គោលបំណងនៃការប្រកួតកីឡា គឺដើម្បីពង្រឹងទំនាក់ទំនង សាមគ្គីភាព និងកិច្ចសហប្រតិបត្តិការល្អ រវាងប្រទេសជិតខាង ប្រទេសក្នុងតំបន់ និងពិភពលោក។ ប៉ុន្តែយើងក៏តែងតែសង្កេតឃើញជារឿយៗផងដែរថា ប្រទេសដែលមានព្រំដែនជាប់គ្នា គឺតែងតែមានរឿងល្អខ្លះ មិនល្អខ្លះដែលផ្សារភ្ជាប់នឹងអតីតកាល ក៏ដូចជាប្រវត្តិសាស្ត្រ។ ដូច្នេះហើយ ទើបយើងឧស្សាហ៍ឃើញមានបញ្ហាខ្វែងគំនិតគ្នាច្រើន ពាក់ព័ន្ធនឹងបញ្ហាវប្បធម៌ និងប្រវត្តិសាស្ត្រ រវាងប្រជាជនថៃ និងកម្ពុជា នៅតាំងពីមុនពេលប្រកួតកីឡាស៊ីហ្គេម និងអំឡុងពេលប្រកួត។ ដោយជានិច្ចជាកាល យើងឃើញប្រជាពលរដ្ឋថៃមួយចំនួនតូចដែលមោទនភាពជ្រុល ឬវង្វេងប្រវត្តិសាស្ត្រ និយាយមិនល្អអំពីកម្ពុជា ដែលធ្វើឱ្យមានការថ្នាំថ្នាក់ចិត្តពីបងប្អូនប្រជាពលរដ្ឋយើង។

សម្រាប់​លោកបណ្ឌិត ឈត ប៊ុនថង បានបង្ហាញការយល់ឃើញថា បើទោះជាបងប្អូនប្រជាពលរដ្ឋថៃមួយចំនួនតូច កំពុងព្យាយាមនិយាយអាក្រក់ពីយើងនៅលើបណ្ដាញសង្គម ក៏យើងមិនមានភាពចាំបាច់ត្រូវប្រើភាសាអសុរស ពាក្យជេរប្រទិច ការឌឺដង ឬការប្រើពាក្យសម្ដីមិនល្អទៅកាន់ពួកគាត់វិញនោះទេ។ ប៉ុន្តែយើងមានកាតព្វកិច្ចបំភ្លឺ ដោយពាក្យសមរម្យ ដោយការលើកហេតុផល អំណះអំណាងផ្សេងៗ តាមរយៈភស្ដុតាងច្បាស់លាស់ ដោយមិនចាំបាច់ប្រើពាក្យមិនល្អ។ លោកបញ្ជាក់ថា កាលបើជនជាតិដទៃប្រើពាក្យមិនល្អមកលើយើង ហើយយើងប្រើពាក្យមិនល្អទៅកាន់គេវិញ ទង្វើនេះក៏បញ្ជាក់ថា យើងក៏មិនល្អដូចគេដែរ។ ម្ល៉ោះហើយ យើងគួររក្សាសេចក្ដីថ្លៃថ្នូរ ប្រើប្រាស់ពាក្យល្អសមរម្យ និងប្រកាន់ភាពត្រឹមត្រូវឱ្យបានខ្ជាប់ខ្ជួន ដោយជៀសវៀងការទាស់ទែងគ្នាតាមបណ្ដាញសង្គមឱ្យខានតែបាន។

លោកបណ្ឌិតឈន ប៊ុនថង

“ខ្ញុំលើកទឹកចិត្តឱ្យប្រជាពលរដ្ឋខ្មែរប្រើបណ្ដាញសង្គម ប៉ុន្តែត្រូវប្រើដើម្បីទាញប្រយោជន៍សម្រាប់ខ្លួន​​​ឯង និងសង្គមជាតិ។”

ជាមួយគ្នានេះ លោកបណ្ឌិត​ក៏ស្នើសុំឱ្យប្រជាពលរដ្ឋគ្រប់គ្នា បន្តចូលរួមអនុវត្តតាមការអំពាវនាវ និងសេចក្ដីណែនាំរបស់ប្រមុខរាជរដ្ឋាភិបាល ក៏ដូចជាអាជ្ញាធរពាក់ព័ន្ធ ទាំងការបង្ហាញស្នាមញញឹម ការសម្ដែងគារវកិច្ច និងការសម្រួលគណៈប្រតិភូ និងអត្តពលិកចល័តពីកន្លែងមួយទៅកន្លែងមួយ ដើម្បី​ឱ្យព្រឹត្តិការណ៍ស៊ីហ្គេមដំណើរការដោយរលូន ។ ម្យ៉ាងទៀត នៅពេលអត្តពលិករបស់យើងប្រកួត ទោះជាទទួលលទ្ធផលយ៉ាងណា យើងត្រូវទទួលយកការពិត ហើយបន្តប្រកាន់ឥរិយាបថមួយដែលត្រឹមត្រូវ ជៀសវៀងការបន្ទោសគណៈកម្មការដាក់ពិន្ទុ ការប្រើពាក្យអសុរស និងការប្រើអំពើហិង្សាផ្សេងៗ។

ទន្ទឹមនឹងនេះលោកក៏បានស្នើឱ្យ គណៈកម្មការរៀបចំ និងអាជ្ញាធរពាក់ព័ន្ធ គឺត្រូវបន្តអនុវត្តនូវអ្វី ដែលជាអនុសាសន៍របស់សម្ដេចនាយករដ្ឋមន្ត្រី ដើម្បីធ្វើយ៉ាងណាឱ្យព្រឹត្តិការណ៍កីឡាស៊ីហ្គេមរបស់យើងប្រព្រឹត្តិទៅដោយជោគជ័យ ។ ជាពិសេស ប្រជាពលរដ្ឋគ្រប់រូប ត្រូវបន្តរួមចំណែករក្សាអនាម័យ និងសណ្ដាប់ធ្នាប់ នៅគ្រប់កន្លែង ដែលពួកគាត់បានទៅទស្សនា៕