អាយុត្រឹមតែ ១០ឆ្នាំប៉ុណ្ណោះ ប៉ុន្តែកុមារី Alisa Perales បានបង្កើត​ប្រវត្តិសាស្ត្រ​ដ៏អស្ចារ្យ​សម្រាប់ខ្លួន​ឯង និង​គ្រួសារ ដោយ​បាន​បញ្ចប់ការ​សិក្សានៅ​មហាវិទ្យាល័យ Crafton Hills College ក្នុង​រដ្ឋកាលីហ្វ័រញ៉ា​នាខែនេះ ដោយ​ទទួលបាន​សញ្ញាបត្រ​បរិញ្ញាបត្ររង ផ្នែកវិទ្យាសាស្ត្រ និងគណិតវិទ្យា។

ជាមួយនឹង GPA ដ៏ល្អឥតខ្ចោះ ក្បែរ 4.0 Alisa ចាត់ទុកសមិទ្ធផល​សិក្សារបស់នាងថា ជាចំណង់​ចំណូលចិត្ត​ដ៏ពិសេសក្នុងការរៀនសូត្រ។

កុមារីរូបនេះ បានប្រាប់ KABC-TV ថា «ការ​សិក្សា​ជារឿងដែល​រីករាយណាស់​សម្រាប់ខ្ញុំ ស្ទើរតែ​សប្បាយដូចជា​ការលេង​នៅខាងក្រៅ ឬ​ជិះកង់ដែរ»។

ឪពុក​របស់ Alisa លោក Rafael Perales បាន​លើកឡើងថា កូនស្រីរបស់គាត់​បានចាប់ផ្ដើម​រៀននៅផ្ទះ តាំងពី​អាយុ ១ឆ្នាំមកម្ល៉េះ។ ដោយ​មានកេរ្តិ៍មរតក​ពីឪពុកម្ដាយ​របស់លោកច្រើន លោក Rafael Perales សម្រេចចិត្តមិន​ទៅធ្វើការ​រកស៊ីនៅខាង​ក្រៅនោះទេ ដោយ​សុខចិត្តធ្វើជា​គ្រូបង្រៀន​កូនស្រី​នៅផ្ទះ​ពេញម៉ោង​តែម្ដង ​ដែលក្មេងៗដទៃ មានអាយុ ដូច Alisa កំពុង​រៀន​មូលដ្ឋាន​គ្រឹះលេខ និងអក្សរ តែ Alisa បាន​ចេះអាន និងដោះស្រាយលំហាត់​គណិតវិទ្យា​ទៅហើយ, នេះបើតាមកាសែត NBC ។

លោក Rafael បាន​និយាយ​ថា ការសិក្សា​នៅផ្ទះ គឺធ្វើឡើងចាប់ពីម៉ោង ៨ព្រឹក ដល់ម៉ោង ៤ល្ងាច ៦ថ្ងៃក្នុង​មួយសប្ដាហ៍។

Alisa បាន​ចូលរៀន​នៅមហាវិទ្យាល័យ Crafton Hills College នៅពេលនាង​មានអាយុ ៨ឆ្នាំ ហើយវត្តមានរបស់នាងនាពេលដំបូង​បានធ្វើឱ្យមិត្តរួមថ្នាក់​មានការភ្ញាក់ផ្អើល​ជាខ្លាំង ដោយ​មានមិត្តរួមថ្នាក់មួយចំនួន​សន្មត់ថា ឪពុករបស់​នាង ជានិស្សិត។

លោកស្រី Sandra Ruiz ជាសាស្ត្រាចារ្យម្នាក់​របស់​ Alisa បានសរសើរពី​ភាពអត់ធ្មត់ និងភាព​ចង់ចេះចង់​ដឹង​របស់នាងជាខ្លាំង។

លោកស្រី​បាន​ប្រាប់ KABC ថា Alisa តែងតែចង់ដឹង និងចង់រៀន ស្វែងយល់អ្វី​ដែលថ្មី​ជានិច្ច ហើយនាង​មិនអនុញ្ញាត​ឱ្យអាយុក្លាយជា​រនាំង រារាំងភាពចង់ចេះចង់ដឹង​របស់នាង​នោះទេ។

ទោះបីជានាង​ទទួលបាន​ភាពជោគជ័យក្នុង​ការសិក្សា​ក៏ដោយ តែ Alisa មានបញ្ហា​ក្នុងការស្វែង​រកមិត្តភក្តិ ដែលមាន​អាយុប្រហាក់​ប្រហែលនាង។ លោក Rafael បានលើកឡើងថា លោក​តែងតែ​នាំ Alisa ជិះកង់នៅ​ក្នុងភូមិ ដើម្បីស្វែង​រកក្មេងៗដទៃ​ទៀត ឱ្យ Alisa មានគ្នា​លេង​ជាមួយ។

ឥឡូវនេះ Alisa មានបំណង​បន្តរៀន​ជំនាញ​វិទ្យាសាស្ត្រកុំព្យូទ័រ នៅ​សាកលវិទ្យាល័យ Stanford ខណៈនាង​បានដាក់​ស្នើសុំចូលរៀន​នៅសាលា​រួចរាល់​ហើយ និង​រង់ចាំតែ​ការឆ្លើយតប​របស់​សាលា​ប៉ុណ្ណោះ៕