យុវជន​៣រូបបានក្លាយទៅជាជើងឯងអំណាន ក្រោយ​ពី​ចូលរួម​ប្រកួត​ប្រជែងអានជាមួយ​យុវជន​ជិត១រយនាក់ នៅ​ក្នុងកម្មវិធី​ប្រកួតប្រជែង​អាន ដែល​រៀបចំ​ឡើង​ដោយ​យុទ្ធនាការ​សៀវភៅ​មួយ​សហគមន៍​មួយ នៅ​វិទ្យាល័យជំម្ពូវ័នកាលពីពេលថ្មីៗនេះ។

យុវជន​ដែលជាប់ជ័យលាភីទាំង៣រូបនោះ រួមមាន ជ័យលាភីលេខ១ បានទៅលើ លោក សាំង វ៉ាន់ណៃ មកពីសកលវិទ្យាល័យភូមិន្ទវិចិត្រសិល្បៈ, ជ័យលាភីលេខ២ បានទៅលើ លោក ស៊ីន ម៉ៅធាង មកពីសកលវិទ្យាល័យភូមិន្ទភ្នំពេញ និង ជ័យលាភីលេខ៣ បានទៅលើ អ្នកនាង អឹង ចាន់ពិសី មកពីវិទ្យាល័យចំណេះទូទៅនិងបច្ចេកទេសហ៊ុនសែនជម្ពូវ័ន។

អ្នកស្រី ហ៊ាង វត្តី ប្រធានយុទ្ធនាការ សៀវភៅមួយ សហគមន៍មួយ ប្រចាំរាជធានីភ្នំពេញ មានប្រសាសន៍ថា ការបង្កើតកម្មវិធីប្រកួតប្រជែងការអាននេះ ដើម្បីជំរុញឱ្យយុវជនងាកមកអានសៀវភៅឱ្យបានច្រើន និងលើកកម្ពស់អក្សរសាស្ត្រជាតិ។

ប្រធានយុទ្ធនាការ សៀវភៅមួយ សហគមន៍មួយ ប្រចាំរាជធានីភ្នំពេញ បញ្ជាក់បន្ថែមថា នៅក្នុងការប្រកួតអាននេះ អ្នកស្រីសង្កេតឃើញថា បេក្ខជនមានការធ្វេសប្រហែសនៅពេលដាក់ពាក្យប្រកួត មិនយល់ច្បាស់ពីគោលការណ៍ ក៏ដូចជាលក្ខន្តិកៈកម្មវិធី ការចម្លងស្នាដៃ មានកំហុសអក្ខរាវិរុទ្ធនៅក្នុងអត្ថបទ ដែលជាកត្តាធ្វើឱ្យពួកគាត់មិនជាប់នៅក្នុងវគ្គផ្ដាច់ព្រ័ត្រ ឬក្នុងចំណោមបេក្ខជនបេក្ខនារី១០នាក់ចុងក្រោយ។

បើតាមអ្នកស្រី ហ៊ាង វត្តី យុវជនចាំបាច់ត្រូវដឹងឱ្យច្បាស់ពីអក្សរសាស្ត្រខ្មែរ និងប្រើប្រាស់ឱ្យត្រឹមត្រូវតាមពាក្យនីមួយៗ ប៉ុន្តែយុវជនមួយចំនួនច្រើនចាប់អារម្មណ៍កម្មវិធីកម្សាន្តផ្សេងៗនៅក្នុងទូរសព្ទដៃ ហើយមិនសូវចាប់អារម្មណ៍ការអានសៀវភៅនោះទេ។ អ្នកស្រីបន្តថា ការមិនយកចិត្តទុកដាក់អានសៀវភៅជាហេតុធ្វើឱ្យយុវជនមិនអាចសរសេរ អានសំណេរតួអក្សរខ្មែរបានត្រឹមត្រូវ ដែលនាំឱ្យមានការលំបាកនៅថ្ងៃអនាគត។

ប្រធានយុទ្ធនាការ សៀវភៅមួយ សហគមន៍មួយ ប្រចាំរាជធានីភ្នំពេញ ក៏បានសំណូមពរឱ្យសាធារណជនទាំងអស់ ក៏ដូចជាយុវជន និងដៃគូពាក់ព័ន្ធឱ្យងាកមកប្រើប្រាស់នូវអក្សរខ្មែរឱ្យបានគ្រប់ៗគ្នា ដើម្បីលើកកម្ពស់អក្សរជាតិយើងឱ្យបានគង់វង្ស។

គួរជម្រាបជូនថា កម្មវិធីប្រកួតប្រជែងអាននេះ រៀបចំឡើងដោយ «សៀវភៅមួយសហគមន៍មួយ» រួមទាំងមានការសហការពី JCI, Sipar, និងស្ថាប័នផ្សេងៗទៀតជាច្រើន ថែមទាំងមានការគាំទ្រដោយក្រសួងអប់រំផងដែរ។ យុវជនដែលចូលរួមប្រកួតត្រូវមានអាយុចន្លោះ ១៥ឆ្នាំ ទៅ ៣០ឆ្នាំ ដែលមានទីកន្លែងកំណើត ឬរស់នៅទីក្រុងភ្នំពេញស្រាប់ អាចនិយាយ និងសរសេរភាសាខ្មែរបានច្បាស់៕