ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដើម្បីជាការលើកកម្ពស់ដល់ការបង្រៀនភាសាខ្មែរ និងការយល់ដឹងពីវប្បធម៌ និងអរិយធម៌ខ្មែរ ដល់សិស្សានុសិស្សដែលមានសញ្ជាតិខ្មែរ ក្រសួងអប់រំ យុវជន និងកីឡា បានធ្វើសេចក្តីណែនាំទៅដល់គ្រប់គ្រឹះស្ថានសិក្សាទូទៅឯកជន ដែលអនុវត្តកម្មវិធីសិក្សាអន្តរជាតិ ទាំងអស់ដាក់បញ្ចូលកម្មវិធីសិក្សាមុខវិជ្ជាភាសាខ្មែរ និងមុខវិជ្ជាវប្បធម៌ និងអរិយធម៌ខ្មែរ ក្នុងម៉ោងសិក្សារបស់ខ្លួន។
បើតាមសេចក្តីណែនាំ គ្រឹះស្ថានសិក្សាចំណេះទូទៅឯកជន ដែលអនុវត្តកម្មវិធីសិក្សាអន្តរជាតិ ត្រូវតម្រូវឱ្យសិស្សានុសិស្សដែលមានសញ្ជាតិខ្មែរ ជ្រើសរើសមុខវិជ្ជាភាសាខ្មែរ ជាមុខវិជ្ជាកាតព្វកិច្ច ។ ក្នុងនោះដែរ គ្រឹះស្ថានសិក្សាត្រូវរៀបចំ និងបង្រៀនមុខវិជ្ជាចំណេះដឹងទូទៅស្តីពី វប្បធម៌ និងអរិយធម៌ខ្មែរ។
អគ្គលេខាធិការ នៃរាជបណ្ឌិតសភា លោកបណ្ឌិត យង់ ពៅ បានថ្លែងគាំទ្រចំពោះសេចក្តីណែនាំរបស់ក្រសួងអប់រំ យុវជន និងកីឡានេះ ដោយថា សាលាអន្តរជាតិទាំងអស់ដែលមានទីតាំងនៅក្នុងប្រទេសកម្ពុជា ភាគច្រើនគឺកូនខ្មែរដែលមានជីវភាពធូរធាទៅរៀន ហើយប្រសិនបើមិនមានការរៀនអក្សរសាស្រ្តខ្មែរ មិនមានរៀនវប្បធម៌ខ្មែរ នោះនឹងធ្វើឱ្យពួកគេភ្លេចធាតុដើម ខណៈទៅថ្ងៃអនាគតពួកគេអាចជាអ្នកដឹកនាំក្នុងស្ថាប័នអនុវត្តច្បាប់ ឬក៏សង្គម ហើយប្រសិនបើពួកគាត់អត់ចេះអក្សរសាស្រ្តខ្មែរ ក៏ដូចជាវប្បធម៌ខ្មែរ នេះគឺជាបញ្ហាគ្រោះថ្នាក់មួយ។
លោកបណ្ឌិតបន្តថា ករណីនេះ គួរតែចែងនៅក្នុងច្បាប់អប់រំតែម្តង ដោយការសិក្សានៅក្នុងសាលាអន្តរជាតិ សាលាជាតិក្តី ក្នុងព្រះរាជាណាចក្រកម្ពុជា ប្រសិនជាកូនក្មេងទាំងអស់នោះកាន់សញ្ជាតិខ្មែរ គឺត្រូវតែរៀនអក្សរសាស្រ្តខ្មែរ និងវប្បធម៌ខ្មែរ ប្រវត្តិសាស្រ្តខ្មែរជាចាំបាច់ ដើម្បីឱ្យពួកគេបានយល់អំពីសង្គមខ្មែរ និងការដឹកនាំនៅក្នុងសង្គមខ្មែរ ព្រោះជាគោលដៅគឹដើម្បីផលប្រយោជន៍ដល់សង្គមជាតិរបស់យើង៕
