កុមារអាចបង្កើតទម្លាប់អាននៅផ្ទះ តាំងពីមុនពេលពួកគេមិនទាន់មានសមត្ថភាពរៀនអានមកម្ល៉េះ។ នេះ គឺជាការលើកឡើង របស់អ្នកនិពន្ធ និងអ្នកជំនាញផ្នែកកុមារតូច ជនជាតិអាមេរិក លោកស្រី Amanda Morin, អ្នកជំនាញរូបនេះ បានបង្ហាញអំពីគន្លឹះងាយៗ ចំនួន ៨ ដែលអាណាព្យាបាលអាចអនុវត្តនៅផ្ទះ ដើម្បីបង្កើតទម្លាប់អានសម្រាប់កុមារ និងកូនជាទីស្រឡាញ់របស់ខ្លួន។

១. មានទម្លាប់អានរាល់ថ្ងៃ ៖ ក្នុងនាមជាអាណាព្យាបាល អ្នកមានតួនាទីយ៉ាងសំខាន់ ក្នុងការបង្ហាញភាពជាគម្រូ ដល់កូន។ អ្នកអាចបណ្ដុះទម្លាប់អានដល់កូន តាំងពីថ្ងៃដែលគេកើតមកម្ល៉េះ។ អ្នកត្រូវបង្កើតទម្លាប់អានសៀវភៅជាមួយកូន មុនពេលចូលគេង, ទារកនឹងឆ្លើយតបជាមួយនឹងសំឡេង ដែលអ្នកអានឮៗជាមិនខាន។

២. អាននៅចំពោះមុខកូន ៖ មិនថាអ្នកចូលចិត្តអានសៀវភៅ ទស្សនាវដ្តី ឬប្រលោមលោកនោះទេ, អ្នកត្រូវបង្កើតពេលវេលាណាមួយ ដែលអនុញ្ញាតឱ្យកូនរបស់អ្នកបានឃើញអ្នកអានសៀវភៅ។ ធម្មជាតិរបស់កុមារតែងតែរៀន និងត្រាប់តាម អ្វីដែលពួកគេសង្កេត និងបានឃើញ។ ប្រសិនបើអ្នករំភើបនឹងការអាន កូនរបស់អ្នកក៏ទំនងជានឹងរំភើបដូចអ្នកដែរ។

៣. បង្កើតកន្លែងអាន ៖ កន្លែងអានរបស់អ្នកមិនចាំបាច់ត្រូវតែធំ ឬមានធ្នើរ ដែលមានសៀវភៅច្រើននោះទេ។ វាអាចជ្រុងណាមួយនៃបន្ទប់ ឬផ្ទះរបស់អ្នក។ ប៉ុន្តែកន្លែងនោះ គួរតែជាកន្លែងដែលមានផាសុកភាព និងពន្លឺគ្រប់គ្រាន់។ ម្យ៉ាងទៀត នៅលើធ្នើរសៀវភៅ គួរតែមានសៀវភៅមួយចំនួន ដែលកូនរបស់អ្នក អាចយកមកមើល ឬអានបាន។

៤. នាំកូនទៅបណ្ណាល័យ ៖ នៅពេលដែលកូនរបស់អ្នកដឹងក្ដី អ្នកអាចនាំគេទៅបណ្ណាល័យ ព្រោះទីនោះ គឺជាកន្លែងដ៏ល្អ សម្រាប់ការស្រាវជ្រាវ និងរកសៀវភៅ ឬស្នាដៃនិពន្ធថ្មីៗ ។ ការជូនពួកគេទៅបណ្ណាល័យ អាចផ្ដល់ឱកាសឱ្យកូនរបស់អ្នក បង្កើតទម្លាប់អាន និងសង្កេតអំពីរបៀបដែលកុមារ និងមនុស្សដទៃទៀតរៀនសូត្រ។

៥. អនុញ្ញាតឱ្យកុមារជ្រើសរើសអ្វីដែលគេចូលចិត្តអាន ៖ ការទៅបណ្ណាល័យ នឹងកា្លយជាដំណើរមួយ ដែលរឹតតែពិសេស នៅពេលដែលអ្នកអនុញ្ញាតឱ្យកូនរបស់អ្នករក និងជ្រើសរើសសៀវភៅ ដែលគេចង់អាន។ ក្មេងៗ គឺមានទំនោរចង់អានអ្វី ដែលគេបានជ្រើសរើស ដោយខ្លួនឯង ប៉ុន្តែអ្នកកំណត់ជ្រើសរើស ឬកំណត់ប្រភេទសៀវភៅ ដែលត្រឹមត្រូវសម្រាប់គេ។

៦. នាំកូនរបស់អ្នកអាន នៅពេលធ្វើសកម្មភាពប្រចាំថ្ងៃ ៖ សម្រាប់កុមារ ការអានមិនចាំបាច់ទាល់តែអានសៀវភៅនោះទេ ប៉ុន្តែពួកគេ អាចអានអ្វី ដែលជាផ្នែកមួយនៃជីវិតប្រចាំថ្ងៃរបស់គេ។ សកម្មភាពនោះ អាចជាការអានផ្លាកសញ្ញាចរាចរណ៍ បញ្ជីគ្រឿងទេស ឬរូបមន្តធ្វើម្ហូបជាដើម។

៧. អានសៀវភៅកូនចូលចិត្តឡើងវិញ ៖ អ្នកប្រហែលជាធុញទ្រាន់ នឹងការអានរឿងដដែល ម្ដងហើយ ម្ដងទៀត ប៉ុន្តែ កូនរបស់អ្នក ប្រហែលជាចូលចិត្តរឿងនេះខ្លាំង។ ក្មេងៗចូលចិត្ត មើលអ្វីដែលពួកគេចូលចិត្តសារឡើងវិញ ហើយការអានឡើងវិញ ក៏អនុញ្ញាតឱ្យពួកគេយល់ដំណើរ ឬសាច់រឿងកាន់តែច្បាស់ដែរ។ ដូច្នេះ គេក៏អាចចាប់ផ្ដើមអានសៀវភៅ សម្រាប់អ្នកស្ដាប់វិញដែរ។

៨. ស្វែងយល់បន្ថែមអំពីរបៀបកុមារអាន ៖ អាណាព្យាបាល ប្រហែលជាមិនមែនជាគ្រូបង្រៀនទេ ប៉ុន្តែអ្នកនៅតែជាគ្រូដំបូងសម្រាប់កូនរបស់អ្នក។ ការយល់ដឹងអំពី លក្ខណៈ និងរបៀបដែលកុមារអានសៀវភៅទៅតាមដំណាក់កាល និងវ័យរបស់ពួកគេ នឹងអនុញ្ញាតឱ្យអ្នកអាចគាំទ្រដល់ការអានរបស់គេកាន់តែមានប្រសិទ្ធភាព៕