របួស ឬប៉ះទង្គិចផ្លូវចិត្ត កើតឡើងតាមរយៈការប្រទះនឹងព្រឹត្តិការណ៍ដែលមិនល្អជាច្រើន ហើយបណ្តាលឱ្យខកចិត្តក្នុងកម្រិតខ្ពស់ ឬជួបរឿងរ៉ាវដែលភ័យស្លន់សស្លោ ឬខ្លាចជាខ្លាំង។ ដោយហេតុការណ៍ទំាងនោះពាក់ព័ន្ធនឹងដំណើរនៃការរស់នៅ ក៏ដូចជាសុវត្ថិភាពផ្ទាល់ខ្លួនផងដែរ។ មានកត្តាជាច្រើនដែលបណ្តាលឱ្យកើតនូវរបួសឬការប៉ះទង្គិចផ្លូវចិត្ត មានដូចជា ធ្លាប់ទទួលរង់ការរំលោភបំពាន ទទួលរង់ហិង្សាគ្រប់ទម្រង់មិនថាផ្លូវចិត្ត ផ្លូវកាយ សេដ្ឋកិច្ច ឬផ្លូវភេទ។ ទន្ទឹមគ្នានោះរបួសផ្លូវចិត្ត ក៏អាចកើតឡើងតាមរយៈគ្រោះមហន្តរាយដែលកើតឡើងពីធម្មជាតិផងដែរ ។ គេហទំព័រ Kidshealth បានបង្ហាញថា កាលដែលមិនបានយកចិត្តទុកដាក់ចំពោះដំណោះស្រាយទៅកាន់បុគ្គលដែលកើតមាននូវរបួសផ្លូវចិត្ត គឺបានជះផលអវិជ្ជមានជាច្រើនទៅកាន់ពួកគេដូចជា ក្លាយជាក្រុម ឬបុគ្គលគ្មានផ្ទះសម្បែងជាក់លាក់ បាត់បង់គ្រួសារ និងបង្កឱ្យមានជំងឺធ្ងន់ធ្ងរ។

ផលប៉ះពាល់នៃរបួសផ្លូវចិត្តជាទូទៅ

របួសផ្លូវចិត្ត ឬការប៉ះទង្គិចផ្លូវចិត្ត ជំរុញឱ្យសុខភាពផ្លូវចិត្តមិនមានភាពរឹងមាំ ជារឿយៗពួកគេតែងទទួលរងនូវអារម្មណ៍ភ័យៗ គ្មានសុវត្ថិភាព និងគ្មានទំនុកចិត្តទៅលើខ្លួនឯង ឬមនុស្សជុំវិញខ្លួន។ បន្ទាប់ពីប៉ះទង្គិចផ្លូវចិត្ត ស្ថានភាពអារម្មណ៍ពួកគេបានដក់ជាប់នូវអារម្មណ៍មួយដែលគួរឱ្យភ័យខ្លាចចំពោះហេតុការណ៍មិនល្អ កាលពីមុនៗ មានអារម្មណ៍តានតឹង កើតទុក្ខ ខឹងសម្បារ រួមទាំងភាពខ្មាស់អៀនទៀតផង។ បន្ថែមពីនោះ ពួកគេបានដាក់បន្ទុកចំពោះខ្លួនឯង ឬទម្លាក់កំហុសនិងបន្ទោសខ្លួនឯងទាំងស្រុងទៅលើរឿងរ៉ាវដែលបានកើតមានកាលពីអតីតកាល ដែលជាចំណោទបញ្ហាមួយធ្វើឱ្យអ្នកដែលប៉ះទង្គិចផ្លូវចិត្ត មិនផ្តល់គុណតម្លៃខ្លួនឯងចំពោះជីវិតរស់នៅ ហើយមានអារម្មណ៍ខ្លោចផ្សារជាប្រចាំ។

របួសផ្លូវចិត្ត ប៉ះពាល់ទៅដល់អារម្មណ៍ អាកប្បកិរិយា និងគុណភាពនៃការទទួលទានដំណេក រហូតឈានទៅដល់ការកើតមានអាការៈ​ធ្លាក់​ទឹក​ចិត្ត។ ចំណែកឯ សុខភាពផ្លូវចិត្តចំពោះអ្នកដែលទទួលរងនូវការប៉ះទង្គិចផ្លូវចិត្ត ធ្វើឱ្យពួកគេចេះតែមានអារម្មណ៍ភ័យខ្លាចជាញឹកញយពេលនឹកទៅដល់អតីតកាល និងសុបិនមិនល្អរាល់ពេលគេង ដែលជាហេតុធ្វើឱ្យពួកគេមិនចង់រំឮករាល់អ្វីដែលកើតមានមិនល្អកន្លងមក។

បន្ទាប់ពីបានដឹង ឬទទួលស្គាល់អំពីបទពិសោធន៍របួស ឬការប៉ះទង្គិចផ្លូវចិត្ត មនុស្សមួយចំនួនហ៊ាននិយាយចែករំលែកចេញមកក្រៅ ប៉ុន្តែមួយចំនួនទៀតបានលាក់និងកប់ទុកនៅក្នុងចិត្តតែម្នាក់ឯង ដោយពួកគេព្យាយាមលាក់អារម្មណ៍ ឬក៏ព្យាយាមបំភ្លេចចេញពីខួរក្បាល ។ ដោយសារតែអ្នកប៉ះទង្គិចផ្លូវចិត្តមួយចំនួនអាចនឹងស្មានថា អ្នកដទៃតែងរំពឹងថា យូរៗទៅវានឹងមិនអីនោះទេ ហើយអាចនឹងជាសះស្បើយនៅពេលណាមួយដោយឯងៗ។

ផលប៉ះពាល់ក្នុងរយៈពេលវែងដោយការៈប៉ះទង្គិចផ្លូវចិត្ត

អារម្មណ៍ដែលទទួលរងរបួសផ្លូវចិត្តដោយរឿងរ៉ាវកាលពីអតីតកាល អាចប៉ះពាល់ក្នុងរយៈពេលវែង តាមរយៈអាការៈដូចជា ភាពតាងតឹង ស្ត្រេស នៅដាច់ឆ្ងាយតែម្នាក់ឯង គេចពីមនុស្សម្នាដែលធ្លាប់ស្គាល់ ប្រើប្រាស់ភេសជ្ជៈដែលមានជាតិអាល់កុលច្រើន ឬប្រើគ្រឿងញៀន ហើយជាស្ថានភាពមួយដែលពិបាកនឹងស្ដារឡើងវិញ ឬពិបាកក្នុងការកែប្រែទៅរកភាពល្អប្រសើរ។

គន្លឹះនិងដំណោះស្រាយដែលអាចតទល់នឹងនឹងការប៉ះទង្គិចផ្លូវចិត្ត

បន្ទាប់ពីបានដឹងរាល់កត្តាដែលបណ្តាលឱ្យប៉ះទង្គិចផ្លូវចិត្ត និងបញ្ហាប្រឈមជាទូទៅ ក៏ដូចជាក្នុងរយៈពេលវែងរួចហើយ ដូច្នេះមកដឹងអំពីដំណោះស្រាយមួយចំនួនដូចខាងក្រោម៖

១. និយាយទៅកាន់មនុស្សដែលទុកចិត្ត ៖ សូមកុំគេចវេសពីបញ្ហាដ៏សំខាន់មួយនេះ ការរិះរកដំណោះស្រាយជាជំហានដែលចាំបាច់ ដោយការជ្រើសយកនរណាម្នាក់ដែលមានអារម្មណ៍សិទ្ធស្នាលរួមទាំងពេញចិត្តនឹងស្តាប់ក៏ដូចជាផ្តល់ក្ដីព្រួយបារម្ភដែលចេញពីចិត្ត ដូចជាសមាជិកគ្រួសារ អ្នកប្រឹក្សាប្រចាំសាលា អ្នកជំនាញសុខភាពផ្លូវចិត្ត គ្រូបង្រៀន ឬអ្នកបង្វឹកបង្ហាត់ណាម្នាក់។ ដូច្នេះការជ្រើសរើសក្រុមមនុស្សណាម្នាក់ដែលអាចកំដរជជែកបានដោយសុទ្ធចិត្ត សុទ្ធសឹងតែជាចំណែកជួយតទល់នឹងការប៉ះទង្គិចផ្លូវចិត្ត។

២. ទទួលយកជំនួយ ៖ ការបើក​ឱកាសឱ្យខ្លួន​ឯងទទួលបានជំនួយតាមរយៈមជ្ឈដ្ឋានខាងក្រៅ ដូចជាការសួរនាំអំពីអ្នកជំនាញ តាមរយៈមិត្ត ឬក៏គ្រូបង្រៀនដែលនៅក្បែរខ្លួនដើម្បីព្យាបាលការៈប៉ះទង្គិចផ្លូវចិត្ត គឺជាការផ្តល់ភាពងាយស្រួលក្នុងការដោះស្រាយនូវអ្វីដែលបានជួបប្រទះកន្លងមក ដើម្បីពង្រឹងនូវភាពខ្លាំង ក៏ដូចជាសក្តានុពលទាំងឡាយដែលកប់ទុកក្នុងខ្លួនកន្លងមក។

៤. ធ្វើសកម្មភាពដែលនាំឱ្យចិត្តស្រស់បស់ ៖ មានសកម្មភាពជាច្រើនដែលនាំឱ្យខួរក្បាលមានភាពស្រឡះដូចជា ដកដង្ហើមឱ្យវែងៗ ផ្តោតលើដង្ហើមចេញចូល ធ្វើសមាធិ និងធ្វើយូហ្គាជាដើម។

៥. ជ្រើសយកសម្មភាពណាដែលខ្លួនពេញចិត្ត ៖ ចំពោះបុគ្គលប៉ះទង្គិចផ្លូវចិត្តមិនងាយស្រួលពេកនោះទេក្នុងការទាញឱ្យបាននូវផ្នត់គំនិតវិជ្ជមានក្នុងដំណើររស់នៅប្រចាំថ្ងៃ ឬការទាញបាននូវថាមពលមកក្នុងខ្លួន។ ដូច្នេះសកម្មភាពដែលអាចសម្រេចបានក្នុងចំណុចនេះគឺ ព្យាយាមលេងឱ្យបានច្រើន ទៅរកមិត្តនិយាយគ្នា ធ្វើសកម្មភាពទាំងឡាយណាដែលទាញបាននូវសំណើចដើម្បីកាត់បន្ថយស្រ្តេស និងបន្ថយភាពតាងតឹង។ មួយវិញទៀតអាចបង្កើនភាពរីករាយតាមរយៈការចម្អិនម្ហូបអាហារ ស្តាប់តន្រ្តី មើលសិល្បៈ និងសកម្មភាពដទៃទៀតដែលអាចកាត់បន្ថយអារម្មណ៍អវិជ្ជមានទាំងឡាយ។

៦. ជួយអ្នកដទៃ ៖ កិច្ចការស្ម័គ្រចិត្ត ថែរសត្វ ទៅមណ្ឌលថែទាំចាស់ជរា និងកិច្ចការក្នុងសហគមន៍ជាដើម គឺជាចំណែកក្នុងការកាត់បន្ថយចំពោះការគិតដែលមិនចាំបាច់។ ទន្ទឹមគ្នានោះការជួយទៅកាន់អ្នកដទៃគឺជាសកម្មភាពដែលទាញបាននូវអារម្មណ៍សុភមង្គល។

៧. ជឿជាក់ថាអ្នកអាចសម្រេចបាន ៖ ចំណុចសំខាន់ចុងក្រោយ អ្នកគឺជាបុគ្គលម្នាក់ដ៏សំខាន់ និងមានតួនាទីជឿជាក់ចំពោះខ្លួនឯង ដោយហេតុថា មនុស្សម្នាក់ៗសុទ្ធតែមានសមត្ថភាពក្នុងការពង្រឹងខ្លួនឯងឱ្យកាន់តែប្រសើរជាងមុនទ្វេដង​មិនថាមានបញ្ហាគ្របសង្កត់យ៉ាងណានោះទេ។ ប៉ុន្តែអ្វីដែលត្រូវការនោះគឺការប្តេជ្ញា និងអត់ធ្មត់ រួមទាំងទទួលយកជំនួយពីមជ្ឈដ្ឋានខាងក្រៅ៕