ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាកលវិទ្យាល័យកាលីហ្វ័រញ៉ា (UC) បានបង្កើតប្រវត្តិសាស្ត្រថ្មីមួយសម្រាប់សហរដ្ឋអាមេរិក ដោយមានសមាជិកមហាវិទ្យាល័យ និងអតីតនិស្សិតចំនួន ៥នាក់ ទទួលរង្វាន់ណូបែលឆ្នាំ២០២៥ ផ្នែកវេជ្ជសាស្ត្រ រូបវិទ្យា និងគីមីវិទ្យា ដែលនេះជាចំនួនខ្ពស់បំផុតសម្រាប់សាកលវិទ្យាល័យមួយ។
លោក Frederick Ramsdell ដែលជាអតីតនិស្សិតនៃសាលា San Diego និង Los Angeles ស្ថិតក្នុងចំណោមអ្នកវិទ្យាសាស្ត្របីនាក់ ដែលឈ្នះរង្វាន់ណូបែលផ្នែកវេជ្ជសាស្ត្រ កាលពីថ្ងៃទី៦ ខែតុលា សម្រាប់ស្នាដៃរបស់លោក ដែលបានសិក្សាលើការកំណត់កោសិកាភាពស៊ាំ ដែលការពាររាងកាយ ពីការវាយប្រហារ មកលើខ្លួនឯង។ ការស្រាវជ្រាវរបស់លោក Ramsdell បានផ្លាស់ប្ដូរការយល់ដឹងអំពីជំងឺអូតូអ៊ុយមីន ដូចជា ជំងឺទឹកនោមផ្អែមប្រភេទទី១ និងជំងឺលុយពីស។
នៅថ្ងៃបន្ទាប់ សាស្ត្រាចារ្យ John Clarke នៃ UC Berkeley រួមជាមួយនឹងសាស្រ្តាចារ្យ Michel H. Devoret និង John M. Martinis មកពីសាខា Santa Barbara បានទទួលរង្វាន់ណូបែលផ្នែករូបវិទ្យាសម្រាប់ការពិសោធន៍ ជុំវិញការអភិវឌ្ឍកុំព្យូទ័រ quantum ដែលជាបច្ចេកវិទ្យាដ៏មានឥទ្ធិពលបំផុតនាពេលបច្ចុប្បន្ន។
កាលពីថ្ងៃទី៨ ខែតុលា សាស្ត្រាចារ្យ Omar Yaghi របស់ UC Berkeley បានទទួលរង្វាន់ណូបែលផ្នែកគីមីវិទ្យា រួមជាមួយអ្នកវិទ្យាសាស្ត្រពីរនាក់ទៀតសម្រាប់ការបង្កើតក្របខណ្ឌលោហៈ-សរីរាង្គ។ សមិទ្ធិផលនេះ មានសមត្ថភាពចាប់យកកាបូនឌីអុកស៊ីត រក្សាទុកអ៊ីដ្រូសែន និងសូម្បីតែស្រូបយកជាតិទឹក ពីខ្យល់ក្នុងវាលខ្សាច់។
លោក Yaghi បានបង្ហាញការយល់ឃើញចំពោះស្នាដៃនេះថា «មិនមានអ្វីដូចនេះទេ វាជាការភ្ញាក់ផ្អើលមួយ»។ ដោយឡែក លោកបាននិយាយពីអារម្មណ៍ នៃការទទួលបានរង្វាន់ណូបែលនេះថា «វាជាអារម្មណ៍ដែលមិនអាចមានញឹកញាប់នោះទេ។»
គិតចាប់តាំងពីឆ្នាំ១៩៣៤ រហូតមកទល់បច្ចុប្បន្ន សាកលវិទ្យាល័យ UC មានបេក្ខជន ដែលទទួលបានរង្វាន់ណូបែល សរុបចំនួន ៧៥នាក់។
លោក James B. Milliken ប្រធានសាកលវិទ្យាល័យ UC បាននិយាយថា ពានរង្វាន់នេះ មិនត្រឹមតែជា កិត្តិយសដ៏អស្ចារ្យប៉ុណ្ណោះទេ ប៉ុន្តែថែមទាំងជាភស្តុតាងជាក់ស្ដែង នៃការលះបង់ និងការរួមចំណែករបស់មហាវិទ្យាល័យ និងនិស្សិត ដូចដែលបានដកស្រង់នៅលើគេហទំព័ររបស់សាកលវិទ្យាល័យ។
បង្កើតឡើង នៅក្នុងឆ្នាំ១៨៦៩ ជាមួយនឹងសមាជិកមហាវិទ្យាល័យចំនួន ១០នាក់ និងនិស្សិតចំនួន ៤០នាក់ UC បានវិវត្តន៍ក្លាយទៅជាប្រព័ន្ធសាកលវិទ្យាល័យសាធារណៈដ៏ធំបំផុតមួយនៅក្នុងសហរដ្ឋអាមេរិក ដែលមានសាខាចំនួន ១០ និស្សិតជាង ២៩៥,០០០នាក់ ព្រមទាំងបុគ្គលិក ចំនួន ២៦៥,០០០នាក់៕
