ក្រោយការប្រកួតធ្វើបទបង្ហាញគម្រោងដោយប្រើប្រាស់បច្ចេកវិទ្យាឌីជីថលក្នុងវគ្គផ្ដាច់ព្រ័ត្រ ចំនួន ១៥ក្រុម មកពីគ្រឹះស្ថានសិក្សារដ្ឋ និងឯកជន តាមបណ្ដារាជធានី-ខេត្តផ្សេងគ្នា, ទីបំផុតគេបានរកឃើញបេក្ខជន៤ក្រុម ក្លាយជាម្ចាស់ជ័យលាភីឆ្នើមក្នុងកម្មវិធីប្រកួតប្រជែងថ្នាក់ជាតិតិចណូវេសិន និងអនាគតទេពកោសល្យឌីជីថល ឆ្នាំ២០២៥។

ក្រុមបេក្ខជនជ័យលាភីទាំង៤ក្រុម រួមមាន ១. ក្រុម MNRR ទទួលបានជ័យលាភីជើងឯកថ្នាក់ជាតិ, ២. ក្រុម Anakut ទទួលបានជ័យលាភីសហគ្រិនវ័យក្មេងថ្នាក់ជាតិកម្រិតអនុវិទ្យាល័យ, ៣. ក្រុម Takor Girls ទទួលបានជ័យលាភីសហគ្រិនវ័យក្មេងថ្នាក់ជាតិកម្រិតបឋមសិក្សា និង ៤. ក្រុម supersolver ទទួលបានជ័យលាភីប្រជាប្រិយភាពថ្នាក់ជាតិ។

លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានសម្តែង​ការ​អបអរសាទរ និងកោតសរសើរយ៉ាងអស់ពីចិត្តដល់ក្មួយៗទាំងអស់ ដែលបានខិតខំប្រឹងប្រែងយ៉ាងអស់ពីសមត្ថភាពចូលរួមការប្រកួត ទោះបីក្មួយៗខ្លះមិនអាចឈានដល់ដំណាក់កាលប្រកួតផ្ដាច់ព្រ័ត្រក្ដី តែការចូលរួមកម្មវិធីប្រកួតប្រជែងនេះ បង្ហាញពីការខិតខំប្រឹងប្រែងលះបង់ពេលវេលា និងមានការតាំងចិត្តខ្ពស់ និងទទួលបាននូវសមត្ថភាពបច្ចេកវិទ្យា បទពិសោធន៍ក្នុងការអភិវឌ្ឍជំនាញទន់កាន់តែប្រសើរ។

រដ្ឋលេខាធិការប្រចាំការក្រសួងអប់រំ ក៏​បានអំពាវនាវដល់ គណៈគ្រប់គ្រងសាលារៀន ជួយសហការសម្របសម្រួលបង្កភាពងាយស្រួលដល់លោកគ្រូ អ្នកគ្រូ ប្អូនសិស្សានុសិស្សអាចចូលរួមក្នុងកម្មវិធីប្រកួតប្រជែង និងបញ្ចេញសមត្ថភាព ហើយសូមកោតសរសើរលើកទឹកចិត្តដល់ឪពុកម្តាយ អាណាព្យាបាលទាំងអស់ ដែលបានយកចិត្តទុកដាក់លើកទឹកចិត្តគាំទ្រដល់កូនៗ ពិសេសក្មេងស្រីឱ្យចូលរួមក្នុងកម្មវិធីប្រកួតប្រជែងផ្សេងៗ។

សម្រាប់ឆ្នាំ២០២៥នេះ ជាឆ្នាំទី១១ ដែលកម្មវិធីតិចណូវេសិនបានប្រារព្ធឡើងក្នុងប្រទេសកម្ពុជា ហើយក៏ជាឆ្នាំដំបូងដែលបានបើកឱកាសឱ្យមានការចូលរួមពីកុមារា និងយុវជន ឱ្យបានសិក្សា យល់ដឹង ប្រកួតប្រជែង និងបង្កើនចំណាប់អារម្មណ៍ពួកគេនៅក្នុងការប្រើប្រាស់បច្ចេកវិទ្យាដើម្បីដោះស្រាយបញ្ហា។

គួរជំរាបជូនថា កម្មវិធីតិចណូវេសិន បានចូលរួមគាំទ្រពង្រឹងចំណេះដឹង ផ្នែកបច្ចេកវិទ្យាជំនាញឌីជីថល សហគ្រិនភាព ការកសាងអាជីព លើកកម្ពស់ការអនុវត្តកម្មវិធីក្រៅម៉ោងសិក្សា ការបង្កើតក្លឹបសិក្សា ពង្រឹងវិជ្ជាសម្បទា បំណិនសម្បទា និងចរិយាសម្បទា ព្រមទាំងបំណិនទន់ផ្សេងៗ ដូចជាការដំណោះស្រាយបញ្ហា ការសហការ ធ្វើការងារជាក្រុម ការបង្កើតគំនិតច្នៃប្រឌិតថ្មីៗ ការធ្វើស្វ័យសិក្សាដែលជាបំណិនដ៏ចាំបាច់ឆ្លើយតបទៅនឹងភាពរីកចម្រើន នាយុគសម័យបច្ចេកវិទ្យាឌីជីថល បញ្ញាសិប្បនិម្មិត ព្រមទាំងបានប្រែក្លាយយុវជនកម្ពុជាទៅជា មូលធនមនុស្សនាសតវត្សរ៍ទី២១៕