ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោក ផុន ប៉ាវ អាយុ២៩ឆ្នាំ បច្ចុប្បន្នគឺជាម្ចាស់យានដ្ឋានជួសជុលរថយន្តមួយកន្លែងស្ថិតនៅក្នុងភូមិខ្មែរលើ សង្កាត់គោករការ ខណ្ឌព្រែកព្នៅ ។ យុវជនដែលមកពីខេត្តតាកែវរូបនេះ បានផ្លាស់ប្តូរជីវភាពយ៉ាងឆាប់រហ័ស ក្រោយពីលោកបានរៀនជំនាញបច្ចេកទេសជួលជុលយានយន្ត ពីវិទ្យាស្ថានជាតិពហុបច្ចេកទេសកម្ពុជា (NPIC) និងបានធ្វើការឱ្យគេអស់មួយរយៈធំដើម្បីយកបទពិសោធន៍។
លោក ប៉ាវ បានរៀបរាប់ថា កាលពីមុនគ្រួសាររបស់លោកពឹងផ្អែកទៅលើកសិកម្មទាំងស្រុង ធ្វើស្រែម្តង សម្រាប់ការចំណាយពេញមួយឆ្នាំ ដោយគ្រានោះជីវភាពមិនជាគាប់ប្រសើរប៉ុន្មានទេ។ លោកបានចាកចេញពីស្រុកកំណើត ហើយលោកបានជ្រើសរើសចូលរៀនជំនាញនៅសាលា NPIC ហើយបន្ទាប់ពីបញ្ចប់ការសិក្សា លោកក៏បានចេញទៅធ្វើការឱ្យគេដើម្បីយកបទពិសោធន៍ រហូតដល់សន្សំបានដើមទុនខ្លះបើកយានដ្ឋានខ្លួនឯង។ លោកថា ជំនាញបច្ចេកទេសបានផ្លាស់ប្តូរជីវិតរបស់លោកជាខ្លាំង ជាពិសេសអាចឱ្យលោករកចំណូលបានជាប្រចាំ។
គ្រួសារខ្ញុំនៅតែធ្វើកសិកម្ម តែគាត់មិនសូវពឹងខ្លាំងលើកសិកម្មដូចពីមុនទេ។ តាំងពីខ្ញុំបើកយានដ្ឋាននេះមកជាទូទៅវាអត់ស្ងាត់ទេ គឺមានភ្ញៀវរហូត ចំណូលមានរាល់ថ្ងៃគ្រាន់តែតិច ឬច្រើន
លោក ផុន ប៉ាវ ម្ចាស់យានដ្ឋាន ប៉ាវ ប៉ាវ
ទន្ទឹមនេះ លោក ផុន ប៉ាវ បានគូសបញ្ជាក់ដែរថា សង្គមបច្ចុប្បន្នត្រូវការអ្នកមានជំនាញច្បាស់លាស់ ដូច្នេះការមានជំនាញណាមួយក៏ដោយ គឺសុទ្ធតែសំខាន់សម្រាប់ជីវិតមនុស្សម្នាក់ៗ និងសំខាន់សម្រាប់ការអភិវឌ្ឍន៍សង្គម។
ជាមួយគ្នានេះ លោក ផុន ប៉ាវ ក៏បានបំផុសគំនិតដល់យុវជនដែលមិនទាន់មានជំនាញច្បាស់លាស់ គួរងាកមកចាប់យកជំនាញណាមួយដែលខ្លួនពេញចិត្ត ដើម្បីអាចមានលទ្ធភាពផ្គត់ផ្គង់ជីវភាពគ្រួសារ និងខ្លួនឯងទៅថ្ងៃអនាគត។
គួរបញ្ជាក់ដែរថា កាលពីខែវិច្ឆិកា ឆ្នាំ២០២៣ រាជរដ្ឋាភិបាលកម្ពុជា បានប្រកាសដាក់ឱ្យដំណើរការ នូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១.៥លាននាក់ លើវិស័យអាទិភាពចំនួន១០ និង៣៨មុខជំនាញផ្សេងគ្នា ដើម្បីឱ្យយុវជនក្រុមគោលដៅ ឆាប់ទទួលបានឱកាសការងារសមរម្យក្នុងរយៈពេលខ្លីក្នុងទិសដៅកែប្រែនិងលើកម្ពស់ជីវភាពគ្រួសារឱ្យកាន់តែប្រសើរតាមរយៈយុវជនម្នាក់មានជំនាញមួយយ៉ាងតិចប្រចាំជីវិត៕
