ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសន្និបាតបូកសរុបការងារអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការវិនិយោគលើកុមារតូចនៅកម្រិតមត្តេយ្យសិក្សា គឺផ្ដោតលើការអប់រំអត្តចរិតរបស់សិស្ស។
បើតាមប្រសាសន៍ឯកឧត្តមបណ្ឌិតសភាចារ្យ ការវិនិយោគលើមត្តេយ្យសិក្សា គឺការអប់រំអត្តចរិក របៀបរបបរស់នៅ ដើម្បីធ្វើឱ្យកុមារអាចត្រៀមខ្លួន ឡើងទៅរៀននៅបឋមសិក្សា មានចំណេះដឹងខ្លះផ្នែកភាសា និងគណិតវិទ្យា។
“ការវិនិយោគលើកុមារសំខាន់ណាស់ ដោយសារការវិនិយោគលើកុមារតូច គឺការវាយតម្លៃទៅលើអត្តចរិក មិនមែនដូចការប្រឡង ឬផ្ដោតទៅលើពិន្ទុទេ”
រដ្ឋមន្រ្តីក្រសួងអប់រំ បន្ថែមថា ឪពុកម្ដាយភាគច្រើនសន្សំលុយទុកឱ្យកូនបន្តការសិក្សានៅឧត្តមសិក្សា ប៉ុន្តែផ្ទុយទៅវិញ ការអនុវត្តការវិនិយោគលើមត្តេយ្យសិក្សានេះ ផ្ដល់នូវផលលាភខ្ពស់ជាងគេ។ ឯកឧត្តមបណ្ឌិតសភាចារ្យ បន្តថា ប្រសិនបើក្មេងទទួលការអប់រំល្អ ពួកគេនឹងរៀនចប់បឋមសិក្សា បន្តទៅមធ្យមសិក្សា និងឧត្តមសិក្សា ហើយនឹងទទួលបានការងារល្អផងដែរ។ ចំពោះសង្គមជាតិទាំងមូលវិញ អាចកាត់បន្ថយបញ្ហាអវិជ្ជមានក្នុងសង្គម ធ្វើឱ្យសង្គមរីកចម្រើន ដោយសារពលរដ្ឋមានការយល់ដឹងច្រើន។
ក្នុងនោះតាមការសិក្សាកម្រិតអន្តរជាតិបង្ហាញឱ្យឃើញថា ការវិនិយោគលើមត្តេយ្យសិក្សា១ដុល្លារ នាំមកនូវផលចំណេញ៧ដុល្លារ ហើយជាការវិនិយោគដែលមានប្រសិទ្ធភាពខ្ពស់ជាងគេ។
លោកស្រី ថង ស្រីម៉ាច នាយិការងសាលាមត្តេយ្យសិក្សាធនធានក្រចេះក្រុង មានប្រសាសន៍ថា សាលាមត្តេយ្យសិក្សា បានដើរតួនាទីយ៉ាងសំខាន់ក្នុងការផ្ដល់នូវការអភិវឌ្ឍសមត្ថភាពកុមារគ្រប់ជ្រុងជ្រោយប្រកបដោយគុណភាព និងប្រសិទ្ធភាព។ លោកស្រីថា សាលាមត្តេយ្យសិក្សាធនធានក្រចេះក្រុង ក៏ទទួលបានកោតសរសើរ និងការទុកចិត្តពីមាតាបិតា ឬអាណាព្យាបាលសិស្ស តាមរយៈការអនុវត្តវិធីសាស្រ្តបង្រៀន បរិស្ថានសិក្សា អនាម័យ និងការអប់រំសីលធម៌និងឥរិយាបទកុមារតូចបានល្អ។
នាយិការងសាលាមត្តេយ្យសិក្សាធនធានក្រចេះក្រុង បញ្ជាក់បន្ថែមថា ជាទិសដៅបន្ទាប់សាលានឹងបន្តពង្រឹងគុណភាពបង្រៀន និងរៀន, បន្តពង្រឹងវិន័យ សីលធម៌ ឥរិយាបទគ្រូ និងកុមារ, បន្តកិច្ចទំនាក់ទំនងជាមួយមាតាបិតា អជ្ញាធរមូលដ្ឋាន សហគមន៍ និងអ្នកពាក់ព័ន្ធ, បណ្ដុះទម្លាប់កុមារស្រឡាញ់សុខភាព និងបរិស្ថាន, កែលម្អបរិស្ថានទាំងក្រៅ និងក្នុងបរិវេណសាលាបន្ថែម និងកៀរគរសហគមន៍ដើម្បីបំពាក់ទូរទស្សន៍ឆ្លាតវៃគ្រប់បន្ទប់៕
