ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមរបាយការណ៍របស់ក្រសួងអប់រំ យុវជន និងកីឡា បានឱ្យដឹងថា ក្នុងរយៈពេល ៣ខែដំបូង នៃឆ្នាំ ២០២៦ និស្សិតកម្ពុជាចំនួន ១២៤ នាក់ត្រូវបានជ្រើសរើសជាផ្លូវការដើម្បីទៅបន្តការសិក្សានៅបណ្តាប្រទេសជាមិត្តនានា ក្រោមកម្មវិធីសហប្រតិបត្តិការទ្វេភាគី និងពហុភាគី។
លោក កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានគូសបញ្ជាក់ថា លទ្ធផលនេះគឺជាផ្លែផ្កានៃកិច្ចខិតខំប្រឹងប្រែងរបស់ការិយាល័យសហប្រតិបត្តិការអន្តរជាតិ និងកិច្ចការអាស៊ាន ក្នុងការបើកច្រកផ្លូវចំណេះដឹងសម្រាប់យុវជនកម្ពុជាទៅបន្តការសិក្សានៅក្រៅប្រទេស។ បើតាមលោក កាន់ ពុទ្ធី ក្នុងចំណោមបេក្ខជនទាំង ១២៤នាក់នោះ ពួកគេបានជាប់ទៅសិក្សានៅប្រទេសនានា ដូចជាប្រទេសចិន ចំនួន ៧៥ នាក់, ប្រទេសជប៉ុន (កម្មវិធី Teacher Training Students) ចំនួន ៣ នាក់, ប្រទេសហុងគ្រីចំនួន ៤៥ នាក់ និងគុយបា ចំនួន ១ នាក់ផងដែរ។
ក្រៅពីតួលេខខាងលើ និស្សិតចំនួន ២៤នាក់ផ្សេងទៀតក៏បានទទួលលទ្ធផលជាស្ថាពរផងដែរ ក្រោមកម្មវិធីអភិវឌ្ឍន៍ធនធានមនុស្សរបស់ប្រទេសជប៉ុន (JDS) ដែលជាកម្មវិធីបណ្តុះបណ្តាលមន្ត្រី និងធនធានមនុស្សកម្រិតខ្ពស់។
បើយោងតាមទិន្នន័យកាលពីឆ្នាំសិក្សា ២០២៤-២០២៥ រាជរដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា បានធ្វើការប្រឡងជ្រើសរើស និងជ្រើសរើសនិស្សិត និងមន្ត្រីរាជការកម្ពុជា ក្រោមគម្រោងកម្មវិធីអាហារូបករណ៍ជាលក្ខណៈទ្វេភាគី នៃបណ្ដាប្រទេសជាមិត្ត សរុបចំនួន ៥៥២នាក់ ដែលស្មើនឹង ៣១.៧០% បានបញ្ជូនទៅសិក្សានៅប្រទេសចំនួន ១៣។
ក្នុងនោះ ការប្រឡងជ្រើសរើសតាមរយៈក្រសួងអប់រំ បានចំនួន ៣៤៨ នាក់ ស្រីចំនួន ១៤៣ នាក់ ទៅសិក្សានៅប្រទេស ថៃ, ចិន, វៀតណាម, ឡាវ, ជប៉ុន, ហុងគ្រី និងគុយបា។ ដោយឡែកការជ្រើសរើសដោយភាគីប្រទេសជាមិត្តផ្ទាល់ បានចំនួន ២០៤ នាក់ ស្រី ៣២ នាក់ ទៅសិក្សានៅប្រទេស រុស្ស៊ី, តួកគីយ៉េ, ឆែក, បារាំង, ឥណ្ឌា និងសិង្ហបុរី ជាដើម៕
អត្ថបទ ៖ ឌិន ថារី
