យុវតីតំណាងកម្ពុជា៣រូប បានទទួលជ័យលាភីលេខ៣ ផ្នែក Network Track នៅក្នុងការប្រកួតប្រជែងកម្មវិធី “Huawei ICT Competition 2023-2024 Regional Round” ផ្នែក Network Track នៅទីក្រុង Jakarta ប្រទេស Indonesia កាលពីពេលកន្លងទៅថ្មីៗនេះ។

យុវតី សេង សុមន្ថាវរិន្ទ និស្សិតឆ្នាំទី៤ ជំនាញទូរគមនាគមន៍ និងបណ្តាញ នៃវិទ្យាស្ថានបច្ចេកវិទ្យាកម្ពុជា បានឱ្យដឹងថា ការចូលរួមនៅក្នុងការប្រកួតប្រជែងកម្មវិធី “Huawei ICT Competition 2023-2024 Regional Round” ផ្នែក Network Track នៅទីក្រុង Jakarta ប្រទេស Indonesia ពីព្រោះរូបខ្លួនចង់ទទួលបានបទពិសោធន៍ថ្មីៗ រៀនពីដៃគូប្រកួតប្រជែង និងពង្រីកចំណេះដឹងរបស់ខ្លួនបន្ថែមពីការសិក្សានៅសាលា។ លើសពីនេះទៅទៀត ការប្រកួតប្រជែងនេះ មិនត្រឹមតែអនុញ្ញាតឱ្យរូបគេធ្វើជាតំណាងប្រទេសកម្ពុជាប៉ុណ្ណោះទេ ប៉ុន្តែថែមទាំងផ្តល់នូវឱកាសពិសេសមួយក្នុងការយល់ដឹងបន្ថែមពី Network Technologies និងបង្កើនការយល់ដឹងពីជំនាញរបស់ប្អូននៅក្នុងវិស័យមួយនេះ។

យុវតី សេង សុមន្ថាវរិន្ទ បញ្ជាក់បន្ថែមថា ការប្រកួតប្រជែងលើផ្នែក Network Track ក្នុងកម្មវិធី Huawei ICT Competition នេះផ្តោតជាពិសេសលើបច្ចេកវិទ្យាបណ្តាញ។ ក្នុងការចូលរួមប្រកួតប្រជែងនេះ គឺដើម្បីបង្ហាញពីជំនាញរបស់ក្រុមលើផ្នែកបច្ចេកវិទ្យាបណ្តាញដូចជា Routing , Switching, សុវត្ថិភាពបណ្តាញ និងទូរគមនាគមន៍។ សេង សុមន្ថាវរិន្ទ បន្តថា ក្រុមរបស់ខ្លួនចូលរួមប្រកួតដើម្បីបានសាកល្បងលើសមត្ថភាពក្នុងការរៀបចំបណ្ដាញ ការកំណត់រចនាសម្ព័ន្ធបណ្តាញ ដោះស្រាយបញ្ហាបណ្ដាញ និងការគ្រប់គ្រងបណ្តាញប្រកបដោយប្រសិទ្ធភាព។

និស្សិតឆ្នាំទី៤ មកពីខេត្តក្រចេះ រូបនេះ បញ្ជាក់ថា Network technologies មានសារៈសំខាន់ណាស់សម្រាប់ពិភពលោក ដោយសារវាអនុញ្ញាតឱ្យមានការទំនាក់ទំនង និងការសហការជាសកល។ សម្រាប់ប្រទេសកម្ពុជា ការវិនិយោគលើបច្ចេកវិទ្យានេះ អាចជួយជំរុញដល់ការផ្លាស់ប្តូរឌីជីថល និងរួមចំណែកដល់ការអភិវឌ្ឍន៍សេដ្ឋកិច្ច ការអប់រំ ការច្នៃប្រឌិត ការពង្រឹងហេដ្ឋារចនាសម្ព័ន្ធ សន្តិសុខបណ្ដាញ និងសមាហរណកម្មរបស់ប្រទេសកម្ពុជាទៅក្នុងសេដ្ឋកិច្ចពិភពលោក។

យុវតី សឿន ឧស្សា និស្សិតឆ្នាំទី៤ ជំនាញទូរគមនាគមន៍និងបណ្តាញ នៃវិទ្យាស្ថានបច្ចេកវិទ្យាកម្ពុជា បានលើកឡើងថា សម្រាប់ឆ្នាំនេះ ការប្រកួតក្នុងវគ្គ Regional Final Exam គឺធ្វើតាមប្រព័ន្ធ Online និងមានរយៈពេល១ថ្ងៃ ។ យុវតី សឿន ឧស្សា បន្តថា សម្រាប់វិញ្ញាសារចែកចេញជា២ផ្នែក ​​គឺ ​QCM និង Lab exam ។ ក្នុងនោះ ​QCM មាន៩០សំណួរមានរយៈពេល ៩០នាទី និង Lab exam មានរយៈពេល៤ម៉ោង។

យុវតី សឿន ឧស្សា បន្ថែមថា សម្រាប់ការចូលរួមប្រកួត អ្វីដែលជាការលំបាកសម្រាប់ក្រុម គឺ software ដែលត្រូវធ្វើ Lab exam ដែលជាកម្មវិធីថ្មីសម្រាប់ពួកគេ។ ដូច្នេះ​ សមាជិកក្រុមត្រូវចំណាយពេលច្រើនក្នុងការស្វែងយល់ និងអនុវត្តន៍។

និស្សិតជំនាញទូរគមនាគមន៍និងបណ្តាញ រូបនេះ បញ្ជាក់ថា ចំពោះលទ្ធផលក្រុមរបស់ខ្លួនបានត្រៀមចិត្តទទួលយករួចហើយ ទោះបីជាលទ្ធផលជាប់ ឬ ធ្លាក់ក៏ដោយ ប៉ុន្តែនៅពេលដែលទទួលបានលទ្ធផលថាក្រុមរបស់ខ្លួនទទួលបានចំណាត់ថ្នាក់លេខ៣ នៅវគ្គ Regional Final  ធ្វើឱ្យពួកគេកាន់តែពេញចិត្ត្ត កាន់តែសប្បាយចិត្ត ហើយក៏មានមោទនភាពចំពោះប្រទេសកម្ពុជា និងសកលវិទ្យាល័យផងដែរ។ យុវតី សឿន ឧស្សា បន្តថា នៅជំហានបន្ទាប់ ក្រុមរបស់ខ្លួននឹងត្រូវធ្វើដំណើរទៅប្រទេសចិនដើម្បីប្រកួតវគ្គចុងក្រោយបន្តទៀត គឺវគ្គ Global Final Exam ។

និស្សិតឆ្នាំទី៤ មកពីខេត្តព្រៃវែង រូបនេះ ក៏បានលើកទឹកចិត្តយុវជន ជាពិសេសក្មេងស្រីឱ្យចាប់អារម្មណ៍សិក្សាស្វែងយល់ពីបច្ចេកវិទ្យាថ្មីៗ កុំខ្លាចក្នុងការចូលរួមក្នុងវិស័យបច្ចេកវិទ្យា ព្រោះបច្ចេកវិទ្យាជាវិស័យមួយដែលពោរពេញទៅដោយឱកាស និងភាពច្នៃប្រឌិត។ ទន្ទឹមគ្នានេះ ត្រូវចាប់ផ្តើមពីការចង់ដឹង ចង់ឃើញ សួរសំណួរ កុំមើលស្រាលសមត្ថភាពខ្លួនឯង និងកុំបោះបង់ចោលក្ដីស្រមៃ។ សូមចាំថា អ្នកអាចធ្វើវាបានដរាបណាអ្នកហ៊ានដេញចាប់ក្ដីសុបិន្ត ដោយភាពក្លាហាន និងការតាំងចិត្តមិនផ្លាស់ប្ដូរ។ «ជាមួយគ្នានេះ ក្មេងស្រី និងស្រ្តីដែលចាប់អារម្មណ៍លើវិស័យបច្ចេកវិទ្យានេះ អ្នកគឺជាអ្នកកំណត់អនាគតរបស់ខ្លួនឯង។ កុំយកពាក្យថា បច្ចេកវិទ្យាមិនមែនសម្រាប់មនុស្សស្រីមកដាក់ក្នុងចិត្ត។ សូមកុំខ្លាចក្នុងការសុបិន្ត  មិនថាអ្នកចាប់អារម្មណ៍លើការសរសេរកូដ មនុស្សយន្ត បញ្ញាសិប្បនិមិត្ត ឬផ្នែកផ្សេងទៀតនៃបច្ចេកវិទ្យនោះទេ ចូរដឹងថាមានកន្លែងសម្រាប់មនុស្សស្រីគ្រប់រូបនៅក្នុងវិស័យដែលកំពុងរីកចម្រើននេះ»៕