ក្នុងពិធីប្រកាសដាក់ឱ្យអនុវត្តជាផ្លូវការគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស SE4HC កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ប្រសាសន៍ថា ក្រសួងអប់រំ នឹងចាប់ផ្ដើមបញ្ចូលសំណួរ PISA នៅក្នុងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២៥ នេះតែម្ដង ដោយផ្ដោតលើមុខវិជ្ជាភាសាខ្មែរ និងប្រវត្តិវិទ្យា។

ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជក់បន្ថែមថា ការបញ្ចូលសំណួរ PISA នៅក្នុងការប្រឡងសញ្ញាបត្រមធ្យមសិក្សាទុតិយភូមិនេះ មិនមែនបញ្ជូលទាំងស្រុងនោះទេ ពោលគឺបញ្ចូលបន្តិចម្ដងៗចាប់ផ្ដើមពីសំណួរមួយចំនួន។ ឯកឧត្តមបន្តថា ក្រសួងនឹងពិចារណា ដើម្បីបញ្រ្ជាបគ្រប់មេរៀនទាំងអស់នូវសំណួរ PISA ប៉ុន្តែក៏ត្រូវតែបញ្រ្ជាបនៅក្នុងការបង្រៀនផងដែរ។

“យើងនឹងបញ្រ្ជាបសំណួរ PISA ក្នុងការប្រឡងឆ្នាំនេះ ដោយចាប់ផ្ដើមពី១០ទៅ២០ភាគរយប៉ុណ្ណោះ”

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា សំណួរក្នុងរង្វាយតម្លៃ PISA ត្រូវបានតាក់តែងឡើងដើម្បីពិនិត្យថា ក្មេងអាចដោះស្រាយបញ្ហាដែលមានលក្ខណៈស្មុគស្មាញ អាចពិចារណាវិភាគ និងមានទំនាក់ទំនងប្រកបដោយប្រសិទ្ធភាពបានកម្រិតណា ពោលគឺជាការយកចំណេះដឹងដែលមានមកប្រើប្រាស់ក្នុងជីវភាពរស់នៅប្រចាំថ្ងៃ និងជាក់ស្តែង។

លោកជំទាវបន្ថែមថា ប្រសិនក្រឡេកមើលក្របខណ្ឌកម្មវិធីសិក្សារបស់ក្រសួងអប់រំ ដែលបានដាក់ចេញ គឺក្នុងបំណងអប់រំសិស្សានុសិស្សឱ្យក្លាយជាពលរដ្ឋពេញលេញ ពោលគឺវិជ្ជាសម្បទា បំណិនសម្បទា និងចរិយាសម្បទា ហើយក្រសួងតែងលើកកម្ពស់វិធីសាស្ត្របង្រៀនថ្មីៗ ដែលទាំងនេះគឺដើម្បីឆ្លើយតបនឹងរង្វាយតម្លៃ PISA នេះ។ ដូច្នេះនេះពុំមែនជារឿងថ្មីទេ ហើយសិស្សានុសិស្សអាចស្វែងរកសៀវភៅស្តីពីគំរូសំណួរក្នុងសាលាឌីជីថល ដើម្បីស្វែងយល់លម្អិតបន្ថែមពីប្រភេទសំណួរ។

លោក ព្រីង មរកត ប្រធាននាយកដ្ឋានមធ្យមសិក្សាចំណេះទូទៅ នៃក្រសួងអប់រំ យុវជន និងកីឡា មានប្រសាសន៍ថា សម្រាប់ពេលខាងមុខនេះ គឺជាការចូលរួមក្នុងការវាយតម្លៃលទ្ធផលសិក្សាសិស្សកម្រិតអន្តរជាតិ PISA ឆ្នាំ២០២៥ ដែលនឹងប្រព្រឹត្តិទៅនៅចុងខែមិថុនា ខាងមុខ តែសម្រាប់ការបញ្ចូលសំណួរខ្លះទៅក្នុងការប្រឡងសញ្ញាបត្រមធ្យមសិក្សាទុតិយភូមិ បើតាមលោក ព្រីង មរកត នេះគឺជាសិទ្ធិសម្រេចរបស់ថ្នាក់ដឹកនាំ ខណៈដែលតេស្ត PISA គឺសម្រាប់រង្វាយតម្លៃសិស្សដែលមានអាយុ ១៥ឆ្នាំ ចំណែកវិញ្ញាសានៃការប្រឡងសញ្ញាបត្រមធ្យមសិក្សាទុតិយភូមិកន្លងមក គឺវាស្ទង់សមត្ថភាពសិស្សចំណេះទូទៅដែលបានសិក្សាអស់រយៈពេល ១២ឆ្នាំ។

លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ យល់ថា ការពិចារណាដាក់បញ្ចូលសំណួរ PISA នៅក្នុងការប្រឡងបាក់ឌុបនេះជាការល្អ ព្រោះនឹងធ្វើឱ្យការរៀនបែបអន្តរជាតិ និងការរៀនបែបជាតិទៅទិសដៅតែមួយ។ កន្លងមក លោកសង្កេតឃើញថា ប្រសិនបើការប្រឡងបែបណា សិស្សរៀនសម្រាប់តែការប្រឡងបែបនោះ។ «ខ្ញុំសប្បាយចិត្តចំពោះការសម្រេចចិត្តនេះ!»។

ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ បន្ថែមថា សិស្សានុសិស្សដែលជាបេក្ខជនត្រៀមប្រឡងបាក់ឌុប នឹងមានពេលត្រៀមគ្រប់គ្រាន់ក្នុងការមើលមេរៀនពីពេលឥឡូវនេះ គឺមានពេល៤ ទៅ៥ខែ ទើបដល់ថ្ងៃប្រឡងចាក់ឌុប។ លោកបណ្ឌិតសុខ សូត្រ បន្តថា ក្រុមការងាររបស់ក្រសួងអប់រំ ក៏ដូចជាក្រុមការងារមហាវិទ្យាល័យអប់រំ គឺចាំជួយគ្រប់សាលាទាំងអស់ក្នុងការអនុវត្តតេស្ត PISA ដោយបង្កើតជាអេប GEIP EdTech ជួយលើការងារនេះ។

គួរជំរាបជូនថា តេស្ត PISA គឺជាកម្មវិធីវាយតម្លៃអន្តរជាតិដែលរៀបចំឡើងដោយអង្គការសហប្រតិបត្តិការ និងការអភិវឌ្ឍន៍សេដ្ឋកិច្ច (OECD)។ គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោក ដោយផ្តោតលើការធានាថា សិស្សទាំងអស់មានសមត្ថភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច៕