ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកត្រូវតែមានភាពឈ្លាសវៃ ប្រសិនបើអ្នកចង់ឱ្យអ្នកដទៃយកចិត្តទុកដាក់ស្ដាប់ នៅពេលអ្នកនិយាយ។ នេះគឺជាការលើកឡើងរបស់ លោក Matt Abraham ជាអ្នកជំនាញ និងជាអ្នកប្រឹក្សាផ្នែកទំនាក់ទំនង និងជាសាស្ត្រាចារ្យបង្រៀនអំពីអកប្បកិរិយាមនុស្ស នៅសាកលវិទ្យាល័យ Stanford ។ អ្នកជំនាញរូបនេះ បានបង្ហាញពីវិធីសាស្ត្រ ២ យ៉ាង ដែលអ្នកអាចអនុវត្ត ដើម្បីទាក់ទាញអ្នកដទៃ ឱ្យចាប់អារម្មណ៍មកលើអ្នក នៅអំឡុងពេលដែលអ្នកនិយាយ។
១. កុំនិយាយអ្វីទាំងអស់
បើតាមអ្នកជំនាញរូបនេះ វិធីសាស្ត្រដ៏មានប្រសិទ្ធភាពបំផុតមួយ ដើម្បីទាក់ទាញចំណាប់អារម្មណ៍អ្នកដទៃ គឺមិននិយាយអ្វីទាំងអស់។ ប៉ុន្តែអ្នកត្រូវប្រាកដថា នៅពេលដែលអ្នកចូលទៅក្នុងចំណោមនុស្សច្រើន ឬស្ថិតក្នុងកិច្ចប្រជុំ អ្នកដទៃពិតជាបានឃើញអ្នក។ នៅពេលដែលអ្នកដទៃបានឃើញអ្នក ប៉ុន្តែមិនបានស្ដាប់ ឬឮសំឡេងអ្នកនិយាយ វានឹងធ្វើឱ្យគេចង់ស្ដាប់នៅពេលដែលអ្នកចាប់ផ្ដើមនិយាយ។
២. និយាយតែក្នុងករណីចាំបាច់
លោក Abraham លើកឡើងថា ការនិយាយតែអ្វីដែលសំខាន់ មានឥទ្ធិពល និងបំផុសគំនិត ក៏ជាផ្នែកមួយ ដែលទាក់ទាញចំណាប់អារម្មណ៍អ្នកដទៃឱ្យស្ដាប់យើងផងដែរ។
ម្យ៉ាងទៀត ការនិយាយរបស់អ្នក ត្រូវតែមានលក្ខណៈសាមញ្ញ ងាយយល់ និងផ្ដល់គំនិត។ ឬក៏អាចសាកល្បងវិធីសាស្ត្រផ្សេងទៀតគឺ នៅពេលដែលអ្នកចាប់ផ្ដើម ធ្វើបទបង្ហាញធំអ្វីមួយ សូមភ្ជាប់ជាមួយនឹងការសួរសំណួរ ដើម្បីទាក់ទាញចំណាប់អារម្មណ៍អ្នកដទៃ និងបង្កើតបរិយាកាសមួយ ដែលទាញពួកគេឱ្យចូលរួមគិតអំពីអ្វី ដែលអ្នកកំពុងនិយាយ។
ចំណុចដែលសំខាន់មួយទៀតនោះគឺ ប្រយោគដែលអ្នកនិយាយ គឺតែឃ្លាដែលមានន័យគ្រប់គ្រាន់ បង្ហាញនូវភាពប្រាកដនិយម ឬលក្ខណៈជាក់ស្ដែង មានភ្ជាប់ជាមួយការពន្យល់ច្បាស់លាស់ និងផ្ដល់នូវព័ត៌មាន៕
