ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិស្សជាជនជាប់ឃុំចំនួន១៤នាក់ នៅមណ្ឌលអប់រំកែប្រែទី១ បានបញ្ចប់ការសិក្សា និងទទួលបានវិញ្ញាបនបត្រ ដែលមានតម្លៃសមមូលនឹងសញ្ញាបត្រមធ្យមសិក្សាបឋមភូមិ (ថ្នាក់ទី៩) តាមរយៈកម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (BEEP)។
កម្មវិធី BEEP ត្រូវបានដាក់ឱ្យអនុវត្តក្នុងមណ្ឌលអប់រំកែប្រែទី១ នៅក្នុងខែឧសភា ឆ្នាំ២០២៥ ដែលមានជនជាប់ឃុំចំនួន ១៦នាក់បានចុះឈ្មោះសិក្សា។ ក្នុងនោះសិស្សចំនួន១៤នាក់ បានសិក្សាបញ្ចប់ និងប្រឡងជាប់ជាស្ថាពរជាមួយព្រឹត្តិបត្រពិន្ទុខ្ពស់គួរឱ្យកោតសរសើរ។ ដោយមើលឃើញពីចំណុចល្អប្រសើរក្នុងការប្រើប្រាស់ប្រព័ន្ធគ្រប់គ្រងការសិក្សា Off-line Content Server ដែលមាននាយកដ្ឋានបរិវត្តកម្មឌីជីថលផ្តល់ជំនួយផ្នែកបច្ចេកទេស និងដំឡើងប្រព័ន្ធសិក្សាឱ្យមានដំណើរការល្អប្រសើរ មណ្ឌលអប់រំកែប្រែទី១ បានបន្តចុះឈ្មោះសិស្សថ្មីចំនួន១៦នាក់បន្ថែមទៀត ដែលបច្ចុប្បន្នកំពុងបន្តការសិក្សា។
BEEP គឺជាគំនិតផ្តួចផ្តើមរួមគ្នារវាងក្រសួងអប់រំ យុវជន និងកីឡា, ក្រសួងការងារ និងបណ្តុះបណ្តាលវិជ្ជាជីវៈ និងអង្គការយូណេស្កូ ដើម្បីផ្តល់ការអប់រំតាមអ៊ីនធឺណេតដែលមានភាពបត់បែនដល់យុវជនដែលបានបោះបង់ការសិក្សា ឱ្យបញ្ចប់ការសិក្សាថ្នាក់មូលដ្ឋាន (សមមូលថ្នាក់ទី៩)។
ឯកឧត្តម គួច គូលំអ អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា វិញ្ញាបនបត្រពីកម្មវិធី BEEP នឹងអនុញ្ញាតឱ្យសិស្សមានលទ្ធភាពបន្តការសិក្សានៅកម្រិតខ្ពស់ជាងនេះ ឬបន្តទៅទទួលការបណ្តុះបណ្តាលជំនាញវិជ្ជាជីវៈបាន។ ឯកឧត្តមបន្តថា ទៅថ្ងៃអនាគត កម្មវិធី BEEP នឹងពង្រីកវិសាលភាពដល់យុវជននៅក្នុងសហគ្រាស (SMEs) មណ្ឌលស្តារនិតិសម្បទា និងយុវជនចំណាកស្រុកផងដែរ៕
