលា រៀងរាល់ឆ្នាំ) ត្រូវមាន​សញ្ញាបត្រ​ថ្នាក់​បរិញ្ញាបត្រ ឬ​សញ្ញាបត្រ​មាន​តម្លៃស្មើ និង​លក្ខខណ្ឌ​ផ្សេងៗ​ដែល​អាចនឹង​មាន​ការប្រែប្រួល​ទៅ​តាម​ឆ្នាំ។ ជា​មួយគ្នា​នេះ បេក្ខជន​ដែលមាន​ជំនាញ​ផ្នែក​អក្សរសាស្ត្រ មាន​ចំណេះដឹង​ភាសាអង់គ្លេស មានឆន្ទៈ​ក្នុងការ​សិក្សា មាន​គំនិត​ច្នៃប្រឌិត មាន​ភាព​ជាអ្នក​ដឹកនាំ និង​មាន​ឆន្ទៈ​ក្នុងការជួយ​សង្គម​ក្រោយ​បញ្ចប់ការសិក្សា ក៏ជា​បេក្ខជន​ដែលមាន​អាទិភាពក្នុងការ​ស្នើពាក្យទៅសិក្សាផងដែរ។

គួរបញ្ជាក់​ថា Rhodes Scholarship ជា​អាហារូបករណ៍​ដែល​ផ្ដល់​ជូន​មូលនិធិ​សិក្សា​ពេញ​លេញ ការ​សិក្សាពេញ​ម៉ោង​នៅ​សាកលវិទ្យាល័យ និង​ផ្ដល់ឱកាស​ជាច្រើន​សម្រាប់​បេក្ខជន​ក្នុង​កំឡុង​ពេលស្នាក់​នៅ​ និង​សិក្សា។ ក្រៅពី​សាកលវិទ្យាល័យ Oxford អាហារូបករណ៍ Rhodes ក៏ផ្ដល់​ឱ្យសិក្សា​នៅសាកលវិទ្យាល័យ​ល្បីៗ​ជាច្រើន​ដូចជា សាកលវិទ្យាល័យ Harvard សាកលវិទ្យាល័យ Yale, សាកលវិទ្យាល័យ Princeton, សាកលវិទ្យាល័យ Standford, សាកលវិទ្យាល័យ Chicago និង​សាកលវិទ្យាល័យ​ផ្សេងៗជាច្រើនទៀត។ នេះបើតាម​ការ​ផ្សាយ​របស់​គេហទំព័រ Collegevine។

ជាមួយ​គ្នា​នេះ ប្រសិនបើ​បេក្ខជន​មាន​ចំណាប់អារម្មណ៍​ក្នុងការ​ដាក់ពាក្យ​ស្នើសុំ​អាហារូបករណ៍ Rhodes 2025 បេក្ខជន​អាច​រងចាំ តាមដាន ព័ត៌មាន​នៃអាហារូបករណ៍​ដែលតែង​តែ​ប្រកាស​បើកទទួល​ពាក្យនៅ​ក្នុង​ខែកក្កដា រៀង​រាល់ឆ្នាំ និងអាច​ចូលទៅ​កាន់​តំណរភ្ជាប់ https://rhodes.embark.com/login/apply?target=2025 ដើម្បី​ស្នើពាក្យ​ឆ្នាំសិក្សា​២០២៥៕