វគ្គផ្តាច់ព្រ័ត្រកម្មវិធីជជែកដេញដោលយុវជនថ្នាក់ជាតិ២០២៣ នឹងប្រព្រឹត្តិទៅនៅថ្ងៃទី១២ ខែសីហា ចុងសប្តាហ៍នេះ ស្របជាមួយ​នឹងខួបលើកទី២៣ ទិវាអន្តរជាតិសម្រាប់យុវជន ក្រោមប្រធា​ន​បទ “បំណិនបៃតងសម្រាប់យុវជន៖ ឆ្ពោះទៅពិភពលោកប្រកបដោយនិរន្តរភាព” ។

ក្នុងវគ្គផ្តាច់ព្រ័ត្រនៃកម្មវិធី ក្រុមបេក្ខជនមកពីសាលាបញ្ញាសាស្ត្រអន្តរជាតិ ខេត្តបាត់ដំបង ដែលជាក្រុមស្រប នឹងជួបជាមួយក្រុមបេក្ខជនមកពី សាលាចំណេះទូទៅ មីគីវ៉េ រាជធានីភ្នំពេញ ជាក្រុមបដិសេធ ដើម្បីជជែកទៅលើប្រធានបទ “ឥទ្ធិពលនៃបច្ចេកវិទ្យាបញ្ញាសិប្បនិមិត្ត (AI) ជាកត្តាគន្លឹះដល់អនាគតភាពនៃវិស័យអប់រំនៅកម្ពុជា” ដើម្បីដណ្តើមជ័យលាភីលេខ១។

លោក ម៉ិល ផនស៊ីហា ប្រធាននាយកដ្ឋានយុវជននៃក្រសួងអប់រំ យុវជន និងកីឡា មានប្រសាសន៍ថា  នៅក្នុងកម្មវិធីជជែកដេញដោលយុវជនថ្នាក់ជាតិ២០២៣ វគ្គផ្ដាច់ព្រ័ត្រ ចុងសប្តាហ៍នេះ ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា នឹងអញ្ជើញចូលរួមធ្វើបាថកឋាពិសេសមួយស្ដីអំពី ”បញ្ញាសិប្បនិមិត្ត និងការអប់រំនៅកម្ពុជា”។ លោកបន្តថា កម្មវិធីនេះ នឹងប្រព្រឹត្តិទៅនៅវិទ្យាស្ថានជាតិអប់រំ ដោយមានការអញ្ជើញចូលរួមពីថ្នាក់ដឹកនាំ មន្រ្តីរាជការក្រោមឱវាទក្រសួង ប្រធានមន្ទីរអប់រំ យុវជន និងកីឡារាជធានី-ខេត្ត ដៃគូអភិវឌ្ឍ យុវជន និងសិស្សានុសិស្សចូលរួមប្រមាណជាង ១០០០នាក់។

“ក្នុងនាមក្រុមការងាររៀបចំកម្មវិធី ខ្ញុំសូមកោតសរសើរ និងលើកទឹកចិត្តឱ្យប្អូនៗបេក្ខជននៃកម្មវិធីជជែកដេញដោលយុវជនថ្នាក់ជាតិទាំងអស់ មិនត្រឹមតែក្រុមប្រកួតផ្តាច់ព្រ័ត្រនោះទេ សូមបន្តចូលរួមអភិវឌ្ឍសមត្ថភាព និងទេព្យកោសល្យរបស់ខ្លួនតាមរយៈការចូលរួមក្នុងកម្មវិធីយុវជននានា ទាំងក្របខណ្ឌជាតិ និងអន្តរជាតិ”

លោក ម៉ិល ផនសីហា ប្រធាននាយកដ្ឋានយុវជននៃក្រសួងអប់រំ យុវជន និងកីឡា

ប្រធាននាយកដ្ឋានយុវជន បន្ថែមថា តាមរយៈការបញ្ចេញសមត្ថភាពរបស់ប្អូនៗជាបេក្ខជនទាំងអស់ ក្រុមការងារមានសុទិដ្ឋនិយមថា ប្អូនៗបេក្ខជនយើង  ពិតជាបានទទួលចំណេះដឹងថ្មីៗ និងបានយកចំណេះជំនាញដែលទទួលបានពីការបណ្តុះបណ្តាល ទៅពង្រីកបន្ថែមលើការសិក្សាស្រាវជ្រាវឱ្យកាន់តែស្ទាត់ជំនាញ និងមានភាពប្រាកដនិយម។

ជាមួយគ្នានេះ លោក ម៉ិល ផនស៊ីហា និងក្រុមការងាររៀបចំកម្មវិធី ក៏បានលើកទឹកចិត្តដល់ប្អូនៗជាបេក្ខជនទាំងអស់ ទាំងអ្នកជាប់ចំណាត់ថ្នាក់ និងអ្នកមិនបានជាប់ចំណាត់ថ្នាក់ កុំផ្តោតទៅលើតែលទ្ធផលនៃការប្រកួត តែត្រូវបន្តយកចំណេះដឹងទទួលបានពីកម្មវិធីទៅប្រើប្រាស់ ដើម្បីជាប្រយោជន៍ក្នុងការសិក្សា និងការរស់នៅក្នុងសង្គមជាក់ស្តែង។

សូម​បញ្ជាក់ថា ការ​ប្រកួតវគ្គផ្តាច់ព្រ័ត្រ នៃកម្មវិធីជជែកដេញដោលយុវជនថ្នាក់ជាតិឆ្នាំ២០២៣ នឹងមានធ្វើការផ្សាយផ្ទាល់ពិសេស​ចេញពីវិទ្យាស្ថានជាតិអប់រំ (NIE) តាមរយៈទំព័រហ្វេសប៊ុកផ្លូវការ ក្រសួងអប់រំ យុវជន និងកីឡា (MoEYS Cambodia) ក៏​ដូចជា​ទំព័រហ្វេសប៊ុករបស់ AMS Education នាថ្ងៃទី១២ ខែសីហា ឆ្នាំ២០២៣ ចាប់ពីម៉ោង ៧:៤៥ នាទីព្រឹកតទៅ៕