ភ្នំពេញ – ប្អូនៗយុវជនបើចង់បានភាពមានបានយូរអង្វែង ឬចង់សប្បាយបានយូរកុំមើលរំលងការរៀនសូត្រ ព្រោះឱកាសមាន ឬក្លាយជាអ្នកធំ ដែលមានដោយសារការសិក្សារៀនសូត្រមិនងាយក្រនោះទេ។ នេះបើតាមប្រសាសន៍របស់លោកបណ្ឌិត តាន់ មុនីវណ្ណ អគ្គនាយករង ក្រុមហ៊ុន ម៉ុង ឬទ្ធីគ្រុប ក្នុងការចែករំលែកចំណេះដឹងដល់សិស្សានុសិស្ស នៃវិទ្យាល័យស្ទឹងហាវ ខេត្តព្រះសីហនុកាលពីពេលថ្មីៗនេះ។

លោកបណ្ឌិត តាន់ មុនីវណ្ណ មានប្រសាសន៍ថា អំណាចរបស់មនុស្ស ឬលទ្ធភាពរបស់មនុស្ស និងឱកាសរបស់មនុស្សមានច្រើនអាចបានមកដោយសារ ទី១. កើតមកក្នុងត្រកូលអ្នកមាន គឺមានស្រាប់ដោយមិនបាច់ប្រឹង គ្រាន់តែមិនដឹងមានដល់ពេលណា, ទី២. ឱកាសចាប់មុខរបរត្រូវ មិនបាច់ប្រឹងរៀនក៏អាចក្លាយជាអ្នកមាន តែមិនដឹងមានដល់ពេលណា, ទី៣. មានតាមមិត្តភក្ដិ ឬបក្សពួកនិយម ណែនាំរកស៊ីធ្វើការក៏អាចក្លាយជាអ្នកធំ អ្នកមាន ប៉ុន្តែមិនដឹងធំដល់ពេលណា ។ បើតាមលោកបណ្ឌិត តាន់ មុនីវណ្ណ បើទោះជាប្អូនៗសិស្សានុសិស្សគ្មានចំណុចទាំងបីនេះ ក៏ប្អូនៗអាចមានឱកាសមានបានយូរអង្វែង គឺតាមរយៈការសិក្សារៀនសូត្រ។

ខ្ញុំមិនមែនកើតមកត្រកូលអ្នកមានទេ ប៉ុន្តែអ្វីដែលកើតមកធ្វើបានប៉ុណ្ណេះ គឺចាប់ផ្ដើមពីខ្ញុំរៀន បើខ្ញុំអត់រៀនទេ ក៏គ្មានថ្ងៃនេះ

លោកបណ្ឌិត តាន់ មុនីវណ្ណ

អគ្គនាយករង ក្រុមហ៊ុន ម៉ុង ឬទ្ធីគ្រុប លើកឡើងថា ស៊ូឱ្យក្រិនម្រាមដៃ តែមិនឱ្យក្រិនបាតដៃ ព្រោះការរៀនពិបាកណាស់ គ្មាននរណាម្នាក់ថារៀនស្រួលទេ។ ទន្ទឹមគ្នានេះ បើប្អូនរៀនបានហើយ ប្អូនមានអនាគតវែងឆ្ងាយ ប្អូនអាចមានការងារធ្វើដល់ចាស់ ជំនាញខ្លះប្អូនធ្វើការងារកាន់តែចាស់កាន់តែបានលុយ ប៉ុន្តែការងារប្រើកម្លាំងនៅពេលចាស់ហើយធ្វើមិនកើតទេ ហើយអាចលំបាកមួយជីវិត។

ប្អូនៗត្រូវកសាងខ្លួន រៀនឱ្យចប់បានសញ្ញាបត្រណាមួយ ប៉ុន្តែក៏កុំរៀនមានតែសញ្ញាបត្រប៉ុន្តែធ្វើការងារមិនកើតក៏មិនបានដែរ

លោកបណ្ឌិត តាន់ មុនីវណ្ណ

លោកបណ្ឌិត តាន់ មុនីវណ្ណ បន្ថែមថា ការរៀនសូត្រគ្មាននរណាមករៀនជំនួសប្អូន ពេលប្រឡងគ្មាននរណាមកប្រឡងជំនួសប្អូន ពេលទៅរកការងារអាចមានអ្នកនាំ តែគ្មានអ្នកណាធ្វើការងារជំនួសប្អូនទេ ការសប្បាយក៏គ្មាននរណាសប្បាយជំនួសប្អូនបាន ហើយការលំបាកក៏គ្មាននរណាមកលំបាកជំនួសប្អូនបានដែរ ។ ដូច្នេះ សូមយុវជនកុំប្រហែសពេក កុំផ្ញើជីវិតទៅលើអ្នកដទៃទោះបីអ្នកនោះជានរណាក៏ដោយ ចាំបាច់ប្អូនត្រូវរៀនឱ្យមានចំណេះដឹងគ្រប់គ្រាន់ នោះប្អូននឹងចេះសម្រេចចិត្តបានត្រឹមត្រូវ ៕