ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាន់តែខិតជិតមលដល់ ហើយជាពេលវេលាដែលសិស្សានុសិស្សជាបេក្ខជនប្រឡងត្រូវត្រៀមខ្លួនឱ្យបានរួចរាល់ទាំងចំណេះដឹង សមត្ថភាព និងសុខភាព។ លោក សាន គឹមស័ង ជាអតីតសិស្សនិទ្ទេស A ឆ្នាំ២០១៩ និងជា​សិស្សពូកែគណិតវិទ្យាទូទាំងប្រទេស បានចែករំលែកគន្លឹះត្រៀមខ្លួនបីសប្ដាហ៍មុនប្រឡងបាក់ឌុប និងវិធីសាស្រ្តប្រឡងឱ្យទទួលបាននិទ្ទេសល្អដល់សិស្សានុសិស្សជាបេក្ខជនប្រឡងបានឌុបខាងមុខនេះ ។

លោក សាន គឹមស័ង និយាយថា ការប្រឡងបាក់ឌុបគឺជាការប្រឡងបញ្ចប់ការសិក្សានៅថ្នាក់វិទ្យាល័យ ដែលសិស្សទាំងអស់ត្រូវចូលរួមប្រឡងឱ្យបានគ្រប់ៗគ្នា ហើយទោះបីជាប្រឡងជាប់ឬមិនជាប់ ក៏នឹងត្រូវបញ្ចប់ជីវិតជាសិស្សថ្នាក់ទី១២នៅវិទ្យាល័យ។  លោក សាន គឹមស័ង បន្តថា ការប្រឡងបាក់ឌុបក៏ជាឱកាសមួយសម្រាប់សិស្សពូកែៗ  ប្រសិនបើពួកគាត់ទទួលបាននិទ្ទេស A ពួកគាត់អាចមានឱកាសទទួលបានរង្វាន់ជាថវិកា ឬកាដូមួយចំនួនពីថ្នាក់ដឹកនាំ គឺពីចៅហ្វាយខេត្ត ឬនាយករដ្ឋមន្រ្តីជាដើម។

​សិស្សពូកែគណិតវិទ្យាទូទាំងប្រទេសរូបនេះ បន្ថែមថា សម្រាប់គន្លឹះបីសប្ដាហ៍មុនប្រឡងបាក់ឌុប គឺសិស្សានុសិស្សដែលជាបេក្ខជនប្រឡង គួរអនុវត្តទៅលើវិញ្ញាសាឆ្នាំចាស់ដែលធ្លាប់ចេញប្រឡងឆ្នាំមុនៗឱ្យបានគ្រប់មុខវិជ្ជា ហើយត្រូវកំណត់ពេលវេលាប្រឡងឱ្យបានត្រឹមត្រូវ ។ ឧទាហរណ៍ ប្រសិនបើមុខវិជ្ជាគណិតវិទ្យាតម្រូវឱ្យប្រឡង២ម៉ោងកន្លះ សិស្សានុសិស្សត្រូវធ្វើលំហាត់នោះដូចពេលប្រឡងរយៈពេល ២ម៉ោងកន្លះដូចគ្នា ។

លោក សាន គឹមស័ង បន្តថា ការធ្វើបែបនេះ ជួយឱ្យសិស្សានុសិស្សដឹងថា ខ្លួនខ្សោយកម្រិតណា គួរពង្រឹងបន្ថែមកម្រិតណា និងចេះគ្រប់គ្រងពេលវេលាបានត្រឹមត្រូវក្នុងពេលប្រឡង ហើយថែមទាំងជួយឱ្យសិស្សានុសិស្សមានភាពស្វាហាប់ក៏ដូចជាស្ទាត់ជំនាញក្នុងការប្រឡងជាងអ្នកមិនបានអនុវត្តលំហាត់ច្រើនដងតាមរយៈការប្រឡងសាក។

ដោយឡែក​ចំពោះបច្ចេកទេសប្រឡងឱ្យទទួលបាននិទ្ទសល្អ បើតាមលោក សាន គឹមស័ង សិស្សានុសិស្សត្រូវគិតគូរបីចំណុច រួមមាន ទី១. ការគ្រប់គ្រងពេលវេលា៖ សិស្សានុសិស្សដែលជាបេក្ខជនប្រឡងត្រូវធ្វើលំហាត់ឱ្យទាន់ម៉ោង ធ្វើឱ្យបានលឿន ហើយធ្វើលំហាត់ឱ្យបានត្រឹមត្រូវ, ទី២.​ ការគ្រប់គ្រងអារម្មណ៍ សតិបញ្ញាឱ្យបានរឹងមាំ អារម្មណ៍ភ័យ អារម្មណ៍មិនត្រេកអរខ្លាំងពេញ ឬមួយអារម្មណ៍រំជើបរំជួលបែបណាមួយ គឺត្រូវរក្សាអារម្មណ៍ឱ្យបានល្អ និង ទី៣. ការគ្រប់គ្រងថាមពល សំដៅលើការគ្រប់គងការញ៉ាំអាហារពេលព្រឹកមុនពេលប្រឡង ការញ៉ាំអាហារពេលថ្ងៃ ការមើលថែបញ្ហាសុខភាពឱ្យបានល្អកុំឱ្យឈឺអំឡុងពេលប្រឡង ដើម្បីឱ្យយើងមានកម្លាំងគ្រប់គ្រាន់ កុំឱ្យពេលប្រឡងមានបញ្ហាអស់កម្លាំង ឬជំងឺមួយចំនួនមកយាយី ធ្វើឱ្យដំណើរការប្រឡងមិនដំណើរការបានល្អផងដែរ។

អតីតសិស្សនិទ្ទេស A ឆ្នាំ២០១៩ រូបនេះ ក៏បានលើកទឹកចិត្តសិស្សានុសិស្សដែលជាបេក្ខជនប្រឡងគួរខិតខំប្រឹងប្រែងឱ្យអស់ពីលទ្ធភាព ព្រោះការប្រឡងបាក់ឌុបនេះមានម្ដងក្នុងមួយជីវិត។ លើសពីនេះ ជូនពរឱ្យមានសំណាងល្អ និងមាននិទ្ទេសល្អគ្រប់ៗគ្នា៕