ចាប់ផ្តើម​ឆ្នាំ២០២៦ភ្លាម ក្រសួងប្រៃសណីយ៍ និងទូរគមនាគមន៍ បានដាក់ឱ្យប្រើប្រាស់កម្មវិធីបកប្រែ TranslateKH ជំនាន់ទី២ ដោយ​បានអះអាងថា កម្មវិធីជំនាន់ថ្មីនេះ មានសមត្ថភាព​ខ្ពស់អាច​យល់ និង​ធ្វើការ​បកប្រែផ្អែក​តាម​បរិបទ នៃ​ខ្លឹមសារ ជាជាងបកប្រែ​តាម​សំណង់ឃ្លា​ប្រយោគ ដោយ​ប្រើប្រាស់​បច្ចេកវិទ្យា​បញ្ញាសិប្បនិម្មិត រួម​បញ្ចូល​ជាមួយ​នឹង​បច្ចេកទេស​សិក្សា​ស៊ីជម្រៅ (Deep Learning) និងម៉ូដែល​ភាសាធំ (Large Language Model)។

លោក ជី សុផាត អ្នកផលិតមាតិកាអប់រំអំពីចំណេះដឹងឌីជីថល លើកឡើងថា លោកធ្លាប់ប្រើប្រាស់កម្មវិធី TranslateKH ជំនាន់ទី១ ហើយឃើញថា ល្អ អាចយល់ពាក្យពេចន៍ភាសាខ្មែរស៊ីជម្រៅជាងមុន ពាក្យពេចន៍ភាសាខ្មែរបកប្រែបានល្អមួយចំនួនធំ បើធៀបនឹង Google Translate ដែល​ការបកប្រែត្រង់ មិនមានភាពបត់បែនលក្ខណៈជាភាសាខ្មែរ។

ដោយឡែក​សម្រាប់កម្មវិធី TranslateKH ជំនាន់ទី២ ដែលទើបដាក់ឱ្យ​ប្រើប្រាស់នេះវិញ លោក សុផាត មើលឃើញថា ការបកប្រែភាសាខ្មែរមានលក្ខណៈណែងណងបានច្រើនគួរសម ហើយលោកសង្ឃឹមថា កម្មវិធី TranslateKH ជំនាន់ទី២ នេះ នឹងពង្រីកវិសាលភាពទូទំទូលាយដល់អ្នកប្រើប្រាស់បានច្រើនជាងមុន ដើម្បីជួយសម្រួលការងារផ្នែកភាសាខ្មែរសម្រាប់អ្នកសម្រួលភាសាខ្មែរជាដើម។

“ខ្ញុំជឿថា ការដាក់ឱ្យប្រើប្រាស់ជាសាធារណៈនេះ នឹងអាចជួយសម្រួលដល់ការបកប្រែជាភាសាខ្មែរ បានប្រសើរជាងមុន មានន័យថា អាចយល់ និងមានលក្ខណៈបច្ចេកទេសជាភាសាខ្មែរបានល្អ”

លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ មានប្រសាសន៍ថា កម្មវិធី TranslateKH កាលជំនាន់ទី១ គឺជាជំហានចាប់ផ្តើមដ៏សំខាន់មួយសម្រាប់កម្ពុជាដែល​មានថ្នាលបកប្រែផ្ទាល់ខ្លួន។ នៅជំនាន់ទី១ លោក​មើលឃើញថា ការបកប្រែនៅមានកម្រិតនៅឡើយ ជាពិសេសនៅពេលបកប្រែឃ្លាវែងៗ ឬពាក្យបច្ចេកទេស ដោយវាច្រើនតែបកប្រែត្រង់ៗពេក (Word-to-word) ដែលធ្វើឱ្យបាត់បង់អត្ថន័យដើមខ្លះ ឬខុសវេយ្យាករណ៍ ដែលតម្រូវឱ្យយើងចំណាយពេលផ្ទៀងផ្ទាត់ និងកែសម្រួលច្រើន។

ចំពោះ TranslateKH ជំនាន់ទី២ នេះវិញ លោកបណ្ឌិត បានអបអរ និងកោតសរសើរចំពោះក្រសួងប្រៃសណីយ៍ ដោយថា ការធ្វើបច្ចុប្បន្នភាពដោយដាក់បញ្ចូលបច្ចេកវិទ្យា AI (Deep Learning និង Large Language Model) គឺជាការដើរទាន់សម័យកាលបច្ចេកវិទ្យាពិភពលោក។

“ខ្ញុំរីករាយដែលបានឃើញបច្ចេកវិទ្យាភាសារបស់ខ្មែរយើងមានការរីកចម្រើនបែបនេះ”

លោកបណ្ឌិត សុខ សូត្រ រំពឹងថា TranslateKH ជំនាន់ទី២ នេះ នឹងជួយសម្រួលដល់សាធារណជនបានច្រើន ដូចជា សម្រាប់វិស័យអប់រំ និងស្រាវជ្រាវ ដោយវា​នឹង​ជួយឱ្យសិស្សនិស្សិត និងអ្នកស្រាវជ្រាវ អាចយល់អត្ថន័យនៃឯកសារភាសាអង់គ្លេស ឬខ្មែរ បានយ៉ាងរហ័ស និងមានលក្ខណៈធម្មជាតិជាងមុន (តាមបរិបទ) ដែលមិនចាំបាច់ចំណាយពេលយូរក្នុងការបកប្រែ។

ជាមួយ​គ្នានេះ សម្រាប់កិច្ចការងាររដ្ឋបាល វានឹងជួយកាត់បន្ថយរបាំងភាសា ធ្វើឱ្យការទំនាក់ទំនង ឬការស្វែងរកព័ត៌មានមានភាពងាយស្រួល និងចំណេញពេលវេលា។ ហើយពិសេស​ទៅទៀតនោះ វាគឺមោទនភាពជាតិ ព្រោះការដែលមាន App ជាផ្លូវការនៅលើ PlayStore/AppStore និងគេហទំព័រថ្មីដែលរលូនបែបនេះ បង្ហាញពីភាពម្ចាស់ការលើបច្ចេកវិទ្យារបស់កូនខ្មែរ និងជួយលើកកម្ពស់ភាសាជាតិក្នុងយុគសម័យឌីជីថលនេះ៕