ភ្នំពេញ – សាលារៀនជំនាន់ថ្មី នៃវិទ្យាល័យព្រះស៊ីសុវត្តិ រាជធានីភ្នំពេញ ជាសាលារៀនគំរូមួយដែលក្រសួងអប់រំ យុវជន និងកីឡា បានដាក់ឱ្យអនុវត្តរបៀបរៀន និងបង្រៀនតាមកម្មវិធីសិក្សាបែបទំនើប ឆ្លើយតបនឹងរបត់នៃការអប់រំនៅក្នុងសតវត្សទី២១ ។ ម្តាយឪពុក និងអ្នកអាណាព្យាបាលសិស្ស បានចាត់ទុកការអប់រំនៅទីនេះ កំពុងជួយឱ្យកូនៗរបស់គាត់ភាគច្រើនមានចំណេះដឹងទូលំទូលាយ និងសមត្ថភាពប្រកួតប្រជែងខ្ពស់ ។

ទន្ទឹមនឹងការពង្រឹងគុណភាពអប់រំនៅសាលារៀនជំនាន់ថ្មីនេះ លោក សម្យ កំសាន្ត នាយករងវិទ្យាល័យព្រះស៊ីសុវត្ថិ ទទួលបន្ទុកសាលារៀនជំនាន់ថ្មី មានប្រសាសន៍ថា សាលារៀនជំនាន់ថ្មី (NGS) មានបេសកកម្មកសាងសមត្ថភាពធនធនមនុស្សនៅកម្រិតវិទ្យាល័យឱ្យក្លាយជាមូលធនមនុស្ស ហើយការកសាងមូលធនមនុស្សចាំបាច់ត្រូវការសិស្សមានគុណភាព ។

ជាមួយគ្នានេះ លោកនាយករងវិទ្យាល័យព្រះស៊ីសុវត្ថិ ទទួលបន្ទុកសាលារៀនជំនាន់ថ្មី មានប្រសាសន៍ឱ្យដឹងថា សាលារៀនជំនាន់ថ្មី នៃវិទ្យាល័យព្រះស៊ីសុវត្ថិ បានក្លាយថ្នាលអប់រំ និងបណ្តុះបណ្តាលសិស្សតាមបែបសតវត្សទី២១ ដែលជួយឱ្យសិស្សានុសិស្សមានសមត្ថភាពចេះត្រិះរិះពិចារណា បង្កើតគំនិតច្នៃប្រតិដ្ឋ បង្កើតកិច្ចសហប្រតិបត្តិការ និងទំនាក់ទំនង ពង្រីកសក្កានុពលសិស្សកម្រិតវិទ្យាល័យ បណ្តុះគំនិតសហគ្រិនភាព ព្រមទាំងកសាងភាពជាអ្នកដឹកនាំដល់សិស្ស។

គណៈគ្របគ្រងសាលារៀនជំនាន់ថ្មី នៃវិទ្យាល័យព្រះស៊ីសុវត្ថិ បានបញ្ជាក់ថា សិស្សមករៀននៅសាលារៀនជំនាន់ថ្មី មិនមែនសាលាជ្រើសរើសយកតែសិស្សមានគុណភាព ឬមានសមត្ថភាពស្រាប់មកផ្តល់ការអប់រំឱ្យនោះទេ ប៉ុន្តែសាលារៀនទទួលសិស្សដែលមានការប្តេជ្ញាចិត្តខ្ពស់លើការសិក្សា រួចហើយបង្ហាត់បង្រៀនពួកគេតាមរយៈកម្មវិធីសិក្សាដែលសាលាបានរៀបចំឡើងឆ្លើយតបនឹងតម្រូវការ និងការរីកចម្រើនសង្គម ។

ប្រសិនបើយើងចង់បានកាំបិតមុត ទី១ ទាមទារឱ្យយើងរើសដែកល្អ ទី២ ទាមទារឱ្យយើងមានជាងចំណានដើម្បីមកលត់ដំដែក ! ដូចគ្នានេះ ដើម្បីទទួលបានគុណភាពពីការអប់រំ យើងចាំបាច់ត្រូវការសិស្សមានគុណភាព ពោលគឺសិស្សចូលចិត្តរៀនសូត្រ និងជាសិស្សដែលអប់រំបាន ! មួយវិញទៀតយើងត្រូវការគ្រូបង្រៀនដែលមានគុណភាពដូចគ្នា…

លោក សម្យ កំសាន្ត នាយករងវិទ្យាល័យព្រះស៊ីសុវត្ថិ ទទួលបន្ទុកសាលារៀនជំនាន់ថ្មី

ជុំវិញបេសកកម្មកសាងសមត្ថភាពសិស្សនេះ សាលារៀនជំនាន់ថ្មីបានលើកទឹកចិត្តឱ្យសិស្សដែលមកសិក្សាគ្រប់រូប ត្រូវបំពេញតួនាទីជាសិស្សល្អ ជាកូនល្អ និងជាពលរដ្ឋល្អក្នុងសង្គម តាមរយៈការអប់រំចំណេះដឹង ការបណ្តុះជំនាញ និងការអប់រំឥរិយាបថរស់នៅប្រចាំថ្ងៃ ។

បើតាមលោក សម្យ កំសាន្ត បានបញ្ជាក់ឱ្យដឹងថា សិស្សានុសិស្សសាលារៀនជំនាន់ថ្មី នៃវិទ្យាល័យព្រះស៊ីសុវត្ថិ ត្រូវមានវិន័យក្នុងការសិក្សាដោយគោរពម៉ោងពេលសិក្សាជាក់លាក់តាមកាលវិភាពដែលសាលាបានរៀបចំ ហើយក្នុងមួយថ្ងៃសិស្សមានម៉ោងសិក្សាពីរវេន (ព្រឹក និងរសៀល) ។ ការអប់រំរបៀបសិស្សមជ្ឈមណ្ឌលនៅទីនេះ សិស្សម្នាក់ៗត្រូវធ្វើដំណើរទៅថ្នាក់រៀននីមួយៗតាមកាលវិភាគដោយខ្លួនឯង និងមានគ្រូជាអ្នកសម្របសម្រួលតាមជំនាញ និងតាមទេពកោសល្យ ។

គួររំលឹកថា សាលារៀនជំនាន់ថ្មី នៃវិទ្យាល័យព្រះស៊ីសុវត្ថិ ជាសាលារៀនស្ថិតនៅក្នុងការធ្វើកំណែទម្រង់ស៊ីជម្រៅលើវិស័យអប់រំរបស់ក្រសួងអប់រំ យុវជន និងកីឡា ។ សាលារៀននេះ បានសម្ភោធដាក់ឱ្យដំណើរការ នៅថ្ងៃទី២៣ ខែមិថុនា ឆ្នាំ២០១៦ បានរៀបចំកម្មវិធីសិក្សា និងបន្ទប់សិក្សាដាច់ដោយឡែកពីគ្នាប្រកបដោយផាសុកភាព និងមានភាពងាយសម្រួលដល់ការសិក្សា អមដោយការបំពាក់សម្ភារៈសិក្សាទំនើប និងមានបណ្ណាល័យទំនើបបម្រើដល់ការស្រាវជ្រាវ ។

គណៈគ្រប់គ្រងសាលារៀនជំនាន់ថ្មីបានចាត់ទុកការអប់រំសីលធម៌ សុជីវធម៌ និងសុជីវធម៌របស់បុគ្គលគ្រប់រូប ជាផ្នែកសំខាន់សម្រាប់ការអប់រំ និងដំណើរការសកម្មភាពការងារផ្សេងៗរបស់សាលារៀនទាំងមូល ។ ទន្ទឹមគ្នានេះ វិធីសាស្រ្តអប់រំ និងការដោះស្រាយបញ្ហាដោយភាពឆ្លាតវៃ ជាអាទិភាពពិសេសដែលសាលារៀនជួយគាំទ្រសិស្សឱ្យមានការគិតវិជ្ជមាន ព្រមទាំងបង្ហាញពីសីលធម៌ និងសុជីវធម៌ល្អរបស់សិស្ស ៕