ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងសម័យឌីជីថល មានរឿងរ៉ាវជាច្រើន ដែលកូនៗរបស់អ្នកត្រូវរៀនសូត្រ។ ទម្លាប់មមារញឹករបស់កុមារ និងការចំណាយពេលច្រើនលើសលប់នៅអេក្រង់ នាំឱ្យឪពុកម្ដាយធ្វើកិច្ចការប្រចាំថ្ងៃជំនួសកូនសឹងតែគ្រប់យ៉ាង។ ផ្ទុយទៅវិញ ការគិតបែបនេះ ធ្វើឱ្យកុមារមួយចំនួនសឹងតែមិនមានជំនាញជីវិតទាល់តែសោះ។ ដូច្នេះ អ្នកជំនាញណែនាំឱ្យឪពុកម្ដាយ គួរបង្កើតទម្លាប់មួយចំនួនសម្រាប់កូនៗ ដើម្បីឱ្យពួកគេក្លាយជាបុគ្គលដែលមានបំណិនជីវិត។
១. បោកសំលៀកបំពាក់ ៖ ទម្លាប់បោកសំលៀកបំពាក់ដោយខ្លួនឯងជាជំនាញមូលដ្ឋានមួយ ដែលក្មេងជំទង់គួរយល់ដឹង។ អ្នកអាចបង្រៀនកូនៗរបស់អ្នកឱ្យមានទម្លាប់មួយនេះ ចាប់តាំងពីគេនៅតូច។ ការបង្រៀនពីរបៀបបោកគក់សំលៀកបំពាក់ ហាល និងរៀបចំឱ្យមានរបៀប អាចធ្វើឡើងនៅពេលកុមារឈានចូលអាយុ ៧ឆ្នាំ ឬប្រសិនបើនៅផ្ទះអ្នកមានម៉ាស៊ីនបោកគក់ អ្នកអាចបង្រៀនពួកគេអំពីរបៀបបញ្ជាម៉ាស៊ីន។
២. ដាំដំណាំ ៖ ការឈានចូលវ័យ ៦ ទៅ ៧ឆ្នាំ កុមារអាចរៀនដាំដំណាំ តាមរយៈកាលអនុវត្តជាក់ស្ដែងទាំងនៅសាលា និងនៅផ្ទះ ដោយម្ដាយឪពុក ឬលោកគ្រូអ្នកគ្រូអាចបង្រៀនពួកគេ តាមរយៈការអនុវត្តជាជំហានៗចំនួន ៤ដូចជា ៖ ១.ការស្វែងរកកន្លែងដែលត្រឹមត្រូវ និងដីមានជីវជាតិ, ២.បង្ហាញរបៀបជីកដី, ៣.ការដាក់គ្រាប់ក្នុងរន្ធ, ៤.លុបដី និងស្រោចទឹក។
៣. របៀបបិតបង់របួស ៖ ការបិតបង់របួស គឺជាបំណិនជីវិតមួយ ដែលកុមារគួរយល់ដឹង ដើម្បីចេះជួយសង្គ្រោះខ្លួនឯង នៅស្ថានការណ៍បន្ទាន់ណាមួយ។ យោងតាមសមាគមន៍បណ្ឌិតសភាសើស្បែកអាមេរិក បានណែនាំនូវជំហានចំនួន ៥ ដើម្បីបិតបង់របួសឱ្យបានត្រឹមត្រូវ។ ១. លាងដៃជាមួយសាប៊ូ និងទឹក ដើម្បីជៀសវាងការបង្កមេរោគលើមុខរបួស, ២. លាងមុខរបួសឱ្យបានស្អាត ជាមួយអាកុល ឬទឹកក្ដៅឧណ្ហៗ ដើម្បីកម្ចាត់ភាពកខ្វក់ និងកំទេចកំទី, ៣. យកក្រណាត់ស្អាត ឬសំឡីខ្ទប់លើមុខរបួសរហូតឈប់ហូរឈាម (១ ទៅ ២នាទី), ៤. លាប petroleum jelly នៅលើមុខរបួស ដោយប្រើសំឡី, ៥. បិតបង់របួស។
៤. ទិញទំនិញ ៖ ដើម្បីជួយឱ្យកូនរបស់អ្នកក្លាយជាអ្នកទិញដ៏ឆ្លាតវៃម្នាក់ អ្នកត្រូវបង្រៀនពួកគេអំពីវិធីសាស្ត្រទិញ និងផ្ដល់ឱកាសឱ្យពួកគេទិញអីវ៉ាន់ខ្លួនឯង។ យោងតាមគេហទំព័រ Parents បានបង្ហាញពីជំហានចំនួន ៣ ដែលអ្នកអាចបង្រៀនកូនរបស់អ្នក។ ទី១. នាំពួកគេទៅហាងទិញទំនិញជាមួយ បង្ហាញអំពីតម្លៃ និងជម្រើសទំនិញដែលគួរទិញដល់ពួកគេ។ ទី២. បង្រៀនពួកគេឱ្យចេះសន្សំប្រាក់ សម្រាប់ទិញទំនិញដែលគេចង់បានដោយខ្លួនឯង ដើម្បីឱ្យពួកគេដឹងអំពីរបៀបគ្រប់គ្រង និងសន្សំលុយ។ ទី៣. ឱ្យពួកគេជួយបញ្ជាទិញរបស់របរផ្សេងៗជាពិសេស គ្រឿងទេស។
៥. របៀបរៀបចំកាដូ ៖ នៅក្នុងឱកាសណាមួយ ដែលតម្រូវឱ្យកូនរបស់អ្នកជូនកាដូដល់នរណាម្នាក់ អ្នកគួរផ្ដល់ឱកាសពួកគេរៀបចំកាដូនោះដោយខ្លួនឯង ហើយអ្នកដើរតួជាអ្នកប្រឹក្សា ឬណែនាំ។ ដោយសកម្មភាពនៃការរៀបចំកាដូអាចមានដូចជា ដកស្លាកតម្លៃចេញ ស្វែងរកទំហំប្រអប់កាដូដែលសមនឹងអីវ៉ាន់ រុំក្រដាស និងចងខ្សែបូរនៅជុំវិញកាដូជាដើម៕
