យុវជន សារិ ពុទ្ធិពណ្ណរាយ បច្ចុប្បន្ន​ជានិស្សិតឆ្នាំទី៣ ជំនាន់ទី១៦ មហាវិទ្យាល័យអេឡិចត្រូនិក នៃវិទ្យាស្ថានជាតិពហុបច្ចេកទេសកម្ពុជា (NPIC) ។ យុវជនរូបនេះ បានក្លាយជាម្ចាស់ពានរង្វាន់ការស្រាវជ្រាវ និងអភិវឌ្ឍន៍ឌីជីថលល្អបំផុតប្រចាំឆ្នាំ (Best Digital R&D of the Year)​ នៅក្នុងកម្មវិធីប្រកួតពានរង្វាន់​ឌីជីថល​កម្ពុជាឆ្នាំ២០២៣ ។

សារិ ពុទ្ធិពណ្ណរាយ ដែលក៏​មានតួនាទីជាអ្នកសម្របសម្រួលការស្រាវជ្រាវនិងអភិវឌ្ឍន៍ នៃក្រុមហ៊ុន Chalatex បានប្រាប់ឱ្យដឹងថា មូលហេតុដែលរូបខ្លួនចូលរួមក្នុងកម្មវិធីប្រកួតពានរង្វាន់ឌីជីថលកម្ពុជាឆ្នាំ២០២៣ គឺ ទី១.មើលឃើញពីការវិវត្តនៃបច្ចេកវិទ្យាថ្មីៗ ក៏ដូចជាការអភិវឌ្ឍនូវវិស័យឌីជីថលកាន់តែកើនឡើងច្រើនទៅៗ, ទី២. ចូលរួមដើម្បីទទួលបានបទពិសោធន៍យកបច្ចេកវិទ្យា និងទី៣. ចង់បង្កើតនូវទំនាក់ទំនងរវាងអ្នកអភិវឌ្ឍកម្មវិធី ឬក៏សហគ្រិនថ្មី (Start Up) ដើម្បីផ្លាស់ប្ដូរបទពិសោធន៍ទៅវិញទៅមក។

និសិត្ស សារិ ពុទ្ធិពណ្ណរាយ បន្ថែមថា ជាលទ្ធផល “CAM-Science” ដែលជាគម្រោងកម្មវិធីទូរស័ព្ទដៃឆ្លាតវៃ គ្រប់គ្រងប្រព័ន្ធទឹកសម្រាប់ប្រជាកសិករ ទទួលបានជ័យលាភីលេខ១ ក្នុងពានរង្វាន់ការស្រាវជ្រាវ និងអភិវឌ្ឍន៍ឌីជីថលល្អបំផុតប្រចាំឆ្នាំ២០២៣ ដែលវាជារឿងគួរឱ្យភ្ញាក់ផ្អើលព្រោះបច្ចេកវិទ្យារបស់ក្រុមខ្លួនកំពុងតែអភិវឌ្ឍបន្ថែមទៀត។ ទន្ទឹមគ្នានេះ បើទោះបីជាគម្រោងមួយនេះទទួលបានជ័យលាភីឆ្នើមក៏ដោយ ក៏នៅតែបន្ថែមជាមួយមុខងារសំខាន់ជាច្រើនផ្សេងទៀតដើម្បីបង្កឱ្យមានភាពងាយស្រួលដល់ការប្រើប្រាស់។

«នៅពេលជាប់ជ័យលាភីខ្ញុំមានអារម្មណ៍ថាសប្បាយចិត្ត និងរីករាយចំពោះអ្វីដែលយើងខំប្រឹងកន្លងមក គឺចាប់តាំងពីឆ្នាំ២០២១ រហូតដល់បច្ចុប្បន្ន គឺបានទទួលផ្លែផ្កា ហើយពួកយើងក៏នៅតែបន្តអភិវឌ្ឍបច្ចេកវិទ្យាដោយកំណត់គោលដៅនូវអ្វីដែលយើងចង់បានបន្តទៀត»។

និសិត្ស សារិ ពុទ្ធិពណ្ណរាយ អ្នកសម្របសម្រួលការស្រាវជ្រាវនិងអភិវឌ្ឍន៍ នៃក្រុមហ៊ុន Chalatex

អ្នកសម្របសម្រួលការស្រាវជ្រាវនិងអភិវឌ្ឍន៍រូបនេះ បញ្ជាក់ថា CAM-Science បានបង្កើតឧបករណ៍មួយឈ្មោះថា CAM-Smart Irrigation ជាប្រព័ន្ធស្រោចស្រពដំណាំឆ្លាតវៃ ដែលជួយកសិករអាចបញ្ជាទឹកបិទ ឬបើក អាចកំណត់កាលវិភាគស្រោចស្រព ឬពិនិត្យមើលសំណើមដីពីចម្ងាយតាមរយៈទូរស័ព្ទដៃបានគ្រប់ទីកន្លែង។ យុវជន ពុទ្ធិពណ្ណារាយ បន្ថែមថា ការបង្កើតគម្រោងនេះឡើង គឺដោយសារតែខ្លួនបានមើលឃើញអំពីផលលំបាករបស់កសិករទាក់ទងជាមួយបញ្ហាកង្វះស្បៀងអាហារ ដែលនាំឱ្យប្រជាជននៅតាមបណ្ដាប្រទេសមួយចំនួននឹងខ្វះខាតចំណីអាហារ នៅឆ្នាំ២០៥០ខាងមុខ។ ម្យ៉ាងវិញទៀត ប្រទេសកម្ពុជាក៏ផ្ដោតសំខាន់ទៅលើវិស័យកសិកម្ម ។ ការបង្កើតគម្រោងមួយនេះដំបូងឡើយ គឺមានសមាជិកត្រឹមតែ២ទៅ៣នាក់ប៉ុណ្ណោះ ប៉ុន្តែរហូតមកដល់បច្ចុប្បន្ននេះ គម្រោងមានសមាជិករហូតទៅដល់ ១២នាក់ហើយ ។

និស្សិតឆ្នាំទី៣ រូបនេះ បន្ថែមថា ចំពោះបញ្ហាប្រឈមធំបំផុតនៅក្នុងការបង្កើតគម្រោងនេះដំបូង គឺការខ្វះបទពិសោធន៍ក្នុងការបង្កើតបច្ចេកវិទ្យាដោយសារតែពេលនោះក្រុមរបស់ខ្លួននៅក្មេង ហើយក៏មិនសូវដឹងអំពីការធ្វើអាជីវកម្ម។ មួយទៀតទាក់ទងជាមួយនឹងសម្ភារៈប្រើប្រាស់ដែលមាននៅក្នុងស្រុក គឺមិនឆ្លើយតបទៅនឹងអ្វីដែលក្រុមខ្លួនចង់បាន ទៅលើការប្រើប្រាស់របស់ប្រជាកសិករ ដូច្នេះហើយទើបសម្រេចចិត្តបង្កើតគម្រោងនេះដោយខ្លួនឯង។ ចំណែក របៀបដោះស្រាយបញ្ហាវិញសមាជិកក្រុមរបស់ខ្លួនតែងតែជួបជុំពិភាក្សាគ្នា និងមានស្មារតីជាក្រុម។

សារិ ពុទ្ធិពណ្ណរាយ បន្តថា លក្ខណៈពិសេសដែលជំរុញឱ្យ “CAM-Science” ទទួលបានជ័យលាភីគឺដោយសារវិធីសាស្រ្តចំនួន៣ គឺ១. ប្រើប្រាស់ស៊ីមកាត៖ សម្រួលដល់ប្រជាជនដែលមិនមានអ៊ីនធឺណិត អាចប្រើប្រាស់បាន ២. ប្រើប្រាស់ wifi៖ កសិករដែលចង់ប្រើប្រាស់នៅផ្ទះ ចំការនានាដែលនៅជិតផ្ទះរបស់គាត់គាត់ ទី៣. ប្រើប្រាស់រលកបច្ចេកវិទ្យាអត់ខ្សែ ៖ មិនតម្រូវឱ្យកសិករប្រើប្រាស់អ៊ីនធឺណិត ឬ wifi ។ ពុទ្ធិពណ្ណរាយ បន្តថា “CAM-Science” បង្កើតឡើងសម្រាប់កសិករកម្ពុជា ដោយបានចុះសម្ភាសន៍ ស្រង់ទិន្ន័យ និងត្រួតពិនិត្យទីតាំងកសិករ ហើយក្នុងនាមជាកូនកសិករស្រាប់ លោកពិតអាចដឹងច្បាស់អំពីផលលំបាក ឬក៏បញ្ហាផ្សេងៗដែលកសិករជួបប្រទះពេលដាំបន្លែ។ ហេតុនេះ ទើបបច្ចេកវិទ្យានេះ អាចប្រើប្រាស់បានសម្រាប់ប្រជាជនកម្ពុជា ហើយបើទោះជាឧបករណ៍នាំចូលពីបរទេសក៏មិនអាចយល់ច្បាស់អំពីតម្រូវការរបស់ប្រជាជនខ្មែរចង់បាននោះឡើយ។

យើងចង់ឱ្យកសិករទទួលបាននូវភាពងាយស្រួលក្នុងការប្រើប្រាស់បច្ចេកវិទ្យានៅក្នុងការដាដុះរបស់ខ្លួន ដើម្បីជួយផ្ដល់ពេលវេលាគ្រប់គ្រាន់សម្រាប់​ឱ្យពួកគាត់ចំណាយពេលជាមួយក្រុមគ្រួសារ កាត់បន្ថយការចំណាយកម្លាំងពលកម្មរបស់ពួកគាត់ទៅលើការស្រោចដំណាំ ។

និសិត្ស សារិ ពុទ្ធិពណ្ណរាយ អ្នកសម្របសម្រួលការស្រាវជ្រាវនិងអភិវឌ្ឍន៍

យុវជនឆ្នើមរូបនេះ បញ្ជាក់ថា តាមរយៈការចុះទៅសម្ភាសន៍កសិករដោយផ្ទាល់ ឃើញថា ប្រជាកសិករប្រើប្រាស់រយៈពេលជាង ៦ម៉ោងដើម្បីស្រោចដំណាំ ទើបអាចប្រមូលផលបន្លែឬដំណាំយកទៅលក់នៅទីផ្សារបាន ប៉ុន្តែនៅពេលគាត់ត្រឡប់មកប្រើប្រាស់ប្រព័ន្ធស្រោចដំណាំឆ្លាតវៃ ពួកគាត់អាចមានពេលវេលាច្រើននៅក្នុងការដឹកបន្លែដែលប្រមូលផលបានយកទៅលក់នៅតាមទីផ្សារ ហើយពួកគាត់អាចបង្កើតមុខរបរបន្ថែមបាន។ លើសពីនេះ វាជាការរួមចំណែកជួយអភិវឌ្ឍបច្ចេកវិទ្យាកម្ពុជាកាន់តែទំនើបទៅទំនើបទៅដោយយើងប្រើប្រាស់បច្ចេកវិទ្យាផ្សារភ្ជាប់ជាមួយនឹងវិស័យកសិកម្ម។

យ៉ាងណាក៏ដោយ យុវជន សារិ ពុទ្ធិពណ្ណរាយ ក៏សំណូមពរទៅដល់យុវជនទាំងអស់ដែលមានចិត្តស្រឡាញ់ផ្នែកបច្ចេកវិទ្យា និងចង់បង្កើតជាអាជីវកម្ម សូមខិតខំរៀនសូត្រ ហើយស្វែងរកក្រុមមួយដែលត្រឹមត្រូវ មានចិត្តគំនិតដូចគ្នា ដើម្បីចូលរួមដោះស្រាយបញ្ហានៅក្នុងប្រទេសរបស់យើងទៅតាមដំណាក់កាលនីមួយៗមិនថាជាបញ្ហាតូចឬធំនោះទេ៕