ក្នុងនាមជាឪពុកម្ដាយ គឺតែងតែចង់ដឹងពីវិធីសាស្ត្រចិញ្ចឹមកូនឱ្យបានល្អ ហើយផ្ដល់នូវភាពរីករាយ ការលើកទឹកចិត្ត និងឱកាសលូតលាស់សម្រាប់កូនដោយឯករាជ្យ។ អ្នកស្រី Alanna Gallo អ្នកជំនាញផ្នែកចិញ្ចឹមកុមារតូច បានបង្ហាញអំពីសកម្មភាពចំនួន ៤ដែលជួយពង្រឹងការទំនាក់ទំនងសង្គម ភាពឈ្លាសវៃផ្នែកអារម្មណ៍ និងភាពធន់សម្រាប់កុមារ។

១. ផ្ដល់សេរីភាពឱ្យក្មេងលេងប្រដាប់លេងដោយគ្មានការរំខាន៖ សកម្មភាពដែលល្អបំផុតមួយ ដើម្បីជំរុញការលូតលាស់របស់កុមារ គឺផ្ដល់សេរីភាពឱ្យពួកគេលេងប្រដាប់លេង ដោយមិនចាំបាច់ណែនាំ ឬបង្ហាញពីរបៀបលេងដល់ពួកគេ។ សកម្មភាពនេះ ផ្ដល់ឱកាសឱ្យកុមារអភិវឌ្ឍជំនាញទន់ និងហ្វឹកហាត់ការគិត។ លើសពីនេះ វាក៏ជាការផ្ដល់ពេលវេលាឱ្យកុមារបានលេងជាមួយមិត្តភក្តិ បងប្អូន​ ហើយរៀនសម្រេចចិត្តធ្វើអ្វីដែលគេចង់ធ្វើ។

២. អនុញ្ញាតឱ្យកុមារលេងនៅក្រៅផ្ទះ ៖ ការចេញទៅខាងក្រៅ មានសារៈសំខាន់សម្រាប់ការអភិវឌ្ឍសុខភាពរាងកាយ និងផ្លូវចិត្តកុមារ។ នៅពេលកុមារមានឱកាសភ្ជាប់ទំនាក់ទំនងជាមួយធម្មជាតិ ពួកគេនឹងអភិវឌ្ឍជំនាញជាច្រើនដូចជា ការស្ដាប់ ការយកចិត្តទុកដាក់ ការគ្រប់គ្រងអារម្មណ៍ និងសមត្ថភាពក្នុងការសហការជាដើម។ យ៉ាងណាមិញ កុមារសម័យថ្មី មិនមានឱកាសក្នុងការរត់លេងក្នុងបរិយាកាសធម្មជាតិ ដូចជា លេងភ្លៀងទឹក ការលេងដី ឬរត់កាត់ភក់នោះទេ។ ប៉ុន្តែម្ដាយឪពុក អាចចំណាយពេលនាំពួកគេឡើងភ្នំ ដើរលេងនៅសួនច្បារ ឬទៅកន្លែងដែលមានធម្មជាតិបៃតងច្រើន។

៣. ធ្វើសកម្មភាពដែលត្រូវមានការប្រុងប្រយ័ត្នខ្ពស់ ៖ ការអនុញ្ញាតឱ្យកុមារធ្វើសកម្មភាព ដែលតម្រូវ​ឱ្យមានការប្រុងប្រយ័ត្នខ្ពស់ដូចជា ការរត់ ការលេងអ៊ូ ការលោតខ្ពស់ៗ និងការរត់ឡើងចំណោតជាដើម នឹងធ្វើឱ្យកុមាររៀនអំពីរបៀបគ្រប់គ្រងហានិភ័យដោយខ្លួនឯង។ លើសពីនេះ ការអនុញ្ញាត​ឱ្យកុមារមានសេរីភាពធ្វើសកម្មភាព លោតលេងលើសាឡុងក្នុងផ្ទះ ឬការឡើងដើមឈើទាបៗ គឺជាមធ្យោបាយមួយ ដែលជួយពួកគេឱ្យកសាងភាពជឿជាក់ ភាពធន់ ភាពឈ្លាសវៃផ្នែកអារម្មណ៍ និងការពារកុមារពីជំងឺផ្លូវចិត្ត។ យ៉ាងណាមិញ ម្ដាយឪពុកត្រូវយកចិត្តទុកដាក់ចំពោះពួកគេ និងធានាថាពួកគេមានសុវត្ថិភាព។

៤. ផ្ដល់ឱកាសឱ្យគេជួយការងារផ្ទះ ៖ ធម្មជាតិរបស់កុមារ គឺចង់ចូលរួមការងារឪពុកម្ដាយ ដូច្នេះ អ្នកគួរអនុញ្ញាតឱ្យគេមានឱកាសការងារផ្ទះខ្លះ ដើម្បីឱ្យគេហ្វឹកហាត់ទទួលខុសត្រូវ និងធ្វើឱ្យគេមានអារម្មណ៍ថា គេជាចំណែកមួយនៅក្នុងផ្ទះ។ ការងារទាំងនោះអាចជាការងារសាមញ្ញ ដូចជា លាង និងបះបន្លែ ហាងខោអាវ បោកខោអាវ ចាក់ទឹកចូលកែវ ឬជូតផ្ទះជាដើម៕