បច្ចុប្បន្នបច្ចេកវិទ្យាស្ថិតនៅគ្រប់ផ្នែកទាំងអស់នៃជីវិតរបស់មនុស្ស, ចាប់ពីស្មាតហ្វូន និងកម្មវិធីទូរស័ព្ទ ដល់កុំព្យូទ័រយួរដៃ និងប្រព័ន្ធផ្សព្វផ្សាយ បច្ចេកវិទ្យាបានក្លាយជាផ្នែកមួយដ៏សំខាន់សម្រាប់ជីវិតកុមារសម័យថ្មី។ ទន្ទឹមនឹងភាពសំខាន់ ការកើនឡើងនៃការគំរាមកំហែង និងគ្រោះថ្នាក់ផ្សេងៗនៅលើអ៊ីនធឺណិតគួរឱ្យកត់សម្គាល់។ ហេតុនេះ ការយល់ដឹងអំពីអក្ខរកម្មឌីជីថល ពិតជាមានសារៈសំខាន់សម្រាប់កុមារ, ខណៈឪពុកម្ដាយ ត្រូវមានទំនួលខុសត្រូវ យកចិត្តទុកដាក់ និងប្រាកដថា កូនរបស់ខ្លួនអាចប្រើប្រាស់បច្ចេកវិទ្យាដោយសុវត្ថិភាព។ យោងតាមការស្រាវជ្រាវបានឱ្យដឹងថា មានហេតុផលចម្បង ៤ ដែលនាំឱ្យអក្ខកម្មឌីជីថលសំខាន់សម្រាប់កុមារ។ 

១. ងាយបង្កើតដានជើងឌីជីថល (Digital footprint) ៖ រាល់មាតិកាទាំងអស់ ដែលបង្ហោះនៅលើបណ្ដាញសង្គម នឹងក្លាយជាដានជើងទិន្នន័យ ឬព័ត៌មាន ដែលយើងអាចរកឃើញនៅលើអ៊ីនធឺណិតថ្ងៃក្រោយ។ ដូច្នេះ កុមារត្រូវយល់ច្បាស់អំពីអ្វីជាដានជើងឌីជីថល ហើយឪពុកម្ដាយ ឬអាណាព្យាបាល ត្រូវពន្យល់គេអំពីទិន្នន័យនេះ និងរបៀបដែលអាចបង្កើតដានជើងឌីជីថលវិជ្ជមាននៅលើបណ្ដាញសង្គម។ ដោយហេតុថា រាល់ដានទិន្នន័យ ដែលកុមារប្រើប្រាស់ គឺមានសារៈសំខាន់ និងអាចជះឥទ្ធិពលដល់កេរ្តិ៍ឈ្មោះរបស់ពួកគេនាថ្ងៃអនាគត។

២. ការរៀបចំមាតិកា គឺជាជំនាញជីវិត ៖ ផ្នែកសំខាន់បំផុតមួយ នៃអក្ខរកម្មឌីជីថល គឺសមត្ថភាពរៀបចំមាតិកា។ ដូច្នេះ ឪពុកម្ដាយអាចពន្យល់ប្រាប់គេអំពីខ្លឹមសារអ្វីខ្លះ ដែលគេអាចបង្ហោះ ចែករំលែក និងទំនាក់ទំនងនៅលើអ៊ឺនធឺណិត។ រាល់អត្ថបទ រូបភាព និងវីដេអូ ដែលពួកគេបង្ហោះ ចែករំលែក ឬបញ្ចេញមតិ គឺបង្ហាញថា ពួកគេជានរណា។ 

ជាអាណាព្យាបាល អ្នកត្រូវប្រាកដថា កូនបានយល់ដឹងអំពីរបៀបគ្រប់គ្រង និងរៀបចំមាតិកា​ ដែលគេត្រូវចែករំលែក។ លើសពីនេះ កុមារដែលចាប់ផ្ដើមប្រើបណ្ដាញសង្គម ត្រូវចេះបែងចែកខ្លឹមសារមាតិកា ដែលមានគុណភាព និងគ្មានគុណភាព។

៣. ការយល់ដឹងពីបច្ចេកវិទ្យាជាស្ពាននាំទៅរកភាពជោគជ័យ ៖ ការយល់ដឹងអំពីសក្តានុពលពេញលេញរបស់បច្ចេកវិទ្យា ពិតជាមានសារៈសំខាន់ខ្លាំងណាស់ សម្រាប់កុមារសម័យឌីជីថល ព្រោះពួកគេត្រូវប្រើបច្ចេកវិទ្យា ដើម្បីស្រាវជ្រាវ រៀនសូត្រ និងរស់នៅក្នុងជីវភាពប្រចាំថ្ងៃ។ អាណាព្យាបាលអាចពន្យល់កូន ឱ្យចេះប្រើ និងទាញប្រយោជន៍ពីបច្ចេកវិទ្យា ហើយបង្ហាញឱ្យពួកគេយល់ថា បច្ចេកវិទ្យាអាចនាំឱ្យជីវិតពួកគេជោគជ័យនាពេលអនាគត។

៤. ទទួលស្គាល់ថាបច្ចេកវិទ្យាសំខាន់ខ្លាំង ៖ បច្ចេកវិទ្យា មិនអាចឃ្លាតឆ្ងាយពីជីវិតយើងនោះទេ, ម្ដាយឪពុកមួយចំនួន គិតថា វិធីល្អបំផុត ដើម្បីដោះស្រាយជាមួយនឹងលំហូរនៃបច្ចេកវិទ្យា គឺហាមមិនឱ្យកុមារប្រើប្រាស់បច្ចេកវិទ្យា។ ប៉ុន្តែជាក់ស្ដែង យើងមិនអាចទប់លំហូរនេះបានឡើយ ផ្ទុយទៅវិញ នេះគឺជាពេលល្អបំផុត ដើម្បីបង្រៀនកូនរបស់អ្នក​ឱ្យយល់ដឹងពីផលវិជ្ជមាន និងអវិជ្ជមាននៃបច្ចេកវិទ្យា ព្រោះនេះជាដំណាក់កាលដែលកុមារស្ថិតក្រោមការគ្រប់គ្រងរបស់អ្នក៕