ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កុមារដែលខ្មាសអៀន ច្រើនតែពិបាកមានអារម្មណ៍ជឿជាក់ ឬមានទំនុកចិត្តក្នុងការបង្កើតមិត្តភក្ដិ និយាយជាមួយគ្រូ ឬនិយាយក្នុងថ្នាក់រៀន។ ការស្រាវជ្រាវបានបង្ហាញថា អារម្មណ៍ខ្មាសអៀនរបស់កុមារ អាចបណ្ដាលមកពីកត្តាសំខាន់ៗមួយចំនួន ដូចជាកត្តាហ្សែន អារម្មណ៍ភ័យខ្លាចបរាជ័យ កង្វះបទពិសោធន៍ទំនាក់ទំនងក្នុងសង្គម បុគ្គលិកលក្ខណៈពីកំណើត ការទទួលឥទ្ធិពលពីឪពុកម្ដាយ ដែលមានទម្លាប់ខ្មាសអៀនច្រើន ឬកុមាររស់នៅក្នុងគ្រួសារ ដែលមានទម្លាប់ស្ដីបន្ទោស។
ដូច្នេះ ដើម្បីកសាងទំនុកចិត្តឱ្យកុមារ និងជួយឱ្យពួកគេយកឈ្នះភាពភ័យខ្លាច ដើម្បីងាយស្រួលបង្កើតមិត្តភក្ដិ និងទំនាក់ទំនងក្នុងសង្គម។ អាណាព្យាបាល អាចជួយកុមារតាមរយៈវិធីសាស្ត្រចំនួន ៧ ដូចជា៖
១. បង្រៀនកុមារអំពីជំនាញសង្គម ៖ ជាជម្រើសដ៏ល្អ កូនរបស់អ្នកគួររៀនពីរបៀបទំនាក់ទំនងជាមួយអ្នកដទៃ តាំងពីពួកគេនៅក្មេង។ ជំនាញសង្គម មិនគ្រាន់តែសំខាន់ សម្រាប់ការបង្កើតមិត្តភក្ដិប៉ុណ្ណោះទេ ប៉ុន្តែវាក៏មានសារៈសំខាន់ក្នុងការរក្សាចំណងមិត្តភាពផងដែរ។
២. លើកទឹកចិត្តកុមារឱ្យចូលរួមក្នុងសង្គម ៖ ការលើកទឹកចិត្តឱ្យកូនរបស់អ្នកចូលរួមក្នុងសកម្មភាពកីឡា ឬក៏សកម្មភាពផ្សេងៗនៅសាលា គឺជាសកម្មភាពសំខាន់ ដែលជំរុញឱ្យកុមារជជែកជាមួយមិត្តភក្ដិ។ អាណាព្យាបាលអាចពន្យល់ប្រាប់គេថា សកម្មភាពនេះ ជាចំណុចចាប់ផ្ដើមនៃការបង្កើតមិត្តភាព និងមានឱកាសជួបជាមួយមនុស្ស ដែលមានចំណង់ចំណូលចិត្តប្រហាក់ប្រហែលគ្នា។
៣. បង្រៀនពួកគេឱ្យចេះយល់អារម្មណ៍អ្នកដទៃ ៖ ទម្លាប់យកចិត្តទុកដាក់លើអារម្មណ៍អ្នកដទៃ នឹងធ្វើឱ្យកុមារអាចផ្ដោតលើអ្នកដទៃ ច្រើនជាងផ្ដោតលើខ្លួនឯង។ នៅពេលដែលកុមាររៀន អំពីរបៀបពិចារណាអំពីរបៀបដែលអ្នកដទៃមានអារម្មណ៍គិត និងទទួលបទពិសោធន៍ នឹងធ្វើឱ្យមិត្តភក្ដិរបស់គេ កាន់តែមានអារម្មណ៍ចង់ទំនាក់ទំនងជាមួយគេ។
៤. ជួបជាមួយគ្រូពួកគេ ៖ លោកគ្រូអ្នកគ្រូ ដែលបង្រៀនកូនរបស់អ្នក ប្រហែលជាយល់ច្បាស់អំពីអាកប្បកិរិយាកូនរបស់អ្នកនៅក្នុងថ្នាក់រៀន ហើយពួកគាត់ ក៏ទំនងជាមានយោបល់ និងយុទ្ធសាស្ត្រ ដើម្បីពង្រឹងជំនាញសង្គមកូនរបស់អ្នកផងដែរ។ ដូច្នេះ ការជួប និងពិគ្រោះយោបល់ជាមួយលោកគ្រូ អ្នកគ្រូ បង្រៀនកូនរបស់អ្នក គឺជាជម្រើសល្អមួយផងដែរ ក្នុងការស្វែងរកវិធីជួយជំរុញឱ្យកូនរបស់អ្នកកាត់បន្ថយភាពខ្មាសអៀន។
៥. សរសើរឱ្យបានច្រើន ៖ នៅពេលដែលកូនរបស់អ្នក ហ៊ានប្រឈមយ៉ាងក្លាហាននឹងស្ថានការណ៍ ដែលគេមិនធ្លាប់ប្រឈមកាលពីមុន អាណាព្យាបាល ត្រូវលើកទឹកចិត្តពួកគេ ដើម្បីជួយបង្កើនទំនុកចិត្តដល់ពួកគេ ឱ្យក្លាហានជាងមុន និងកាត់បន្ថយភាពខ្មាសអៀន នៅពេលពួកគេជជែកជាមួយមិត្តភក្ដិថ្មីៗ។
៦. ចៀសវៀងការហៅពួកគេថា ជាមនុស្សអៀនច្រើន ៖ កូនរបស់អ្នកទទួលឥទ្ធិពលយ៉ាងខ្លាំង ពីការនិយាយរបស់អ្នក។ ដូច្នេះ ជំនួសឱ្យការនិយាយថា ពួកគេ ជាមនុស្សអៀន ឬលេងសើចនឹងអត្តចរិតនេះ អ្នកអាចផ្ដល់ភាពកក់ក្ដៅឱ្យគេ ឬនិយាយលើកទឹកចិត្តគេ។
៧. ពន្យល់ប្រាប់កុមារអំពីសារៈសំខាន់នៃមិត្តភាព ៖ អ្នកអាចពន្យល់ប្រាប់កុមារថា ការបង្កើតមិត្តភក្តិ គឺមានសារៈសំខាន់ខ្លាំងណាស់។ ការបង្កើតទំនាក់ទំនងដ៏មានន័យមួយ អាចជួយកូនរបស់អ្នកឱ្យកាន់តែរីករាយ និងធ្វើឱ្យជីវិតរបស់គេកាន់តែប្រសើរឡើង។ ហេតុនេះ អ្នកអាចលើកទឹកចិត្តកូនរបស់អ្នក ឱ្យបង្កើតទំនាក់ទំនងល្អជាមួយអ្នកដទៃ តាមរយៈការប្រើភាសាវិជ្ជមាន និងបង្ហាញឱ្យកុមារមើលឃើញពីជ្រុងវិជ្ជមាននៃការចូលក្នុងសង្គម៕
