ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងវប្បធម៌ជប៉ុន មានវិធីសាស្ត្រចិញ្ចឹមកូនចំនួន ៨ ដែលត្រូវបានបង្កើតឡើងតាំងពីបុរាណ ហើយបន្តអនុវត្តរហូតមកទល់ពេលបច្ចុប្បន្ន ដោយបញ្ចូលនូវវិធីសាស្ត្រទំនើបខ្លះ។ បច្ចេកទេសនេះ គឺផ្ដោតលើគុណតម្លៃវប្បធម៌ និងជួយជំរុញឱ្យកូនៗ មានភាពធន់នឹងស្ថានការលំបាកៗ, មានភាពរីកចម្រើនបញ្ញាផ្នែកអារម្មណ៍ និងចេះគោរពមនុស្សជុំវិញខ្លួន។
១. រស់នៅដោយផ្ដោតលើបច្ចុប្បន្នភាព ៖ ម្ដាយឪពុកជនជាតិជប៉ុន តែងតែបង្ហាញ និងបង្រៀនកូនៗ ឱ្យស្គាល់អំពីគុណតម្លៃ នៃការផ្ដោតលើបច្ចុប្បន្នភាព។ មូលហេតុចម្បង គឺពួកគេចង់ឱ្យកូន ដឹងពីសារៈសំខាន់ នៃស្មារតីប្រុងប្រយ័ត្ន ការឆ្លើយតបទៅនឹងកិច្ចការចំពោះមុខបានល្អ និងភាពសំខាន់នៃការផ្ដោតអារម្មណ៍។ លើសពីនេះ សកម្មភាពបង្រៀនកូនឱ្យរស់នៅដោយផ្ដោតលើបច្ចុប្បន្នភាព ក៏ជាចំណែកមួយនៃការពង្រឹងទំនាក់ទំនងល្អ រវាងឪពុកម្ដាយ និងកូនៗផងដែរ។
២. ការគោរពចាស់ទុំ ៖ នៅក្នុងវប្បធម៌ជនជាតិជប៉ុន ការគោរពមនុស្សដែលមានវ័យចាស់ជាង ឬចាស់ទុំ គឺជាកាតព្វកិច្ចដែលមនុស្សគ្រប់រូបត្រូវតែអនុវត្ត។ ទម្លាប់នេះ បាននាំឱ្យសមាជិកគ្រួសារ មានទំនាក់ទំនងល្អ មានទំនុកចិត្តលើគ្នា យល់ពីគ្នា និងគោរពឱ្យតម្លៃគ្នាទៅវិញទៅមក ។ ជាពិសេស នេះគឺជាការអប់រំ ដែលបន្ថែមគុណតម្លៃ នៃភាពថ្លៃថ្នូរសម្រាប់កុមារ ព្រមទាំងអាចបង្កើតបរិយាកាសរស់នៅមួយ ដែលមានសីលធម៌ និងសុជីវធម៌រស់នៅល្អ។
៣. ឱ្យតម្លៃលើភាពអត់ធ្មត់ (Menkobu) ៖ សិល្បៈរស់នៅរបស់ជប៉ុនមួយ ដែលមានឈ្មោះថា មែនគូបុ (Menkobu) គឺជាសិល្បៈ ដែលបង្រៀនកុមារឱ្យស្គាល់ពីសារៈសំខាន់ នៃការអត់ធ្មត់ នៅគ្រប់កាលៈទេសៈទាំងអស់ក្នុងការរស់នៅ ។ ដោយសារទទួលបានការអប់រំឱ្យស្គាល់ពីសារៈសំខាន់ នៃការអត់ធ្មត់តាំងពីតូច កុមារជនជាតិជប៉ុន បានធំធាត់ឡើង ជាមួយនឹងវិន័យផ្ទាល់ខ្លួនល្អ ព្រមទាំងអាចប្រឈមមុខនឹងឧបសគ្គចំពោះមុខបានល្អ និងមានភាពធន់នឹងបញ្ហា។
៤. ទំនាក់ទំនងទន់ភ្លន់ ៖ ម្ដាយឪពុកជនជាតិជប៉ុន ផ្ដោតលើការបង្រៀនកូនៗរបស់ខ្លួន អំពីរបៀបទំនាក់ទំនងទន់ភ្លន់ ចេះពិចារណាអំពីអារម្មណ៍អ្នកដទៃ និងជាពិសេស គឺចេះរក្សាគម្លាតនៅទីសាធារណៈ។ មូលហេតុ ព្រោះគេចង់សង្កត់ធ្ងន់ថា ការទំនាក់ទំនងប្រកបដោយភាពទន់ភ្លន់ គឺជាការគោរពអ្នកដទៃ និងជាការបង្ហាញថា គេជាមនុស្សដែលមានបញ្ញាផ្នែកអារម្មណ៍ខ្ពស់ និងជាកុមារ ដែលមានការយល់ដឹង។
៥. មានទំនួលខុសត្រូវខ្ពស់ ៖ ម្ដាយឪពុកជនជាតិជប៉ុន បណ្ដុះស្មារតី នៃការទទួលខុសត្រូវរបស់កូនៗ តាមរយៈការបង្រៀនឱ្យកុមារតូចៗចេះសម្អាតកន្លែងគេង សម្អាតតុអាហារក្រោយពេលញ៉ាំ និងសម្អាតទីធ្លាសាធារណៈនៅពេលចូលរួមកម្មវិធីអ្វីមួយជាដើម។ ការបណ្ដុះទម្លាប់នេះ ជួយឱ្យកុមារអភិវឌ្ឍសីលធម៌នៃការរស់នៅ និងការទទួលខុសត្រូវខ្ពស់ចំពោះការងារ និងកិច្ចការដែលពួកគេធ្វើ។
៦. មានទម្លាប់សម្អាតស្បែកជើង ៖ នៅក្នុងវប្បធម៌ជប៉ុន ការសម្អាតស្បែកជើងនៅខាងក្រៅផ្ទះ គឺជាទម្លាប់ទូទៅមួយ ដែលក្មេងៗតែងតែអនុវត្ត។ វប្បធម៌សាមញ្ញមួយនេះ ជួយឱ្យពួកគេរក្សាបាននូវអនាម័យ និងភាពស្អាត ព្រមទាំងអាចបង្កើតបរិយាកាសរស់នៅដែលមានរបៀបរៀបរយ។
៧. រៀបចំរបស់លេង ៖ ម្ដាយឪពុកជនជាតិជប៉ុន មានទម្លាប់លើកទឹកចិត្តកូនៗរបស់ពួកគេឱ្យយកចិត្តទុកដាក់លើកិច្ចការតូចៗ ដូចជា រៀបចំរបស់លេងឱ្យបានល្អ ក្រោយពេលលេងរួចជាដើម។ ព្រោះគេជឿថា ការបណ្ដុះទម្លាប់នេះ ជាចំណែកបណ្តុះស្មារតី និងការគិតហ្មត់ចត់ ព្រមទាំងអាចបង្កើតកន្លែងរស់នៅ ដែលមានសណ្ដាប់ធ្នាប់ល្អ។
៨. ផ្ដល់ភាពកក់ក្ដៅតាមរយៈការប៉ះ ៖ ការសង្កត់ធ្ងន់លើការប៉ះ ជាផ្នែកមួយនៃការចិញ្ចឹមកូនតូច ព្រោះម្ដាយឪពុកជនជាតិជប៉ុនជឿថា ពួកគេអាចបង្កើតទំនាក់ទំនងផ្នែករាងកាយបានរឹងមាំជាមួយកូនៗរបស់គេ។ ការប៉ះផ្ទៃមុខកូននៅពេលពួកគេនៅតូច អាចបង្កើតបាននូវទំនាក់ទំនងអារម្មណ៍ស៊ីជម្រៅ រវាងម្តាយឪពុកនិងកូន ព្រមទាំងធ្វើឱ្យកូនៗរបស់ពួកគេមានអារម្មណ៍ថាមានសុវត្ថិភាព និងកក់ក្ដៅ៕
