ក្រសួងអប់រំ កំពុងកែលម្អលទ្ធផលសិក្សារបស់សិស្សឱ្យមានសមត្ថភាពអាចប្រកួតប្រជែងជាស្តង់ដាអន្តរជាតិ ។ ទន្ទឹមនេះ ក្រសួងបានរៀបចំពិធីផ្សព្វផ្សាយរបាយការណ៍នៃកម្មវិធីអន្តរជាតិស្ដីពីរង្វាយតម្លៃលទ្ធផលសិក្សារបស់សិស្ស (PISA) ឆ្នាំ២០២២​ នៃប្រទេសកម្ពុជា កាលពីចុងខែកុម្ភៈ (ថ្ងៃទី២៨) នាពេលកន្លងទៅ។

តេស្តភីសា (PISA) ជាអ្វី ?

ពាក្យ PISA មកពីពាក្យពេញថា Program for International Student Assessment ឬមានន័យជាភាសាខ្មែរថា «កម្មវិធីសម្រាប់វាយតម្លៃសិស្សអន្តរជាតិ» ។ វាជាកម្មវិធីអន្តរជាតិមួយសម្របសម្រួលដោយអង្គការដើម្បីសហប្រតិបត្តិការសេដ្ឋកិច្ចនិងអភិវឌ្ឍន៍ (OECD) ដែលវាយតម្លៃប្រព័ន្ធអប់រំរបស់សកលលោក ។ គោលបំណងតេស្តភីសា (PISA) រួមមាន ប្រៀបធៀបលទ្ធផលសិក្សាពីប្រទេសសមាជិកនានា, កំណត់ចំណុចដែលត្រូវកែលម្អក្នុងប្រព័ន្ធអប់រំ, ផ្ដល់ការសម្រេចចិត្តកម្រិតគោលនយោបាយទាក់ទងការអប់រំ។ នេះមានន័យថា តេស្តភីសា (PISA) ដើរតួនាទីជាឧបករណ៍ដ៏មានតម្លៃដើម្បីកំណត់ស្ដង់ដាប្រព័ន្ធអប់រំ និងលើកកម្ពស់កិច្ចសហប្រតិបត្តិការអន្តរជាតិដើម្បីឱ្យលទ្ធផលសិក្សាមានលទ្ធផលប្រសើរឡើង។

លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ មានប្រសាសន៍ថា នៅកម្ពុជា ៥៩% នៃសិស្ស (ចំណែកធំជាងគេ) ស្ថិតក្នុងលំដាប់អន្តរជាតិក្រោមមាត្រដ្ឋានសេដ្ឋកិច្ចសង្គម ដែលមានន័យថា ពួកគេស្ថិតក្នុងចំណោមសិស្សដែលជួបការលំបាកបំផុតដែលបានប្រឡង PISA ក្នុងឆ្នាំ ២០២២។

លោកបណ្ឌិត សុខ សូត្រ បញ្ជាក់ថា តាមប្រភពជាផ្លូវការរបស់អង្គការដើម្បីសហប្រតិបត្តិការសេដ្ឋកិច្ចនិងអភិវឌ្ឍន៍ (OECD) នៅឆ្នាំ២០២២ ជាឆ្នាំដែលប្រទេសកម្ពុជាបានប្រឡងតែភាសាជាផ្លូវការ គ្មានសិស្សក្នុងប្រទេសកម្ពុជាណាម្នាក់បានទទួលពិន្ទុមុខវិជ្ជាគណិតវិទ្យាដល់កម្រិត ៥ ឬ ៦ ក្នុងការធ្វើតេស្តគណិតវិទ្យា PISA នៅឡើយទេ ខណៈដែលប្រទេស OECD បានទទួលជាមធ្យម ៩%។ ជាក់ស្ដែង ពិន្ទុមធ្យមក្នុងគណិតវិទ្យាគឺ ៣៣១ពិន្ទុ។ នៅប្រទេសទួរគី និងវៀតណាម សិស្សដែលមានប្រវត្តិសេដ្ឋកិច្ចសង្គមស្រដៀងគ្នាមានទំនោរទទួលបានពិន្ទុខ្ពស់ជាងគួរឱ្យកត់សម្គាល់។

ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ បញ្ជាក់បន្ថែមថា ក្រសួងអប់រំ មានការតាំងចិត្តខ្ពស់ក្នុងការធ្វើឱ្យលទ្ធផលសិក្សារបស់សិស្សមានកម្រិតអាចប្រកួតប្រជែងជាស្តង់ដាអន្តរជាតិបាន។ នេះជាមូលហេតុសំខាន់ដែលកម្ពុជាបានចុះឈ្មោះចូលក្នុងប្រព័ន្ធអន្តរជាតិនេះ។ ទន្ទឹមគ្នា ក្រសួងអប់រំ បាននិងកំពុងតែកែលម្អជាបណ្ដើរៗ និងធ្វើអ្វីគ្រប់យ៉ាង ដែលត្រូវការដើម្បីឱ្យលទ្ធផលសិក្សារបស់សិស្សបានដល់កម្រិតអន្តរជាតិដូចប្រទេសជិតខាង និងប្រទេសផ្សេងទៀតក្នុងសកលលោក។

ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និងកីឡា មានប្រសាសន៍ថា កម្ពុជាបានចូលរួមអនុវត្តសាកល្បងកម្មវិធីរង្វាយតម្លៃលទ្ធផលសិក្សារបស់សិស្ស (PISA) នៅឆ្នាំ២០១៨ ក្នុងនោះ ផ្នែកវិទ្យាសាស្រ្ត កើនឡើង ១០ពិន្ទុ ភាគរយសិស្សកម្រិត២ ឬខ្ពស់ជាងនេះ បានកើនឡើងទ្វេដង ពិន្ទុផ្នែកគណិតវិទ្យាកើនឡើង១១ពិន្ទុ ផ្នែកអំណានកើនឡើង៨ពិន្ទុ ។ ទោះជាយ៉ាងណា សាលារដ្ឋ និងឯកជនមួយចំនួន អាចឈានទៅដល់ ឬលើសពិន្ទុកម្រិតមធ្យមភាគរបស់អាស៊ានផងដែរ។

រដ្ឋមន្ត្រីក្រសួងអប់រំ បន្ថែមថា កម្ពុជាបានចូលរួមអនុវត្តលើកដំបូង នៃកម្មវិធីរង្វាយតម្លៃលទ្ធផលសិក្សារបស់សិស្ស (PISA) នៅឆ្នាំ២០២២​ ស្របពេលកម្ពុជាបានផ្អាកដំណើរការសាលារៀនបណ្ដោះអាសន្នពីរឆ្នាំ ដោយសារជំងឺកូវីដ-១៩ ហើយបើទោះជាកម្ពុជាបិទសាលារៀន ២ឆ្នាំក៏ដោយក៏ឃើញថា លទ្ធផលវិជ្ជមានផងដែរ។

ឯកឧត្ដមបណ្ឌិតសភាចារ្យ ហង់ជួន ណារ៉ុន បន្ថែមថា យោងតាមអង្គការដើម្បីសហប្រតិបត្តិការសេដ្ឋកិច្ចនិងអភិវឌ្ឍន៍ (OECD) បានរកឃើញថា ស្ថានភាពសង្គមសេដ្ឋកិច្ចរបស់សិស្សកម្ពុជា ជាកត្តាកំណត់លើលទ្ធផលរង្វាយតម្លៃលទ្ធផលសិក្សារបស់សិស្ស (PISA)  ក្នុងនោះ លទ្ធផលគណិត សិស្សកម្ពុជាទទួលបានពិន្ទុមធ្យម ៣៣៦ កើនឡើង១១% ប្រៀបធៀប PISA-D ប៉ុន្តែពិន្ទុមធ្យមភាគរបស់កម្ពុជា នៅទាបជាង OECD មានពិន្ទុមធ្យម ៤៧២ និងប្រទេសអាស៊ានមានពិន្ទុមធ្យម ៤១៨ ។ ចំណែក លទ្ធផលវិទ្យាសាស្រ្ត សិស្សកម្ពុជាទទួលបានពិន្ទុជាមធ្យម ៣៤៧ កើន ១៧ពិន្ទុ ប៉ុន្តែពិន្ទុមធ្យមនៅទាបជាង OECD ៤៨៥ និងអាស៊ាន ៤២៤។ សិស្សកម្ពុជា ១០,៤% ស្ថិតក្នុងកម្រិតសមត្ថភាពពីរ និងខ្ពស់ជាងនេះ កើន ៥%។

រដ្ឋមន្ត្រីក្រសួងអប់រំ បញ្ជាក់ថា ទោះបីលទ្ធផលកម្ពុជា បានកើនក៏ដោយ តែទាបជាងលទ្ធផលរបស់បណ្ដាប្រទេសអាស៊ាន ក្នុង OECD ដែលមានកម្រិតអភិវឌ្ឍន៍សេដ្ឋកិច្ចនិងសង្គមខ្ពស់ជាងកម្ពុជា។ ទន្ទឹមគ្នានេះ សិស្សកម្ពុជា ត្រូវបានចាត់ទុកថា ជាសិស្សជួបការលំបាក បញ្ហាប្រឈមមួយចំនួនពាក់ព័ន្ធនឹងម៉ោងសិក្សា កត្តាសិស្ស កត្តាគ្រូ កត្តាសាលា កត្តាកម្មវិធីសិក្សា ។ ប្រទេសកម្ពុជា ជួបបញ្ហាប្រឈមជាមួយម៉ោងសិក្សា កង្វះថ្នាក់រៀន និងកង្វះគ្រូបង្រៀននៅតាមទីជនបទ កត្តាសិស្សមកសាលាយឺត អវត្តមានញឹកញាប់ ចូលរៀនយឺតជាងអាយុ រៀនត្រួតថ្នាក់ លេងទូរស័ព្ទ ឬឧបករណ៍អេឡិចត្រូនិចក្នុងថ្នាក់ ធុញថប់ជាមួយនឹងមុខវិជ្ជាគណិត ខ្វះការគាំទ្រពីគ្រួសារក្នុងការស្វ័យសិក្សា ខ្វះការចូលរួមពីឪពុកម្ដាយ និងការតាមដានការសិក្សារបស់សិស្ស។

គួរជម្រាបជូនថា កម្មវិធីអន្តរជាតិស្ដីពីរង្វាយតម្លៃលទ្ធផលសិក្សារបស់សិស្ស (PISA) បានផ្ដល់បទពិសោធន៍ និងភស្ដុតាងសំខាន់ៗមួយចំនួនដល់ ក្រសួងអប់រំ យុវជន និងកីឡា ក្នុងការស្វែងយល់ពីសមត្ថភាពសិស្សអាយុ ១៥ឆ្នាំ នៅកម្ពុជាធៀបនឹងបរិបទអប់រំសកល និងបញ្ហាប្រឈមមួយចំនួន ក្នុងប្រព័ន្ធអប់រំកម្ពុជា៕