កម្មវីធីសួនសិក្សាត្រូវបានចាប់ផ្ដើមសាកល្បងអនុវត្តតាំងពីឆ្នាំ២០១៧នាខេត្តស្ទឹងត្រែង ដោយមាន​ឯកសារណែនាំ និងសៀវភៅសកម្មភាពថ្នាក់ទី៤ ដែលបានរៀបចំឡើងជាសេចក្ដីព្រាងដំបូង។ នៅឆ្នាំ២០១៨-២០១៩ ក្រុមការងារបានរៀបចំសេចក្ដីព្រាងសៀវភៅអនុវត្តសកម្មភាពផ្សារភ្ជាប់កម្រិតថ្នាក់ទី៥ និងទី៦ នៅតាមបណ្ដាខេត្តមួយចំនួននាប្រទេសកម្ពុជា។

លោកជំទាវ ទន់ សាអ៉ីម អនុរដ្ឋលេខាធិការក្រសួងអប់រំ យុវជន និងកីឡាមានប្រសាសន៍ថា សៀវភៅណែនាំសកម្មភាពសួនសិក្សានិងផ្ទះបាយសិក្សានេះបានឆ្លុះ​បញ្ចាំងពីការរួមចំណែកក្នុងការអនុវត្តយុទ្ធសាស្ត្រកំណែទម្រង់វិស័យអប់រំ ឆ្នាំ២០២៤-២០២៨ ក៏ដូចជា​យុទ្ធសាស្ត្របញ្ចកោណដំណាក់កាលទី១ ដែលរាជរដ្ឋាភិបាលកម្ពុជាបានចាត់ទុកវិស័យអប់រំជាវិស័យ​អាទិភាពទី១ឆ្ពោះទៅអភិវឌ្ឍមូលធនមនុស្សឱ្យមានសមត្ថភាព ចំណេះដឹង ជំនាញខ្ពស់ ភាពច្នៃប្រឌិត ស្មារតីសហគ្រិនភាព នវានុវត្តន៍ និងក្រមសីលធម៌ស្អាតស្អំ ដើម្បីជំរុញកំណើន និងការងាររួមចំណែក​ដល់ការអភិវឌ្ឍសេដ្ឋកិច្ចសង្គម ប្រកបដោយចីរភាព និងបរិយាបន្ន។

លោកជំទាវអនុរដ្ឋលេខាធិការក្រសួងអប់រំបានបន្តថា កម្មវិធីសួនសិក្សានិងផ្ទះបាយសិក្សាមាន៤ចំណងជើងនេះត្រូវបានអភិវឌ្ឍដោយប្រើរយៈពេលយូរគ្រប់គ្រាន់ ពោលចាប់តាំងពីឆ្នាំ២០១៦ដល់ឆ្នាំ២០២៣រហូតទទួលបានការអនុម័តតាមរយៈប្រកាសលេខ៦៦៣ អយក.ប្រក និង៦៦៤ អយក.ប្រកចុះថ្ងៃទី២៩ ខែមិថុនា ឆ្នាំ២០២៣ដោយឆ្លងកាត់ការពិគ្រោះយោបល់យ៉ាងហ្មត់ចត់ និង​យកចិត្តទុកដាក់ ប្រកបដោយវិធីសាស្ត្រមានលក្ខណៈវិទ្យាសាស្ត្រ តាមរយៈកិច្ចប្រជុំ សិក្ខាសាលា​ពិគ្រោះយោបល់ ទស្សនកិច្ចសិក្សា និងការសាកល្បងជាដើម នៅក្នុងខេត្តស្ទឹងត្រែង និងខេត្តសៀមរាប ដែលស្រុកគោលដៅសរុបមានចំនួន៥ស្រុក សាលាគោលដៅចំនួន ១០៦សាលា ព្រមទាំងបានផ្ដល់​ផលដល់សិស្សសរុប ២៤,២៥០នាក់ ស្រី ១១,៨១២នាក់ និងគ្រូចំនួន ៩១៨នាក់ ស្រី ៥៣៣នាក់។

លោកជំទាវ ទន់ សាអ៉ីម អនុរដ្ឋលេខាធិការក្រសួងអប់រំ យុវជន និងកីឡាសូមថ្លែងអំណរគុណដល់ភាគីក្រសួងសាម៉ីផ្ទាល់ និងអង្គការដៃគូរសហការណ៍ដែលមានអង្គការភ្លែនអន្តរជាតិកម្ពុជា និង ឯកអគ្គរដ្ឋទូតអូស្ត្រាលីប្រចាំប្រទេសកម្ពុជាដែលបានខិតខំរិះរកគោលនយោបាយ យុទ្ធសាស្ត្រ និងកម្មវិធីនានា សម្រាប់គាំទ្រដល់គ្រូបង្រៀន និងវិធីសាស្ត្របង្រៀន ដើម្បីពង្រឹងគុណភាពអប់រំ តាមរយៈការអនុវត្ត​កម្មវិធី​កំណែទម្រង់សាលារៀនយ៉ាង​សកម្ម សំដៅទទួលបាននូវសាលារៀនល្អ នាយកសាលាល្អ គ្រូបង្រៀនល្អ សាលារៀនស្អាត និងមាន​ការចូលរួមយ៉ាងផុសផុលពីសំណាក់សហគមន៍ គ្រួសារ និង​អ្នកពាក់ព័ន្ធ។ លើសពីនេះដើម្បីអភិវឌ្ឍសមត្ថភាពវិជ្ជាជីវៈគ្រូឧទ្ទេស ដោយផ្តោតលើខ្លឹមសារមេរៀន និងគរុកោសល្យ ជាពិសេសវិធីសាស្ត្រ​បង្រៀនសម្បូរបែប វិធីសាស្ត្របង្រៀនតាមបែបសកម្ម និងសមត្ថភាព ខាង​បច្ចេកវិទ្យា ព្រមទាំងអភិវឌ្ឍ​ហេដ្ឋារចនាសម្ព័ន្ធ ដូចជាការបំពាក់បរិក្ខាររៀន និងបង្រៀនស្របតាម​បច្ចេកវិទ្យាថ្មីៗ បណ្ណាល័យ សម្ភារឧបទេស ឯកសាររៀននិងបង្រៀនទំនើបសម្បូរបែប ការអភិវឌ្ឍភាព​ជាអ្នកដឹកនាំគ្រប់គ្រង ការផ្សារភ្ជាប់ទ្រឹស្តីទៅនឹងការអនុវត្ត កម្មវិធីសិក្សាគរុកោសល្យ និងការរៀបចំប្រព័ន្ធធានាគុណភាពផ្ទៃក្នុង និងជាពិសេសគឺការផលិតឯកសារគាំទ្រការបង្រៀន និងរៀន សំដៅទទួលបានប្រភពឯកសារ​សម្បូរបែប និងសមស្របទៅតាមស្ថានភាពនៃការសិក្សារបស់សិស្ស។ ជាក់ស្ដែងកញ្ចប់ឯកសារណែនាំ​ការបង្រៀន​ តាមរយៈកម្មវិធីសួនសិក្សា​ និងផ្ទះបាយសិក្សាដែលមានបញ្ជ្រាប​ការអប់រំយេនឌ័រផងដែរ។

លោកស្រី គ្វីននេត វ៉ង នាយិកាប្រចាំប្រទេសអង្គការភ្លែនអន្តរជាតិកម្ពុជាបានលើកឡើងថា តាមរយៈការអនុវត្តកន្លងមកយើងអាចសង្កេតឃើញមានការប្រែប្រួលរបស់សិស្សទាំងអាកប្បកិរិយា ជាមួយឪពុកម្ដាយ ជាមួយលោកគ្រូអ្នកគ្រូ និងជាមួយមិត្តរួមថ្នាក់ថែមទាំងជាកត្តាជំរុញឱ្យសិស្សងាកមកចូលចិត្តសិក្សាថែមទៀតផង។ កម្មវិធីសិក្សាទាំងនោះ បានធ្វើឱ្យកុមារស្គាល់ពីបន្លែផ្សេងៗក្នុងសួន ការដាំដំណាំដោយមិនប្រើជីគីមី និងរូបរាងធរណីមាត្រផ្សេងៗ នៃរងបន្លែផងដែរ។ លើសពីនេះកុមារទាំងនោះអាចយកចំណេះដឹងនៃការដាំបន្លែនៅសាលារៀនទៅអនុវត្តនៅផ្ទះដោយដាំបន្លែទៅតាមប្រភេទថែមទាំងអាចទទួលទានបានដោយមិនចំណាយថវិកា និងមិនមានជីគីមី ។ កុមារទាំងអស់ក៏អាចរៀនសូត្រពីវិធីដាំស្លរនិងការធ្វើកិច្ចការផ្ទះ និងផ្ទះបាយដោយមិនបែងចែកការងារភេទស្រី ឬប្រុសឡើយ។ គួរបញ្ជាក់ដែរថានេះជាការលើកឡើងនៅក្នុងសិក្ខាសាលាផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការនូវ «សៀវភៅណែនាំសកម្មភាព​រៀនកម្មវិធីសួនសិក្សានិងផ្ទះបាយសិក្សាក្នុងប្រទេសកម្ពុជា» និង «សៀវភៅណែនាំផែនការសកម្មភាព​ក្នុងសួនសិក្សានិងផ្ទះបាយសិក្សា សម្រាប់កម្រិតបឋមសិក្សា ថ្នាក់ទី៤ ថ្នាក់ទី៥ និងថ្នាក់ទី៦» កាលពីព្រឹកថ្ងៃទី១៣ ខែមិថុនា ឆ្នាំ២០២៤ ក្រោមអធិបតីភាពរបស់ លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា តំណាងឯកឧត្តម ហង់ជួន ណារុន ឧបនាយករដ្ឋមន្ត្រី និងរដ្ឋមន្ត្រីក្រសួងអប់រំយុវជន និ​ងកីឡា លោកស្រី Amber Cernovs នាយករងទទួលបន្ទុកស្ថានបេសកកម្ម នៃស្ថានទូតអូស្រ្តាលី​ប្រចាំប្រទេសកម្ពុជា លោកស្រី គ្វីននេត វ៉ង នាយិកាប្រចាំប្រទេសអង្គការភ្លែនអន្តរជាតិកម្ពុជា អ្នកតំណាងអគ្គនាយកនៃអគ្គនាយកដ្ឋានអប់រំ ថ្នាក់ដឹកនាំនិងបុគ្គលិកអប់រំជាច្រើនរូប៕