ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ត្បិតថាថ្ងៃ១៤កុម្ភៈ ឬក៏ថ្ងៃនៃក្ដីស្រឡាញ់ មិនមែនជាកម្មវិធីដែលស្ថិតនៅក្នុងបុណ្យជាតិរបស់ប្រទេសកម្ពុជាក៏ពិតមែន ប៉ុន្តែយុវជនមួយចំនួនបានយកឱកាសនេះដើម្បីបង្ហាញពីទឹកចិត្ត ឬក៏ក្ដីស្រឡាញ់ទៅកាន់មនុស្សជុំវិញខ្លួន ឬក៏មនុស្សពិសេសណាម្នាក់។ ក្នុងនោះដែរ គេក៏ឃើញមានការកេងប្រវ័ញ្ចផ្លូវភេទ ឬផលប្រយោជន៍នានា ពីសំណាក់ជនខិលខូចមួយចំនួនតាមរយៈវិធីសាស្រ្តខុសៗគ្នា។
កញ្ញា យ៉ាត់ ម៉ាឡៃ និស្សិតកំពុងសិក្សានៅសាកលវិទ្យាល័យមួយក្នុងរាជធានីភ្នំពេញបាននិយាយថា ថ្ងៃនៃក្តីស្រលាញ់១៤កុម្ភៈ គឺមិនមែនជាថ្ងៃបុណ្យសង្សារអ្វីនោះឡើយ ប៉ុន្តែវាគឺជាពេលវេលាមួយដែលយើងអាចចែករំលែកសេចក្ដីស្រលាញ់ទៅកាន់មនុស្សជុំវិញខ្លួនរួមមាន ឪពុកម្ដាយ បងប្អូន ញាតិមិត្ត ឬក៏មិត្តភក្តិជាទីស្រលាញ់។ ម៉ាឡៃ ថា យើងអាចយកពេលវេលានេះ ជួបជុំជាមួយមនុស្សដែលយើងស្រលាញ់ ឬក៏ធ្វើសកម្មភាពផ្សេងទៀតដូចជា ការចែករំលែកសម្ភារៈបន្តិចបន្តួចទៅកាន់ជនដែលខ្វះខាត ក៏ដូចជាការជួបជុំ លក្ខណៈគ្រួសារ ដើម្បីផ្តិតយក នូវភាពរីករាយជាមួយគ្នាប្រកបទៅដោយសុភមង្គល។
យ៉ាត់ ម៉ាឡៃ
“ខ្ញុំចង់ឱ្យយុវជនយើង (ជាពិសេសគូរសង្សារក្មេងៗ) រៀនយល់ដឹងឱ្យច្បាស់ពីអត្ថន័យនៃពាក្យ ដែលអាចបង្ការខ្លួនឯងពីការខាតបង់នានា “
ចំណែកកញ្ញា ម៉ាត់ ស្រីនីត ក៏យល់មិនខុសគ្នាដែរ ដោយថា និយមន័យនៃថ្ងៃ១៤ កុម្ភៈ ឬក៏ថ្ងៃនៃក្ដីស្រលាញ់ គឺជាពេលមួយដែលបញ្ជាក់ពីក្ដីស្រឡាញ់របស់យើង ឬក៏ការជូនសេចក្ដីស្រឡាញ់របស់យើង ទៅកាន់អ្នកមានគុណ ឬមនុស្សជាទីគាប់ចិត្តណាម្នាក់ ទោះបីជាយើងអាចនិយាយវាចេញមកនៅថ្ងៃណាបានក៏បានពិតមែន ប៉ុន្តែបើចាត់យកថ្ងៃនេះឱ្យទៅជាភាពវិជ្ជមានក៏ជាចំណែកល្អដែរ។
ម៉ាត់ ស្រីនីត
“សម្រាប់ផ្នត់គំនិតរបស់ខ្ញុំ គឺខ្ញុំគិតថា យើងអាចយកថ្ងៃ១៤ កុម្ភៈនេះ ធ្វើឱ្យវាមានផលវិជ្ជមានចំពោះយើង ខ្លួនយើងផ្ទាល់ ឬមួយក៏ប្រទេសជាតិបានតាមរយៈចុះជួយសហគមន៍ ហើយវាអាស្រ័យទៅលើសកម្មភាពកើតចេញពីសកម្មភាពតូចៗ រហូតទៅដល់សកម្មភាពធំៗ “
ជាមួយគ្នានេះ ស្រីនីតលើកទឹកចិត្តទៅកាន់យុវជនឯទៀតថា ដោយគួរយល់ដឹងឱ្យកាន់តែច្បាស់ទាក់ទងជាមួយនឹងថ្ងៃនៃក្ដីស្រឡាញ់ថា តើគេចង់បញ្ជាក់អំពីអ្វី? ព្រោះមានយុវជនយើងមួយចំនួនបានគិតថា ១៤កុម្ភៈ គឺជាថ្ងៃបុណ្យសង្សារ ដែលវាធ្វើឱ្យមានការយល់ច្រឡំ មានការប៉ះពាល់ខាតបង់នៅផលប្រយោជន៍ផ្ទាល់ខ្លួនជាច្រើន និងធ្វើឱ្យគាត់មានគ្រោះថ្នាក់ ចាញ់ល្បិចជនខិលខូចមួយចំនួន៕
