ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសចូលរួមពិធីសម្ពោធដាក់ឱ្យដំណើរការជាផ្លូវការរោងចក្រដំឡើងរថយន្ត តូយ៉ូតា នៅកម្ពុជានាព្រឹកថ្ងៃទី២ ខែឧសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានសម្តែងសុទិដ្ឋិនិយម និងក្តីសង្ឃឹមយ៉ាងមុតមាំថា ធនធានមនុស្ស និងកម្លាំងពលកម្មជំនាញវ័យក្មេងប្រកបដោយចីរភាពរបស់កម្ពុជា គឺជាធនធានទាក់ទាញការវិនិយោគប្រភេទឧស្សាហកម្មផ្អែកលើជំនាញជាបន្តបន្ទាប់ទៀតមកកាន់ប្រទេសកម្ពុជា។
តាមរបាយការណ៍របស់ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងថា បច្ចុប្បន្ននេះ កម្ពុជាមានរោងចក្រតម្លើងរថយន្តចំនួន៦ ដោយក្នុងនោះ ៤កំពុងដំណើរការ និង ២ទៀតកំពុងស្ថិតនៅក្នុងដំណាក់កាលសាកល្បង ដែលមានទីតាំងស្ថិតនៅក្នុងខេត្តបន្ទាយមានជ័យ កោះកុង ពោធិ៍សាត់ ស្វាយរៀង កណ្តាល និងរាជធានីភ្នំពេញ។
សម្តេចធិបតី ហ៊ុន ម៉ាណែត បានបញ្ជាក់ថា ជាចក្ខុវិស័យរបស់រាជរដ្ឋាភិបាលនីតិកាលទី៧នេះ គឺការជំរុញកែប្រែ និងការធ្វើទំនើបកម្មរចនាសម្ព័ន្ធឧស្សាហកម្មនៅកម្ពុជាពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញ ស្របតាមគោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥ សំដៅរួមចំណែកដល់ការបង្កើនតម្លៃបន្ថែមខ្ពស់ ដែលទ្រទ្រង់ដល់កំណើនសេដ្ឋកិច្ចប្រកបដោយចីរភាព និងបរិយាបណ្ណ ការបង្កើតការងារ ការបង្កើនប្រាក់ចំណូលសមស្របនឹងជីវភាពកាន់តែប្រសើរឡើងជូនដល់បងប្អូនប្រជាពលរដ្ឋយើង ។ ជាមួយនេះ ព្រះរាជាណាចក្រកម្ពុជាក៏មានចក្ខុវិស័យប្រែក្លាយខ្លួនជាមជ្ឈមណ្ឌលប្រមូលផ្តុំសកម្មភាពផលិតគ្រឿងបង្គុំយានយន្ត និងបរិក្ខាអេឡិចត្រូនិចសម្រាប់នាំចេញទៅទីផ្សារក្នុងតំបន់ និងសាកលលោក ដែលការសម្រេចបានចក្ខុវិស័យនេះ នឹងនាំមកនូវផ្លែផ្កាវិជ្ជមានជាច្រើនសម្រាប់ការអភិវឌ្ឍសង្គមជាតិកម្ពុជា។
យ៉ាងណាក៏ដោយ ដើម្បីសម្រេចបានចក្ខុវិស័យនេះ ផែនទីបង្ហាញផ្លូវនៃការអភិវឌ្ឍយានយន្ត និងអេឡិចត្រូនិចកម្ពុជា បានកំណត់វិធានការជាអាទិភាពតាមផ្នែកចំនួន៥ ដែលរួមមាន ទី១ យុទ្ធសាស្រ្ត និងការសម្របសម្រួលអន្តរស្ថាប័ន ទី២ ធនធានមនុស្ស និងនវានុវត្ត ទី៣ ហេដ្ឋារចនាសម្ព័ន្ធ ទី៤ កិច្ចសម្រួលពាណិជ្ជកម្ម និង ទី៥ បរិយាកាសធុរកិច្ច និងការវិនិយោគ។
បើតាមប្រសាសន៍បញ្ជាក់របស់សម្តេចនាយករដ្ឋមន្រ្តី ក្នុងស្មារតីបុរេសកម្ម និងការឆ្លើយតបទៅនឹងចក្ខុវិស័យខាងលើនេះ រាជរដ្ឋាភិបាលបានដាក់ចេញនូវវិធានការគាំទ្រមួយចំនួន ដែលមានរំលេចនៅក្នុងយុទ្ធសាស្រ្តបញ្ចកោណដំណាក់កាលទី១ ដូចជា ច្បាប់នៃការវិនិយោគនៅព្រះរាជាណាចក្រកម្ពុជា, អនុក្រឹតស្តីពីការគ្រប់គ្រងតំបន់សេដ្ឋកិច្ចពិសេស, កម្មវិធីបណ្តុះបណ្តាលវិជ្ជាជីវៈ និងបច្ចេកទេស ដល់យុវជន យុវនារីមកពីគ្រួសារជួបការលំបាក និងគ្រួសារងាយរងហានិភ័យនៅទូទាំងប្រទេស, មូលនិធិអភិវឌ្ឍជំនាញ ព្រមទាំងគោលនយោបាយ និងយុទ្ធសាស្រ្តពាក់ព័ន្ធផ្សេងទៀត ។
សូមជំរាបដែរថា រោងចក្រដំឡើងរថយន្តតូយ៉ូតា ដែលត្រូវដាក់សម្ពោធឱ្យដំណើរការ ជាក្រុមហ៊ុនឯកជនបង្កើតឡើងដោយក្រុមហ៊ុនមេ TOYOTA TSUSHO CORPORATION នៃប្រទេសជប៉ុន មានភាគហ៊ុនចំនួន ៩០ភាគរយ និងក្រុមហ៊ុន គង់ នួន គ្រុប ចំនួន ១០ភាគរយ។ រោងចក្រនេះមានសមត្ថភាពដំឡើងរថយន្តចំនួន ២ប្រភេទ ទី១៖ ជាប្រភេទ SUV ម៉ាក FORTUNER និងទី២៖ ជាប្រភេទ Pick-UP ម៉ាក HILUX ដោយមានបុគ្គលិកសរុបចំនួន ១៥០នាក់ ហើយរំពឹងថា នឹងដំឡើងរថយន្តចំនួន ១,៣២០គ្រឿងសម្រាប់ផ្គត់ផ្គង់តម្រូវការទីផ្សារ (Market demand) ឆ្នាំ២០២៤៕
